1 Hessafe guye, Yayqoobi dendidi, bidi doloha bagga asa biitta gakis. 2 Yanka demba bessan haatha olla demmis. Heedzu dorsa wudeti he haatha olla matan de7oosona. Wude ubbay haathe uyey he ollafe. He haatha olla doona gordiya shuchay gita. 3 Dorsa wude ubbay yaa shiiqiko, wudiya heemmeysati haatha olla doonape he shucha gondorsidi wudiya haathe ushshoosona. Ushshi simmidi he shucha olla doonan zaari wothoosona.

4 Yayqoobi entako, “Hinte awupe yidetii?” yaagidi oychis.

Entika, “Nuuni Kaaranepe yida” yaagidosona.

5 I, “Nakoora na7a na7aa Laaba ereetii?” yaagidi oychis.

“Ee, iya eroos” yaagidosona.

6 Yayqoobi enta, “I lo77o de7ii?” yaagidi oychis.

“Ee, lo77o, iya na7iw Raheelo dorsata laaggada yaaro hini be7a” yaagidosona.

7 Yayqoobi entako, “Heko, ha7i awi dhoqan de7ees. Wude mehey soo simmiya wodey buroo gakibeenna, dorsa ushshi efidi heemmite” yaagis.

8 Shin enti, “Wude ubbay shiiqin shucha haatha olla doonape gondorsana gakanaw nu ushshanaw danda7oko. Hessafe guye, shucha gondorsidi dorsata ushshana” yaagidosona.

9 I buroo odishin, Laaba na7iya Raheela dorsata heemmiya gisho, ba aawa dorsata laagga ekada gakasu. 10 Yayqoobi ba aaye isha Laaba na7iw Raheelo Laaba dorsata laaggada yaaro be7ida wode bidi olla doonape shucha gondorsidi dorsata haathe ushshis. 11 Yayqoobi Raheelo yeeridi, ufaysan ba qaala dhoqu oothidi yeekis. 12 Yayqoobi, “Taani ne aawa miche Irbiqa na7a” yaagidi iw odis. Hessa gisho, iya woxa bada ba aawas odasu.

13 Laabi ba miche na7a Yayqooba yuussaa si7ida mela mokanaw woxidi bis. Iya idimi yeeridi ba soo efis. Yan Yayqoobi hanidaba ubba Laabas odis.

14 Laabi iya, “Neeni tuma ta ashonne ta suuthi” yaagis. Yayqoobi iyara issi ageena kumethi uttis. 15 Hessafe guye, Laabi Yayqooba, “Neeni taw dabbo gidida gisho, taw mela coo oothaneyee? Ane ta new ay qanxanaw koshshiyako taw oda” yaagis. 16 Laabas nam7u macca nayti de7oosona. Bayre sunthay Liya, kaaliya qassi Raheelo geetetawusu. 17 Liya ayfera cuuca, shin Raheela yegelsinne mala lo77o.

18 Yayqoobi Raheelo dosidi, “Taani ne kaalo na7e Raheeli gisho new laapun laythi oothana” yaagis.

19 Laabi, “Iyo hara asas immanaape new imoy lo77o, ne taara haysan de7a” yaagis. 20 Hessa gisho, Yayqoobi Raheelo ekanaw laapun laythi oothis. Shin I iyo daro dosiya gisho, iyaw guutha gallas daanis.

21 Hessafe guye, Yayqoobi, “Ta machiw taw imma, ta laythay wuris taani iyo ekanaw koyayis” yaagis. 22 Hessa gisho, Laabi asa ubba xeegidi yaagano kessis. 23 Shin sa7i qammin Laabi ba na7iw Liya efidi Yayqoobas immis. Yayqoobi iyo ekis. 24 Qassi Laabi ba aylliw Zalafa ba na7e Liyas aylle oothidi immis.

25 Sa7ay wontin I xeelliya wode, heko, Liya. Yayqoobi Laaba, “Haysi neeni ta bolla oothidaysi aybee? Taani new oothiday Raheeli gishosa gidenneyee? Tana ayis cimmadi” yaagis.

26 Laabi iyako, “Nu biittan bayriya de7ishin kaaliw azinas immeysi woga gidenna. 27 Mishiratethan iira saaminta ongiko, qassi kaaliwka taani new immana. Hessafe guye, hara laapun laythi taw oothaasa” yaagis.

28 Yayqoobi oda ma77idi saaminta iira ongis. Hessafe guye, Laabi ba na7iw Raheelo iyaw immis. 29 Qassi Laabi ba aylliw Baalo ba na7e Raheelis aylle oothidi immis. 30 Yayqoobi Raheeloka ekis. Raheelo Liyape aathidi dosis. Hara laapun laythi Laabas oothis.

31 Goday Liya Raheelitho dosetabonaro be7idi, iw yelo uluwa dooyis. Shin Raheela na7a yelonna gam7asu. 32 Liya qanthatada adde na7a yelasu. Iya, “Goday ta metuwa be7is, ha7i tana ta azinay dosana” gada he na7a Robeela[a] gada sunthasu.

33 Iya nam7antho qanthatada adde na7a yelasu. Iya, “Goday taani dosetabonaysa be7ida gisho, taw haysaka gujis” gada Simoona[b] gada sunthasu.

34 Iya heedzantho qanthatada adde na7a yelasu. Iya, “Taani iyaw heedzu adde nayta yelida gisho, ta azinay ha7i taara siiqon waaxetana” gada iya Leewe[c] gada sunthasu.

35 Iya hara qanthatada adde na7a yelasu. Iya, “Ha7i taani Godaa galatana” gada iya suntha Yihuda[d] gada unthasu. Hessafe guye, yelo eqasu.

<- Medhetetha Maxaafa 28Medhetetha Maxaafa 30 ->