1 “Ne ishaa Aaronanne iya nayta Nadaaba, Abyooda, Alaazaranne Itamaara neeko xeega. Enti kahine gididi taw haggaazana mela Isra7eele asaa giddofe enta dummaya. 2 Iyaw bonchonne teema immana mela ne ishaa Aaronas boncho ma7ota giigisa. 3 Aaroni kahinetethan dummatidi taw haggaazanaada, taani hiillatethi immida oosanchota ubbaa xeegada, Aaronas ma7ota giigisana mela oda. 4 Enti giigisana ma7otika haysata; tiran ma7etiya ma7o, efuude, adussa qamise, alleeqetidi dadetida shamize, qacenne danco. Ne ishay Aaroninne iya nayti kahine gididi taw haggaazishe ma7ana mela geeshsha ma7ota entaw giigiso. 5 Kushe hiillanchoti he ma7ota worqa cachafe, kaalosepe, ocha teera daaneysafe zo7o qacinapenne al7o liinope giigiso.

15 “Godaa sheniya oychidi eranaw, tiran ma7etiya ma7uwa kushe hiillanchon oosisa. He tiran ma7etiya ma7uwa worqa cacha qacinape, kaalosepe, ocha teera daaneysafe, zo7o qacinapenne al7o liinope efuudiyada alleeqisidi giigiso. Kaalosepe oosetidabaape oothada alleeqisa. 16 Iyaw geesaynne gompay issi issi takadho gididi oyddu maazaney de7o. 17 Iyaw oyddu maaran al7o shuchata wotha. Koyro maaran sardiyoone, toophazenne phooliya al7o shuchata wotha. 18 Nam7antho maaran baluure, sanperenne almaaze geetetiya al7o shuchata wotha. 19 Heedzantho maaran yaakinte, kelqedoonenne ametesxinoosa geetetiya al7o shuchata wotha. 20 Oyddantho maaran birelle, margide, yasphide geetetiya al7o shuchata wotha. Haysati ubbay worqa kaquwa bolla woseto. 21 Isra7eele naytas qofiso gidana mela ha tammanne nam7u al7o shuchata, issi issi Yayqooba nayta sunthay, issi issi shucha bolla woocetidi xaafeto.

22 “Tiran ma7etiya ma7uwas walahi bayna worqafe wodoroda dooqada santhalaata ootha. 23 Nam7u worqa migiddota oothada, tiran ma7etiya ma7uwas qommo gaxa maazaniyan gathada oytha. 24 He nam7u worqa santhalaatata migiddotara gathada oytha. 25 Hanko baggan de7iya nam7u santhalaata gaxa nam7u qangotara gasetha. Hessada oothada sintha baggara, hashiyara wodhiya efuudiya qanguwara gasetha. 26 Qassi nam7u worqa sagaayota oothada, efuudiyape gatha baggara kaallidi de7iya tiran ma7etiya ma7uwas nam7u maazaneta xeeran aatha. 27 Hessadaka, worqafe hara nam7u migiddota oothada, efuudiyas sintha bagga hashiyara wodhiya qanguwas garsa baggara gasetha. Efuudiya sikuwa matan dancuwaafe qommo baggara enta gasethanaw bessees. 28 Tiran ma7etiya ma7uwan de7iya migiddota efuudiyan de7iya migiddotara gathada kaalose qacinan qacha. Hessada oothiko, tiran ma7etiya ma7oy xeessafe qommon de7iya gisho, qashoy dol7enna.

29 “Aaroni Geeshsha bessa geliya wode Isra7eele mayzata sunthaa oykida, tiran ma7etiya ma7uwa ma7o. Yaaniya gisho, taani, Goday ubba wode ta asaa qopana. 30 Qassi saama yeggiya nam7u geeshsha shuchata tiran ma7etiya ma7uwan yegga.[a] Aaroni Geeshsha dunkaaniya geliya wode ba tiran enta tookidi gelo. Ta sheniya Isra7eele asaa erisanaw ta sinthe geliya wode ubban tira kiisiyape dhaysofo.

31 “Efuudiyape bollara ma7iya adussa ma7uwa kumethi kaalose afilape giigisa. 32 He adusse ma7uwas huuphe aathiya luho medha. He luhoy peedhetonna mela guye qalam7ada yuushsha aathada sika. 33 Adussa ma7uwas duge bagga macara yuushuwan kaalose, ocha teera daaneysaninne zo7o qacinape, oromaane teera misile medha. Yaatada enta giddon aatha aatha worqafe oosetida daalata ootha. 34 Worqa daalatinne oromaane teera misileti he adusse ma7uwas duge bagga macara yuushuwan aadho. 35 Aaroni kahinetethan oothiya wode ha adussa ma7uwa ma7o. Godaa sinthe, Geeshsha Bessaa geliya wodenne keyiya wode, daalay giirana; ika hayqenna. 36 Walahi bayna worqafe issi alleeqo oothada, iya bolla ‘Godaas Dummatis’ yaagada woocada xaafa. 37 Yaatada huuphiya qaciya bolla kaalose qacinara qacha. 38 Aaroni iya ba som7uwan wotho. Hessan Isra7eele asay Godaas imota immishe balidabay de7iko, he balaa Aaroni tookees. Asay ehiyaba Goday ekana mela I hessa ubba wode ba som7uwan wothanaw koshshees.

39 “Aarona shamziyanne qacciya al7o liinope dadda. Qassi dancuwaka al7o liinope daddada alleeqisa. 40 Aarona naytas bonchonne puula immana mela shamizeta, dancotanne huuphen wothiya qoobeta giigisa. 41 Neeni ha ma7ota ne ishaa Aaronanne iya nayta mayza. Enti kahinetethan taw haggaazana mela enta shamaho zayten tiyada taw dummaya. 42 Enta kalloy kametana mela garsan ma7iya ma7uwa xeessafe bidi wodire gakanaw kammiyaba al7o liinope sure giigisa. 43 Aaroninne iya nayti Geeshsha Dunkaaniya geliya wode woyko Geeshsha Bessan kahinetethan haggaazanaw yarsho bessi shiiqiya wode ha ma7ota ma7o. Hessada haniko, enti banta bolla hayqo ehokona. Hessi Aaronasinne iya sheeshatas merinaa woga gido.

<- Kessa Maxaafa 27Kessa Maxaafa 29 ->