Izira Maxaafa
Gaatha Qofa
Izira maxaafay, Ayhudetape di7etidi bida guutha asati Babiloonepe simmidaysanne Yerusalaamen de7oynne goyinno wogay ooraxidaysa odees. Ha hanotati kaallidi de7iya kesotan qoncidosona.
1. Farse kawa Qiroosa shenen koyro Ayhudeti di7ope simmidosona.
2. Xoossa keethay zaari keexetidi anjetis; Xoossa goyinno wogay zaaridi doometis.
3. Daro laythafe guye, Xoossa higge astamaare gidida Iziri kaalethin, hara Ayhudeti Yerusalaame simmidosona. Iziri, Isra7eele asay ammano de7uwanne issifetetha duussaa zaarana mela maaddidi, enta ayyaana de7uwanne sa7a duussa zaaridi minthis.
Izira maxaafay nam7u kifilen shaaketees.
1. Shempo 1—6 gakanaw de7iya kifiley, Yihuda asay K.Y.S. 538 laythan Yerusalaame simmidaysanne goyinno woga essidaysa odees.
2. Shempo 7—10 gakanaw de7iya kifiley, daro laythafe guye Iziri asaa tamaarsanaw Yerusalaame yidaysa odees.
Maxaafa Ayfe Qofata
Ayhude asaa di7ope simuwa (1:1—2:70)
Xoossa Keethay zaaridi keexo doometethi (3:1—4:6)
Yerusalaame zaari keexo bolla medhetida metuwa (4:6-23)
Xoossa Keetha oosuwa wursethaa (4:24—6:22)
Iziri asaa kaalethidi Yerusalaame ehuwa (7:1—8:36)
Allaga maccasata ekida addeti banta macheta yeduwa (9:1—10:44)

Qiroosa Awaajuwa

1 Farse kawoy Qiroosi kawotida koyro laythan, nabiya Ermiyaasa baggara Goday odidaba polis. Farse kawoy Qiroosi ba kawotethaa giddon haysada yaagidi awaajana melanne he awaajuwa xaafidi wothana mela Goday iya wozana denthethis. 2 Farse kawoy Qiroosi haysada yaagees; “Goday, salo Xoossay ha sa7aa kawotethata ubbaa taw immis. Qassi Yihudan de7iya Yerusalaamen iyaw keethe keexana mela tana shuumis. 3 Xoossa asi gidida oonika yaa boo; iya Xoossay iyara gido! Hinte Yihudan de7iya Yerusalaame bidi, yan Yerusalaamen Godaa, Isra7eele Xoossaa keethaa zaaridi keexo. 4 Dumma dumma biittan de7iya asa ubbay Ayhudetape attidaysati bira, worqa, dumma dumma miishetanne mehe immidi maaddo; qassi Yerusalaamen de7iya Xoossaa keethaa banta dosan immiya imota bolla gujidi immo” yaagees.

5 Hessafe guye, Yihudanne Biniyaame koche halaqati, kahinetinne Leeweti, qassi Xoossay enta wozanaa denthethida ubbay Yerusalaamen Godaa Xoossaa keethaa keexanaw baanaw dendidosona. 6 Qassi enta shooron de7eysatika banta dosan immidaba bolla gujidi, birapenne worqafe oosetida miisheta, hara dumma dumma miishetanne mehe immidi, enta maaddidosona. 7 Hessa bolla kawoy Qiroosi Nabukadanaxoori Yerusalaamepe efidi ba eeqa keethan wothida Godaa keethaa miisheta immis. 8 Farse kawoy Qiroosi miisheta wothiya keetha halaqaa Mitirdaaxu taybisidi, Yihuda haariya Sesabisaara kushen wothis. 9 Simmida miisheta tayboy haysa; hastamu worqa shaate, mukulu bira shaate, laatamanne uddufun pil7o, 10 hastamu worqaa kere, oyddu xeetanne tammu bira kere mukulu hara dumma dumma miishe. 11 Worqa miishetanne bira miisheta tayboy kumethi ichashu mukulunne oyddu xeeta; Seesabisari Babiloonepe Yerusalaame simmiya wode di7ope simmida asaara ekidi yis.

Izira Maxaafa 2 ->