1 Ta ishato, issi asi nagaran kundiko, Ayyaanan de7iya hinte he uraa ashketethan suurisite. Shin neeni hessa melaban paacetonna mela nena naaga. 2 Issoy issuwa deexo toohuwa tookite. Yaatiko Kiristoosa higgiya poleeta. 3 Issi asi aykoyka baawashin, bana haratape lo77o gidi qopiko, I bana cimmees. 4 Shin issi issi asi ba oosuwa paaco. Hessafe guye, haratara bana gaaddeyeysa aggidi baw ceeqetiyaba demmees. 5 Issi issi asi ba toohuwa baw tookanaw bessees.

6 Xoossaa qaala tamaariya oonika lo77oba ubbaa ba astamaariyara shaaketees.

7 Hinte, hintena cimmofite. Asi ba zeridabaa zaaridi cakiya gisho Xoossaa bolla qelqisopite. 8 Ba asho amuwa kunthanaw zeriya oonika, ba asho amuwape hayqo buucana. Shin Ayyaana ufaysanaw zeriya oonika Ayyaanape merinaa de7o cakana. 9 Ane lo77o ooso oothanaw azalleysa aggoos. Nuuni azallonna ixiko wodey gakiya wode nu zeridaysa cakana. 10 Nu inje wode demmiko, asa ubbaas, aathidika ammaniya asaas lo77oba oothoos.

11 Taani ta kushen, ay mela gita pidalen hintew xaafidaako be7ite. 12 Asa sinthan lo77o gididi bentanaw koyiya asati hinte qaxaretana mela koyoosona. Shin hessa enti oothey, Kiristoosa masqaliya gisho entana goodi gakonna melasa. 13 Enti hinte qaxaretethan ceeqetanaw koyidi hintena qaxareto goosonape attishin, qaxaretidaysatika banta huuphen higgiya naagokona.

14 Shin alamey taw kaqetidaysafenne taanika alamiyas kaqetida, Godaa Yesuus Kiristoosa masqaliyape attishin, hara ceeqoy taape haako. 15 Hiza, qaxaretin qaxaretonna aggin aykoka maaddenna. Maaddey ooratha medhetethi gido. 16 Ha wogaa kaalliya ubbaasinne Xoossaa dere gidida Isra7eeles sarotethinne maarotethi gido.

17 Taani Yesuusas madunxida beeta ta asatethan tookida gisho, hizape tana oonika waaysopo.

18 Ta ishato, nu Godaa Yesuus Kiristoosa aadho keehatethay hintera gido. Amin7i.

<- Galatiya Kiita 5