Hizqeela Maxaafa 31

Libaanose Ziga Leemiso

1 Nuuni di7etida tammanne issintho laythan, heedzantho ageenan, koyro gallasan, Godaa qaalay haysada yaagishe taako yis. 2 “Asa na7aw, Gibxe kawasinne asa ubbaas haysada yaagada oda: ‘Ne gitatetha ta oodera gaaddeyo?’ ”

3 Ne lo77o daashsha kuyay de7iya Libaanose ziga mela;

I diccis; iya xeeray shaara gakis.

4 Yan iya dichiya haathi de7ees;

pulto ciimmoti iya dichidosona.

Shaafati goggidi iya yuushuwa irxisidosona;

pultoti mithay doliya bessa ubbaa ushshoosona.

5 He mithay woran de7iya mitha ubbaafe aduqis;

iya daashshay daris; tashey aduqis;

haathi darida gisho ordis.

6 Salo kafoti iya daashshan banta keethaa keexidosona;

bazzo do7ati iya kuya garsan na7a yelidosona;

gita kawotethati ubbay iya kuyan shempoosona.

7 Ba xaphuwa ciimmo haathan duge yeddida gisho

he mithay ba daashsha tashiyara waanidi lo77i!

8 Hari attoshin Xoossa gannatiyan he zigaara giniya zigi baawa;

iya mela daashshi de7iya xiiddika baawa.

Hessa mela ocha mithi,

Xoossa gannatiyan hessa mela lo77o mithi baawa.

9 Taani iya daro daashshan puulayas;

Edene geetetiya Xoossa gannatiyan de7iya mithati ubbay iya qanaatoosona.

10 Hessa gisho, Ubbaa Haariya Goday haysada yaagees: “He mithay aduqidi diccida gisho, iya xeeray shaara gakida gishonne I ba geesan otortida gisho, 11 ta iya yegga aggas; wolqaama, allaga kawas aathada immas. He kawoy iya iitatethaa mela iya bolla oothana. 12 Wozana mino allagati he mitha qanxidi yeggana; qanxida tasheti deretan, ollataninne zangaaratan yegetidi attana. Iya kuyan shempiya kawotethati ubbay he bessaa aggidi baana. 13 Salo kafoti yidi kundida mithaa bolla uttana; bazzo do7ati iya tasheta yedhana. 14 Haatha matan dicciya mithata giddon iya mela aduqidi, xeeray shaara gakiya mithi deenna. Hayqiya asa bolla gakiya hayqo pirday he mithaa bolla gakana; I duufon de7eysatara gidana” yaagees.

15 Ubbaa Haariya Goday haysada yaagees: “He mithay duufo geliya gallas ciimmo pulto haathati iyaw kayotana mela oothana. He pulto haathay goggonna mela oothana; Libaanosey iya gisho azzanana mela oothana; wora mitha ubbay shullana. 16 Ta he mithaa duufon holiya wode, iya kundethaa girsan kawotetha ubbay qaaxana. Kundidi duufon gelida Edene mithatinne haathe uyidi ordida lo77o Libaanose mithati ubbay iya kundethan mintena. 17 Kawotethata giddon iyara issifidaysatinne iya kuyan de7iya ubbay kase mashshan hayqidaysatara gahetanaw iyara issife duufo gelana. 18 Edene gannatiyan de7iya mithata giddon hessa mela gitinne lo77oy baawa. Shin ha77i Edene mithatada ika hayqidi duufon gelees; yan I mashshan hayqida ammanonaysatara gahetana.

“He mithay Gibxe kawaanne iya asaa leemiso” yaagees Ubbaa Haariya Goday.

<- Hizqeela Maxaafa 30 Hizqeela Maxaafa 32 ->