1 He wode Yihudi ba ishatape shaaketidi, Adulaama kataman de7iya Hira geetetiya uraara daanaw bis. 2 Yan Yihudi Shuu7a geetetiya Kanaane ura na7iw machis. 3 Iya Yihudas qanthatada adde na7a yelasu. I he na7a Era gidi sunthis. 4 Qassika qanthatada adde na7a yelasu. Iya he na7a Onaana gada sunthasu. 5 Zaaradaka hara adde na7a yelasu. Iya he na7aa Seela gada sunthasu. He na7ay yeletiya wode Yihudi Akziiba biittana.

6 Yihudi ba bayra na7a Eras Timaaro geetetiya macho immis. 7 Yihuda bayra na7ay, Eri, Godaa sinthan iita asi gidiya gisho, Goday iya wodhis.

8 Yihudi Onaanako, “Wogay nena kiiteysa mela ne ishaa machera aqa. Ne ishaas na7a yelada iya suntha xeegisa” yaagis. 9 Shin Onani yeletana nayti iyabaa gidonaysa erida gisho, ba ishaa machera aqiya wode ba ishaas na7i yeletonna mela ba attunta sa7an gussees. 10 I oothidabay Godaa sinthan iitaba gidida gisho, Goday iyaka wodhis.

11 Hessafe guye, Yihudi ba na7aa machiw Timaaro, “Ta na7ay Seeli diccana gakanaw ne aawa soo bada, am7etethan de7aasha” yaagis. Hessa I giday, ika ba ishatada hayqanekonne gidi hirgida gishosa. Hessa gisho, Timaara bada ba aawa son de7asu.

12 Daro wodepe guye, Yihuda machiya, Shuu7a na7iya hayqasu. Yihudi ba kayo wodiya ongidi, ba dorsata ikisiya meediya asatako Timina geetetiya bessi ba laggiya Adulaama addiya Hirera bis.

13 Asay Timaaro, “Heko, ne azina aaway Yihudi, ba dorsata ikisiya meedanaw Timina bees” yaagidi odidosona. 14 Iya ba am7etetha ma7uwa laammada, bana balethanaw shaashe ekada guuluntasu. Yaatada, Timina efiya ogiya doonan de7iya Enayme katama gaxan uttasu. Hessa iya oothidaysi, Seeli diccidi gakinka iyaw macho gidada imetonaysa iya erida gishosa.

15 Iya ba som7uwa guuluntida gisho, Yihudi iyo be7ida wode, layma maccas gidi qopis. 16 Ba na7aa machiw gideysa eronna de7ishe, ogiya gaxa iiko shiiqidi “Taara aqanee?” yaagidi oychis.

Iya, “Taani neera aqiko, ne taw ay immanee?” gada oychasu.

17 I, “Taani ta mehiyape issi kole new yeddana” yaagis.

Iya, “Neeni hessa taw yeddana gakanaw ay oythanee?” yaagasu.

18 I, “Ay oytho?” yaagis.

Iya, “Ne maatamiya iya gooshuwaranne ne kushiyan de7iya xam7a oytha” yaagasu. I hessata immidi, iira aqis; iyaka qanthatasu. 19 Iya hessafe dendada bidaape guye, ba guulunthaa qaarada, ba am7etetha ma7uwa ma7asu.

20 Yihudi ba oythidaba he maccaseepe zaari ekanaw deesha ba laggiya Hira bolla iw yeddis. Shin I iyo demmibeenna. 21 I he biitta asaako, “Enayme kataman, oge doonan uttida layma maccasiya awunee?” yaagidi oychis.

Asay, “Layma maccas haysan ubbaka baawa” yaagidosona.

22 I Yihudako simmidi, “ ‘Taani iyo demmabike; hessa bollaka he biitta asay, layma maccas haysan ubbaka baawa’ yaagidosona” yaagis.

23 Yihudi, “Ba oykidaysa baw eko, atto giiko, asi nuna miicana. Hiza taani iw deeshe yeddas shin neeni iyo demmabaaka” yaagis.

24 Heedzu ageena gidishin asay, “Ne na7aa maccasiya Timaara laymatada qanthatasu” yaagidi Yihudas odidosona.

Yihudi, “Iyo kare kessidi taman xuuggite” yaagis.

25 Iyo kare kessiya wode, “Taani qanthatiday ha miisheta godaasa. Ha maatameynne xam7ay oodebayeko eranaw danda7iko era” gada ba azina aawaka kiittasu.

26 Yihudi he miisheta eridi, “Taani ta na7aa Seelas iyo immaboonna gisho, taape iya xillo” yaagis. Hessafe guye, I iira zaaridi aqibeenna.

27 Iwu yelo qammi gakiya wode, I ulon mente nayti de7eysi eretis. 28 Iya maaretishin, entafe issoy ba kushiya kessin yelisiyara, “Haysi koyro keyis” gaanaw zo7o qacina ekada iya kushen qachasu. 29 Shin I ba kushiya guye ekida wode, iya ishay keyin iya, “Neeni waanada porxu gada keyadii?” yaagasu. Hessa gisho, Paaresa (Porxu gis) gada sunthasu. 30 Hessafe guye, iya kushiyan zo7o qacini de7iya iya ishay yeletis. Iya sunthay Zaara (Zo7o) geetetis.

<- Medhetetha Maxaafa 37Medhetetha Maxaafa 39 ->