1 Godaa kushey ta bolla de7ees; iya Ayyaanay tana meqethi kumida zangaaran wothis. 2 I tana enta giddon yaanne haanne yuushshis; ta hinchi gidi melida daro meqethata zangaara giddon be7as. 3 I, “Asa na7aw, ha meqethati zaaridi, shempora daanaw danda7oona?” yaagis.

Taani, “Ubbaa Haariya Godaw, haysa ne eraasa” yaagas.

4 I taako, “Ha meqethatas haysada yaagada tinbite oda; hinteno, melida meqethato, Godaa qaala si7ite. 5 Ubbaa Haariya Goday ha meqethatako haysada yaagees: ‘Taani shempo hinte giddo gelsana; zaaridi hinte de7on daana. 6 Ta hinte bolla shaya wothana; hintena asho mayzana; hintena gogan kammana. Hinte de7on daana mela ta hinte giddo shempo gelsana. He wode hinte taani Godaa gideysa erana’ ” yaagees.

7 I tana kiittidaysada tinbite odas; ta tinbite odo doomiya wode girsi si7etis; meqethati shiiqidi, ba bessan bessan oyketidosona. 8 Ta xeelliya wode, enta bolla shayi de7ees; ashoy enta bolla bentis; galba ma7idosona; shin shempoy enta giddon deenna.

9 I taako, “Asa na7aw, carkuwas tinbite oda; neno, carkuwaw, oyddu baggafe haa ya; enti de7on daana mela ha hayqidaysata bolla shempo punna” yaagis. 10 I tana kiittidaysada tinbite odas; shempoy enta giddo gelis; de7o demmidosona; enti daro olancho gididi banta tohon eqidosona.

11 I taako, “Asa na7aw, ha meqethati Isra7eele asaa leemiso; Isra7eele asay, ‘Nu meqethati melidosona; nu ufaysay dhayis; nubay kumethi halis’ yaagosona. 12 Hessa gisho, entaw haysada yaagada tinbite oda; ‘Hinteno, ta asaw, taani hinte duufuwa dooyana; hintena yaape kessana; ta hintena zaarada, Isra7eele biitta ehana. 13 Ta asaw, ta hinte duufuwa dooyiya wodenne hintena kessiya wode, ta Godaa gideysa hinte erana. 14 Taani ta Ayyaana hinte giddon wothana; hinte de7on daana. Taani hintena, hinte biittan wothana. He wode taani Goday odidaysanne oothidaysa hinte erana’ ” yaagees Ubbaa Haariya Goday.

15 Zaaridi Godaa qaalay haysada yaagishe taako yis: 16 “Asa na7aw, issi mitha xam7a ekada, iya bolla, ‘Haysi Yihudasinne iyara de7iya Isra7eele asaasa’ yaagada xaafa. Qassi hara xam7a ekada, iya bolla, ‘Haysi Efreema; Yoosefanne iyara de7iya Isra7eele asaasa’ yaagada xaafa. 17 Hessafe guye, enti ne kushen issi xam7a gidana mela nam7a issife gathada oyka. 18 Ne biitta asay neeko, ‘Haysi ne ootheysi aybee? Nuus birshethaa oda’ yaagidi oychiko, 19 Ubbaa Haariya Goday haysada yaagees gada oda: taani Efreema kushen de7iya Yoosefa xam7anne iyara de7iya Isra7eele kochata ekanaw hanayis; enta nam7aa issi xam7a oothanaw, Yihuda xam7ara gathana. Enti nam7ay ta kushen isso gidana” yaagees Ubbaa Haariya Goday yaagada oda.

20 “He ne enta bolla xaafida nam7u xam7ata enta sinthan oykada, 21 Ubbaa Haariya Goday haysada yaagees gada oda. Taani Isra7eele asaa enti laaletida kawotethata giddofe kessana; ta enta shiishada, enta biitta zaarada ehana. 22 Isra7eele dereta bollanne enta biittan ta enta issi kawotethi oothana; enta ubbaa bolla issi kawo kawothana. Qassi enti zaaridi nam7u biitta gidokona; nam7u kawotethi gididi shaaketokona. 23 Hizape guye, enti banta eeqatan, banta ixetidabataninne banta nagara ubban bantana tunisokona. Taani enta kundida bessaafe denthada nagara ubbaafe geeshshana. Enti ta ase gidana; taka entaw Xoosse gidana.

24 “Ta aylley Dawiti enta kawo gidana; entaw ubbaas issi henthancho xalaali daana. Enti ta higgiya kaallana; ta wogaa minthidi naagana. 25 Taani ta aylliya Yayqoobas immidanne enta mayzati de7ida biittan enti daana. He biittan enti, enta naytinne enta nayta nayti merinaw daana; ta aylley Dawiti enta bolla merinaw kawo gidana. 26 Ta entara sarotetha caaqo caaqana; he caaqoy merinaa caaqo gidana. Taani enta minthada essana; enta taybuwa darsana; ta keethaa merinaw enta giddon wothana. 27 Taani yan entara daana; entaw Xoosse gidana; enti ta ase gidana. 28 Xoossa keethay enta giddon merinaw de7iya wode, Isra7eele geeshshey tani, Godaa gideysa kawotethati erana” yaagis.

<- Hizqeela Maxaafa 36Hizqeela Maxaafa 38 ->