1 He wode Leewe qommo gidida issi uray Leewe maccas issiw ekis. 2 He maccasiya adde na7a yelasu. Na7ay mala lo77o gideysa be7ada heedzu ageena qosasu. 3 Shin iya hessafe daro qosanaw danda7onnaysa erada, maqafe daacho dadada, made melaba tiyada na7aa iyan wothasu. Yaatada Nayle Shaafa gaxan mayca giddon wothasu. 4 Iya michiya iya gakiyaba be7anaw haahon eqasu.

5 Gibxe kawa na7iya bolla meecetanaw Nayle Shaafa wodhasu. I macca aylleti haatha doonan yaa haa simeretoosona. Iya daacho mayca giddon demmada, ba aylliw bada ehana mela kiittasu. 6 Daacho dooyada he guutha na7aa be7asu. I yeekeysa be7ada qadhetada, “Haysi Ibraaweta guutha naytape issuwa” yaagasu.

7 He wode iya michiya kawa na7eko, “Ha na7aa dhanthana mela Ibraawe maccas new eho?” yaagada oychasu.

8 Iya, “Ee, eha” yaagasu. Na7iya bada na7aa aayiw ehasu. 9 Kawa na7iya maccasiw, “Ha na7aa efada, taw dhantha; dicha; taani new damooze qanxana” yaagasu. Maccasiya na7aa efada dhanthasu. 10 Na7ay diccin, kawa na7eko ehasu; I iw na7a gidis. “Taani haathaafe iya kessa ekas” gada, iya Muse[a] gada sunthasu.

11 Musey diccidaape guye issi gallas ba asaa be7anaw bidi, enti deexo ooso oothishin enta be7is. Gibxe asi issoy Ibraawetape issuwa ba yara wadhishin be7is. 12 I yaa haa xeellin, oonika baynaysa be7idi, he Gibxe ura wodhidi shafen qosis. 13 Wontetha gallas keyidi, nam7u Ibraaweti wadhetishin be7is. Qoheysako, “Neeni ne dabbuwa ayis shocay?” yaagidi oychis.

14 He uray, “Nena nu bolla haareysanne daynna oothiday oonee? Neeni zine Gibxe uraa wodhidaysada, tanaka wodhanaw koyay?” yaagis. Musey he wode, “Taani oothidabay asan eretis” yaagi qopidi yayyis.

15 Kawoy hessa si7ida wode, Muse wodhisanaw koyis. Shin Musey betidi, Midiyaame biittan de7anaw bis.

Issi gallas I haatha olla doonan uttis.

16 He wode Midiyaame kahine issuwas laapun macca nayti de7oosona. Enti banta aawa dorsata gongen haathe duuqi ushshanaw yidosona. 17 Henthanchoti yidi macca nayta goodidosona. Shin Musey enta maaddidi enta dorsata haathe ushshis.

18 Enti banta aawa Yetorako yida wode, “Hachi waani ellesi yidetii?” yaagidi oychis.

19 Enti zaaridi, “Gibxe asi issoy nuna henthanchotape ashshis. Haathe duuqidi dorsata ushshis” yaagidosona.

20 I ba macca nayta, “Yaatin I awun de7ii? Hinte he ura ayis aggidi yidetii? Nuura kathi maana mela ane iya xeegite” yaagis.

21 Musey he addiyara yan de7anaw qofa qachis. Yotori ba na7iw Sipooro Muses macho oothidi immis. 22 Sipoora adde na7a yelin, Musey iya, “Taani ha biittan bete asi” gidi Gersaama gidi sunthis.

23 Daro laythafe guye Gibxe kawoy hayqis. Shin Isra7eeleti banta aylletethan un7etidi waassidosona. Banta aylletethan enti waassida waasoy Xoossaako gakis. 24 Xoossay enta waasuwa si7idi, I Abrahaamera, Yisaaqaranne Yayqoobara caaqida caaquwa hassayis. 25 Xoossay Isra7eeleta aylletetha un7aa be7idi entana qopis.

<- Kessa Maxaafa 1Kessa Maxaafa 3 ->