1 “Biittaa laattanaw hinte saaman shaakiya wode he biittafe issi saamaa Godaas dummayite. Hessika tammanne nam7u kilo mitirenne bagga aduqiyanne tammu kilo mitire dalgiya besse gido. He bessay ubbay geeshsha besse gido. 2 He bessaafe oyddu maazane de7iya adussatethaynne dalgatethay issi gina gidiya ichashu xeetu wadha, bessi Xoossa keethaas teqeto; iya yuushon ishatamu wadha gidida kaysa bessi de7o. 3 He Godaas dummayida bessaafe adusatethay tammanne nam7u kilo mitirenne bagga, gompay ichashu kilo mitire gidida besse wadhada shaaka. He bessay Ubbaafe geeshsha bessay de7iya Xoossa Keethas, gididi de7o. 4 Hessi Xoossa keetha giddon Godaas haggaazanaw, iyako shiiqiya kahinetas dummatida geeshsha bessi gido. Hessi kahineta keethaynne Xoossa keethay keexetiya besse gido. 5 Qassi attida tammanne nam7u kilo mitire bagga aduqiyanne ichashu kilo mitire bagga dalgiya bessay Xoossaa keethan oothiya Leewetas laata gido; enti bantaw duussa katamata yan keexo.

6 “Godaas dummayida bessaa matan tammanne nam7u kilo mitirenne bagga aduqiyanne nam7u kilo mitirenne bagga dalgiya bessay katamaa keexanaw de7o; he bessay Isra7eele asa ubbaas gido. 7 Isra7eele halaqaas imetida gishoy nam7u baggara Godaas dummayida bessaaninne katamaa bessan zawatees. I wuloha baggara Medetiraane Abbaa gakees; doloha baggara Isra7eele biitta zawa gakees. Iya adussatethay Isra7eele kochaafe issuwa gishuwada wuloha bagga zawape bidi, doloha bagga zawa gakees. 8 He gishoy Isra7eele halaqaas laata gade gido. Hizape guye ta halaqati ta asaa un7ethofo; enti Isra7eele asa ubbay ba kochan kochan biitta ekanaada oothonna” yaagees.

9 Ubbaa Haariya Goday haysada yaagees; “Hinteno, Isra7eele halaqato, hintew ha77i gidana! Buqethinne asaa un7etho aggite; suure pirdite; xillotethi oothite. Ta asaa enta laata biittafe shoddidi gooddeysa aggite. Haysa odey tana Ubbaa Haariya Godaa. 10 Hintew issuwas issuwas like mizaaneynne maka miishey de7o. 11 Maka miishe ubbaas giddo gidiya gomare geetetiya maka miishe gido. Melaba makiya ifa geetetiya miisheynne gukiyaba makiya baate geetetiya miishey issi like gido. Hessa guussay, issi gomerey tammu ifaranne tammu baatera issi gina gidees. 12 Guuthaba makiya wode hinte maka miishey saqile gido. Laatamu geeri issi saqile gido; usupun tammu saqiley issi minaane gido.

13 “Hinte imuwa immishe haysada immite. Hinte shiishiya gistefe usupun tammaafe issi kushe, bangafe usupun tammaafe issi kushe gido. 14 Shamaho zaytiyape xeetape issi kushe immite. Hessa makiya wode ne makiya miishey baate gido. Tammu baatey issi gomare woyko issi Qoore gidees. 15 Isra7eele asay heemmiya nam7u xeetu mehepe de7iya issi wudiyape issi issi mehe immite. Hessi asaa nagara atotethas yarshetiya, katha yarshora, xuussa yarshoranne issifetetha yarshora shiiqana” yaagees Ubbaa Haariya Goday. 16 Biittan de7iya asa ubbay hessa ubbaa Isra7eele halaqaas immo. 17 Halaqay oothiya oosoy, Isra7eele asay bonchiya ba7aaletan, ageena xeeron Sambaatata gallasan, xuussa yarsho, katha yarshonne ushsha yarsho shiisho. Isra7eele asaa nagara atotethas nagara yarsho, katha yarsho, xuussa yarshonne issifetetha yarsho koshshiyaba immo.

18 Ubbaa Haariya Goday haysada yaagees: “Koyro ageenan, koyro gallasan borey bayna issi wofaano Xoossa keethaa geeshshanaw shiisha. 19 Kahiney nagaraa yarsho suuthaafe ekidi, Xoossaa keetha penge xangeta, yarsho bessa yuushon de7iya dethan de7iya oyddu maazanetanne giddo dabaaba efiya dirsa penge xangeta tiyo. 20 Oonika qoponna woyko eronna oothida nagara atotethas, he ageenan laapuntho gallas hessada ootha. Yaatada Xoossa keetha geeshsha.

21 “Koyro ageenan, tammanne oyddantho gallas Paasika Ba7aale bonchite; laapun gallas gakanaw, irshoy bayna uythi miite. 22 Koyro gallas halaqay ba gishonne ba asaa gisho nagara yarsho oothidi issi kormaa shiisho. 23 He ba7aaley bonchetiya laapun gallasatan gallas gallas borey bayna laapun kormatanne laapun maraze dorsi xuussa yarsho oothidi, Godaas shiisho. Hessara gathidi nagara yarshos gallas gallas issi deesha kole shiisho. 24 Issi issi kormanne maraze yarshiya wode, katha yarshos tammane laapun kilo giraame gistenne heedzu litiro zayte shiisho.

25 “Laapuntho ageenan, tammanne ichashantho gallasan doomiya laapun gallasa ba7aale wode nagara yarsho, xuussa yarsho, katha yarshonne zayte kaseysafe dummayonna halaqay shiisho” yaagees.

<- Hizqeela Maxaafa 44Hizqeela Maxaafa 46 ->