1 Abrahaamey Mamire gita mithata garsan ba dunkaaniya pengen seeta gallas uttidashin Goday iyaw qoncis. 2 Abrahaamey dhoqu gidi xeelliya wode iya matan eqida heedzu asata be7is. I enta be7idi entara gahetanaw ba dunkaaniya pengefe dendidi entako woxi bidi enta sinthan ziggis. 3 Yaani simmidi, “Abeeti ta godaw, ta ne sinthan saba demmidaba gidiko tana ne aylliya aggada aadhofa. 4 Guutha haathi yiiko hinte tohoy meecetiko ha mitha kuyan shempi ekite. 5 Hinte taako hinte aylliyako yida gisho xaalidi hinte biya bessi baana mela taani hintew miyaba ehana” yaagis.

Entika, “Daro lo77o, ne gidaysada ootha” yaagidosona.

6 Abrahaamey ellesidi Saariko dunkaaniya giddo gelidi, “Ellesada heedzu gabate lo77o dhiille eka munuqada uythu uuka” yaagis. 7 Abrahaamey qassi ba meheta giddo woxi bidi lo77o buldubulda mara dooridi ba issi aylliyas immin I ellesidi shukidi giigisis. 8 Yaatidi Abrahaamey meqa maathinne giigisida mara ashuwa imathata sinthe aathis; enti mishin I mitha garsan enta matan eqis.

9 Enti Abrahaameko, “Ne machiya Saara awunee?” yaagidi oychidosona.

Ika, “Hini dunkaaniya giddona” yaagis.

10 Goday iyako, “Wonto laythi hannoode tuma ta neeko simmana; ne machiya Saara adde na7a yelana” yaagis.

Saara he wode iyape guye baggara de7iya dunkaaniya pengen eqada hessa si7awusu. 11 Abrahaameynne Saari banta laythan daro cimidosona. Saara na7a yeliya wodepe aadhasu. 12 Hessa gisho, Saara ba wozanan, “Taaninne ta goday nam7ayka cimidaape guye waanidi ha ufaysay hananee?” yaagada miicasu.

13 Goday Abrahaameko, “ ‘Taani cimidaape guye na7a yelane’ gada Saara ayis miicay? 14 Godaas danda7etonabay tuma de7iyee? Ta new gidaysada wonto laythi hannoode ta simmada yaana; he wode Saara adde na7a yelana” yaagis.

15 Saara yashetida gisho, “Taani miicabike” gada lahasu.

Shin I, “Ne tuma miicadasa” yaagis.

16 Asati baanaw dendishe Soodome duge xeellidosona. Abrahaamey entana moyzanaw entara keyis. 17 Xoossay iyako, “ta oothanaw haniyaba Abrahaamepe qosaneyee? 18 Abrahaamey tuma gitanne wolqaama kawotethi gidana. Ha biitta kawotethati ubbay iyan anjetana. 19 Xillotethinne suure pirda oothidi Godaa ogiya naagana mela ba naytanne iyape guyera yaa ba soo asaa zorana mela taani iya dooras. Hessika, Xoossay Abrahaames immana gida ufaysa polanaasa” yaagis.

20 Goday Abrahaameko, “Soodome bollanne Gamoora bolla waassiya waasoy daris; enta nagarayka daro deexis. 21 Hessa gisho, enta oosoy enta waasuwa meleko be7anaw taani duge wodhana; qassi hessa mela iita gidonaako shaaka erana” yaagis.

22 Hessafe guye, nam7u asati Soodomeko simmidi bidosona, shin Abrahaamey Godaa sinthan eqidasuwan de7ees. 23 Abrahaamey Godaako shiiqidi, “Tuma neeni xillota iitatara issife dhaysannee? 24 He katamen ishatamu xillo asati de7iko ne dhaysannee? Yan de7iya ishatamu xillo asata gisho he katama ashshikii? 25 Hessa mela oosoy neepe haako; xilluwa iitaara woli gathada wodheysi, xilluwanne iita issi ayfiyan xeeleysi neepe haako. Ha biitta ubba pirdiya neeni xillo pirdikii?” yaagis.

26 Goday, “Ta Soodomen ishatamu xillota demmiyako he bessa ubba enta gisho gada ashshana” yaagis.

27 Abrahaamey zaaridi, “Taani biittanne bido gidada ta Godaara odetanaw minetakichas; 28 ishatamu xillotape ichashati pacikochii? Neeni he ichashata gisho gada he katama ubba dhaysaneyee?” yaagis.

Goday, “Taani oytamanne ichashu xillota demmiko he katama dhaysike” yaagis.

29 Abrahaamey zaaridi, “Yan oytamu xalaali de7ikochii?” yaagis.

Ika, “Oytamata gisho gada he katama dhaysike” yaagis.

30 Qassika Abrahaamey zaaridi, “Hay ta Godaw, tana hanqetofa, taani gujadaka odetana. Hastamu xalaali de7ikochii?” yaagis.

Goday zaaridi, “Taani yan hastamu demmiko dhaysike” yaagis.

31 Abrahaamey, “Taani Godaara odetanaw minetakichas; ooni eri yan laatamu xalaali de7ikochi” yaagis.

Godayka, “He laatamata gisho gada dhaysike” yaagis.

32 Abrahaamey qassika, “Hay ta Godaw, tana hanqetofa ta issi toho odetana, yan tammu xalaala demmikochii?” yaagis.

Ika, “Tammata gisho gada taani he katama dhaysike” yaagis.

33 Goday Abrahaamera odetidi ongidaape guye bis; Abrahaameyka ba soo simmis.

<- Medhetetha Maxaafa 17Medhetetha Maxaafa 19 ->