1 Isra7eele cimatape issoti issoti taako yidi, ta sinthan uttidosona. 2 Godaa qaalay haysada yaagishe taako yis. 3 “Asa na7aw, ha asati banta wozanan eeqa essidosona; enta nagaray entaw dhube shuchi gidis. Yaatin, enti tana oychana mela oothoyee?” 4 Ne entaw Ubbaa Haariya Goday haysada yaagees gada oda; “Isra7eele asaape oonika eeqa ba wozanan wothidi, iya nagaray iyaw dhube shuchu gidin, nabe oychanaw biiko, taani ta huuphen iya eeqata darotethaada iyaw zaarana. 5 He eeqati Isra7eele asaa taape haassidosona; shin ha77i ta entaw immiya zaaruwan enta wozanaa taako zaarana” yaagees.

6 “Hessa gisho, Isra7eele asaas haysada yaagada oda. Ubbaa Haariya Goday haysada yaagees; nagara paaxite; hinte eeqa aggite; hinte tuna ooso ubbaafe simmite.

7 “Isra7eele asaa gidin woyko Isra7eele biittan de7iya allaga biitta asaa gidin, taape haakidi, ba wozanan eeqa wothidi, iya nagaray iyaw dhube shuchu gidin, tana zore oychanaw nabeko biiko, taani Goday ta huuphen iyaw zaaro immana. 8 Taani he uraa morkana; ta iya asa malasinne miichas ashshana; taani iya ta asaa giddofe dhaysana; ta Godaa gideysa hinte he wode erana. 9 Issi nabey cimetidi tinbite odiko, he nabey odana mela cimmiday tana Godaa. Taani iya bolla ta kushiya wothada, ta asaa giddofe iya dhaysana. 10 Enti banta nagara seera tookana; nabeynne nabiya oycheysi issi gina seeretana. 11 Hizape guye Isra7eele asay oge baletidi taape haakenna; banta nagaran bantana tunisokona. Enti ta ase gidana; taanika enta Xoossaa gidana” yaagees Ubbaa Haariya Goday.

12 Godaa qaalay haysada yaagishe taako yis: 13 “Asa na7aw, issi biitta asay nagara oothidi, taw ammanetona ixiko, taani ta kushiya denthada, enta kathaa dhaysada, kosha ehana; asaanne mehiya wodhana. 14 Hari attoshin ha heedzu asati Nohey, Daanelinne Iyyobi he biittan de7iyakoka, enti banta xillotethan banta shempuwa xalaala ashshana” yaagees Ubbaa Haariya Goday.

15 “Taani enta biitta bolla wora do7ata yeddada, he biittay asi baynanne oonika kanthonna mela he biitta baysa oothana. 16 Taani Ubbaa Haariya Goday ta de7uwan caaqas. Hari attoshin, ha heedzu asati he biittan de7iyakoka, enti banta nayta ashshanaw danda7okona. Enti bantaw attana; shin biittay baysa gidana” yaagees Ubbaa Haariya Goday.

17 “Taani he biitta bolla toora yeddada, yan de7iya asaanne mehiya wodhiko, 18 taani Ubbaa Haariya Goday ta de7uwan caaqas. Ha heedzu asati he biittan de7iyakoka, banta nayta ashshanaw danda7okona. Enti bantaw attana” yaagees Goday.

19 “Taani he biitta bolla iita harge yeddada, ta hanquwan suuthi gukana mela oothiko, yan de7iya asaanne mehiya wodhiko, 20 taani Ubbaa Haariya Goday ta de7uwan caaqas. Hari attoshin, Nohey, Daanelinne Iyyobi he biittan de7iyakoka, enti banta xillotethan banta shempuwa ashshanaape attishin, banta nayta ashshokona” yaagees Ubbaa Haariya Goday.

21 Ubbaa Haariya Goday haysada yaagees; “Taani asaanne mehiya wodhanaw Yerusalaame bolla oyddu iita pirdata: toora, kosha, wora do7atanne harge yeddana. 22 Gidoshin, attidi keyida guutha asati; macca naytinne adde nayti yaape keyana. Enti hinteko yaa wode enta hanotaanne enta oosuwa hinte be7idi, ta Yerusalaame bolla ehida gadoy like gideysa akeekana. 23 Hinte enta hanotaanne enta oosuwa be7idi, ta enta bolla coo pirdonnaysa erana” yaagees Ubbaa Haariya Goday.

<- Hizqeela Maxaafa 13Hizqeela Maxaafa 15 ->