1 Hessafe guye, “Katamaa seeranaw dooretida asati, ola miishe banta kushen oykidi haa yoosona” yaagidi waassishin taani si7as. 2 Heko, wodhiya ola miishe banta kushen oykida usupun asati, Pudeha baggan de7iya qommo pengiyafe yidosona. Entara issife liinope oosetida ma7o ma7idi, ba miyen xaafiyabaa korojon oykida issi asi de7ees. Enti giddo gelidi, naase biratape oosetida yarsho bessa matan eqidosona.

3 Isra7eele Xoossaa bonchoy ba de7iya kiruubetape dendidi, Xoossaa keetha penge bis. Goday liino ma7idi, ba miyen xaafiyabaa korojon oykida addiya xeegidi, 4 “Yerusalaame katamaa giddo kanthada bashe, yan oosetiya ixetida eeqa goyinnuwa gisho azzanishenne oolishe de7iya asaa som7on malla wotha” yaagis.

5 Ta si7ishin, Xoossay haratako haysada yaagis: “Iya geedo kaallidi, katamaa giddo kanthidi wodhite. Issuwaka maaropite; oodeska qadhetofite. 6 Cimata, panthata, geela7ota, maccasatanne nayta ubbaa shukite; shin som7on malli de7iya ase oonaka bochofite. Ta keethan wodho doomite” yaagis. Enti Xoossaa keetha sinthan eqida cimatan wodho doomidosona. 7 Xoossay, “Bidi Xoossaa keetha tunisite; dabaabata ahan kunthite” yaagis. Enti keyidi, katamaa giddo ubban wodho doomidosona.

8 Enti wodhishin, taani tarka attada, ta som7uwara biittan gufannada, ta qaala dhoqu oothada, “Abeeti Ubbaa Haariya Godaw, neeni Yerusalaame bolla gussiya ne hanquwan Isra7eelepe attidaysata kumethi dhaysanee?” yaagas.

9 I zaaridi, “Isra7eelenne Yihuda asaa nagaray daro; biitta ubbay suuthan kumis. Katama ubban suure pirdi baawa. Asay, ‘Goday ha biitta aggis; Goday be7enna’ yaagosona. 10 Hessa gisho, ta entaw qadhetike; entana maarike. Taani enta ogiya mela entaw zaarana” yaagis.

11 Hessafe guye, liino ma7idi, ba miyen xaafiyabaa korojon oykida addey, guye simmidi, “Ne tana kiittidaysada oothas” yaagis.

<- Hizqeela Maxaafa 8Hizqeela Maxaafa 10 ->