1 Nuuni di7etida tammanne issantho laythan, ageena koyro gallasan, Godaa qaalay haysada yaagishe taako yis. 2 “Asa na7aw, Xiroosa asay ufaytishe, ‘Hashshu! Yerusalaamey kundis; iya pengey waggi gidi dooyetis. I laaletidi dooyetida gisho hizape guye nu duretana’ yaagosona. 3 Hessa gisho, Ubbaa Haariya Goday haysada yaagees; ‘Neno, Xiroosa, taani new morke. Abba zuley dendeysada taani daro kawotethata ne bolla ehana. 4 Enti ne dirsa gimbiya laallana; ne gimbe shakota menthana. Ta nena biitta ubbaa quchidi efin, kallo de7iya zaalla oothana. 5 Neeni abba giddon asay banta molo gitiya melisanaw micciya bessi gidana. Hara kawotethati Xiroosa bonqana. 6 Waanna biittan de7iya gutata mashshan wursana. Taani Godaa gideysa enti he wode erana’ yaagees Ubbaa Haariya Goday.

7 “Ubbaa Haariya Goday haysada yaagees: ‘Xiroosa bolla ola denthana mela kawota kawo gidida Babiloone kawa Nabukadanaxoora, paratara, para gaaretaranne daro olanchotara pudeha baggafe ehana. 8 Enti waanna biittan de7iya gutata mashshan wursana. Enti nena teqidi, ne dirsa gimbiya gathidi, biitta doorana; banta gondalliya ne bolla denthana. 9 Dirsa gimbeta dom7idi laaliya miishen ne dirsa gimbiya mentherethana; banta ola miishen ne adussa gimbeta laallana. 10 Iya parati daro gidiya gisho, enti denthiya baanay nena kammana. Paratinne parata gaareti laaletida katamaa dirsa pengiyara geliya wode enti sissiya garmamoy ne dirsa gimbiya qaathana. 11 Enta parati ogeta ubbaa yedhana. Ne asaa mashshan wursana; ne wolqaama tuussati sa7an kundana. 12 Ne shaloy di7etana; ne zal7iya miisheti bonqetana. Ne dirsa gimbetanne ne lo77o keethata ubbaa dhaysana; ne shuchata, ne sanqaanne laaletida ubbaa efidi abban yeggana. 13 Ne mal7o yetha ta teqana; ne diitha girsay zaari si7etenna. 14 Ta nena kallo de7iya zaalla oothana; neeni asay banta molo gitiya micciya bessi gidana. Taani Goday haysa odida gisho, neeni zaarada keexetaka’ ” yaagees Ubbaa Haariya Goday.

15 “Ubbaa Haariya Goday Xiroosa katamaako haysada yaagees: ‘Ne morketi ne bolla dendiya wode yuushoy abban teqetida biittan de7iya asay, ne goyretiya wode waassiya waasuwa si7idi, yashshan kokorana. 16 Abbaa doonan de7iya haareysati banta araatape wodhana. Banta boncho ma7uwanne alleeqetidi oosetida ma7uwa qaaridi yashshan kokorishe biittan uttana. Ne bolla gakida metuwa qopidi, enti daro dagammana; enti ubba wode kokorishe daana.’ 17 Enti new haysada yaagidi zelelsi kessana: