Medhetetha Maxaafa 16

Aggaaronne Isma7eela

1 Abrame machiya Soora iyaw na7a yelabuuku. Shin iw Gibxefe yida Aggaaro geetetiya gadhindoy de7awusu. 2 Soora Abrameko, “Taani na7a yelonna mela Goday tana yelo diggis. Neeni bada ta ayllera aqa; taani I baggara na7a demmanekonne ooni eri” yaagasu. Abramey I qofa ekis. 3 Abramey Kanaane biittan tammu laythi de7idaape guye, iya machiya Soora Gibxefe yida ba aylliw Aggaaro ba azinaas macho oothada immasu. 4 Abramey Aggaaro ekis, iyaka qanthatasu. Iya baw qanthatidaysa erida wode ba godatiw kadhasu.

5 Soora Abrameko, “Ha qohuwas tana gathiday nena; taani ta aylliw new immin, iya qanthatidysa be7ada tana kadhawusu. Nebaanne tabaa Goday pirdo” yaagasu.

6 Abramey Soorako, “Hanno be7a ne aylliw iya ne kushena; nena lo77idaba ootha” yaagis. Hessafe guye, Soora Aggaaro un7ethin yaape keyada baqatasu.

7 Godaa kiitanchoy Aggaaro mela biittan, pulto haatha matan demmis; he pultoy shuura biitta efiya ogiya matan de7ees. 8 Kiitanchoy Aggaaro, “Soora ayllete, Aggaare, awupe yadii? Awu bay?” yaagidi oychis.

Aggaara zaarada, “Taani ta godate Soorape baqatas” yaagasu.

9 Godaa kiitanchoy iiko, “Ne godateko simma bada iw haareta” yaagidi odis. 10 Gujidika Godaa kiitanchoy iiko, “Ne yeletetha oonika taybanaw danda7onnaada oothada darsana” yaagis. 11 Qassika Godaa kiitanchoy iyo,

“Heko neeni qanthatadasa,

Neeni adde na7a yelana.

Xoossay ne waasuwa si7ida gisho

Iya neeni Isma7eela[a] gada sunthana

12 I bazzo hare mela gidana,

I ba qesiya asa ubba bolla denthana,

Qassi asa ubbayka banta qesiya iya bolla denthana.

I ba ishata ubbara ixon de7ana”

yaagis.

13 Aggaara baara odetida Godaa, “Neeni Tana Be7iya Xoossa” yaagada xeegasu. “Taani tana be7eysa be7as” yaagasu. 14 Hessafe dendoysan he pulto haathay, “Tana Be7iya De7o Xoossa Pultuwa” geetetidi xeegetis. He haatha pultoy Qaadesapenne Bareedape giddon de7ees. 15 Aggaara Abrames adde na7a yelasu; Abramey yeletida na7a Isma7eela gidi sunthis. 16 Aggaara Abrames Isma7eela yeliya wode Abrames laythi hospun tammanne usupuna.

<- Medhetetha Maxaafa 15 Medhetetha Maxaafa 17 ->