Galatiya Kiita 4

1 Ta geysi haysa. Laattey na7aa gidi de7ishe, shalo ubbay iyabaa gidikoka, I ayllefe aykoka dummatenna. 2 Shin iya aaway gida wodey gakanaw I hadara ekidaysata kusheninne naageysata kushen de7ees. 3 Hessadaka, nuuni na7atethan de7iya wode alamiya wogaas aylletidi de7ida. 4 Shin wodey gakida wode Xoossay higgefe garsan, maccasape yeletida ba na7aa kiittis. 5 I hessa oothiday, higges haaretidi de7eyisata wozanawunne nuna ba nayta oothanaasa.[a]

6 Nu Xoossaa nayta gidiya gisho, “Abbaa, Aawaw” gidi xeegiya ba Na7aa Ayyaana nu wozanaa giddo kiittis. 7 Hessa gisho, hizape neeni Xoossaa na7ape attishin, aylle gidaka. Neeni iya na7a gidiko, Xoossaa laatteysa gidadasa.

Phawuloosi Galatiya Asaas Qopees

8 Hinte kase Xoossaa eronna wode xoosse gidonaysatas aylle gididi haaretideta. 9 Shin ha77i hinte Xoossaa erideta; ubbaraka Xoossan eretideta. Yaatin pathonnanne go77onna alame wogatako guye waanidi simmetii? Wodhi eqidi, waanidi entaw aylle gidanaw koyeetii? 10 Dumma gidida gallasata, ageenata, wodetanne laythata hinte loythi boncheta. 11 Tana hintebay yashshees; ta hintew coo daaburadinasha?

12 Ta ishato, ta hinteda hanida gisho, hinteka taada hanite gada hintena woossayis. Hinte tana aybinka qohibeeketa. 13 Taani koyro hargetashe hintew Wongela odidaysa hinte ereeta. 14 Ta hargey hintew paace gidikoka, tana saletibeketa; ixibeketa. Shin tana Xoossaa kiitancho woyko Kiristoos Yesuusa mokeysada mokideta.

15 Yaatin, he hintew de7iya ufaysay ubbay aw bidee? Hintew danda7etidaako, hinte taw, hinte ayfiya kessidi immiyako ixonnaysa ta markatayis. 16 Yaatin, ta hintew tuma odida gisho hintew morke gidadinaayee?

17 He asati hintena bantako zaaranaw koyoosona, shin enta qofay lo77osa gidenna. Enta qofay hintena shaakanaasanne hinte entaw qopana mela oothanaasa. 18 Lo77oba oothanaw amotiko lo77o, shin hessi ta hintera de7iya wode xalaala gidonashin ubba wode gido.

19 Ta siiqo nayto, Kiristoosi hintenan misiletana gakanaw maccasi yelos iqeteysada ta hinte gisho iqetayis. 20 Hintebay taw haddin ta un7etas; ha77i hinte giddon ta bentada shenetada odiyako ay mela dosaynashin.

Aggaaronne Saaro

21 Muse higgen haaretidi daanaw koyeysato, ane taw odite; higgey ay giyako ereketii? 22 Geeshsha Maxaafay, “Abrahaames gadhindefenne godatefe yeletida nam7u nayti de7oosona” yaagees.[b] 23 Gadhinde na7ay asi na7a yeliya maaran yeletis, shin godate na7ay Xoossaa ufaysa qaalan yeletis.

24 Ha maccasati nam7u caaqotas leemiso gididi eketoosona. Entafe issinniya, Siina zumaape yidaara, ba nayta aylletethas yelasu; iyaka Aggaaro. 25 Aggaara Arabe biittan de7iya Siina zuman leemisetada ha77i de7iya Yerusalaame daanawusu. Ayis giiko, iya ba naytara aylletethan de7awusu. 26 Shin salon de7iya Yerusalaamey aylletethan de7uku; iya nu ubbaas aayo. 27 Geeshsha Maxaafay,

“Naatte, yelonna maynthete ufayta;

naate iqeta eronnaare ilila.

Azinara de7iya maccaseepe,

azini bayna maccasees nayti daro” yaagees.[c]

28 Ta ishato, hinte Yisaaqada Xoossaa ufaysa qaalan yeletida nayta. 29 Shin he wode asa maarada yeletidaysi, Ayyaana wolqan yeletidaysa goodis. Hachika hessa mela.[d] 30 Shin Geeshsha Maxaafay woygii? “Gadhinde na7ay godate na7aara issife laattonna gisho, aylliw I na7aara wolla kessa yedda” yaagees.[e] 31 Hessa gisho, ta ishato, nuuni godate naytape attishin, gadhinde nayta gidoko.

<- Galatiya Kiita 3 Galatiya Kiita 5 ->