1 He wode qamma kawa dhiskoy ekonna ixis. Hessa gisho, kawoy kawo taarike xaafiya maxaafaa ehidi, kase hanida taariketa iyaw nabbabana mela kiittis. 2 Nabbabetida taariketape issoy Mardikiyoosi oothidaba. Hessika, kawoy de7iya kifiliya naagiya, Gabatanne Taara geetetiya nam7u shuufati kawa wodhanaw maqida maquwa Mardikiyoosi qoncisis. 3 Kawoy, “Yaatin, I hessa oothida gisho iyaw imetida shuumatethay woyko woytoy aybee?” yaagis.

Kawa aylleti zaaridi, “Iyaw aykoy oosetibeenna” yaagidosona.

4 Kawoy zaaridi, “Kare dabaaban de7ey oonee?” yaagis. He wode ba giigisida mithan Mardikiyoosa kaqanaw, kawa oychanaw, Haami kare dabaaba gelishe de7ees.

5 Kawa aylleti, “Haami kare dabaaban eqis” yaagidosona.

Kawoy zaaridi, “Haa gela giite” yaagis.

6 Haami gelidaape guye kawoy, “Kawoy bonchanaw dosiya asas ay oothanaw koshshii?” yaagidi oychis.

Haami, “Kawoy taape haraa oona bonchanaw dosii?” yaagidi ba wozanan qopis. 7 Hessa gisho, Haami kawas yaagidi zaaris; “Kawoy bonchanaw dosiya asaas, 8 kawoy ba kawotetha ma7uwa ehiso; ba toggiya para huuphen guche wotho. 9 Hessafe guye, kawoy ba moorinatape issi daro bonchetidaysa xeegisidi, kawotetha ma7o iya mayzanaadanne kawa para bolla iya utisidi, katamaa dabaaba kessanaada kiitto. Yaatiko he daro bonchetida moorinnay iya sinthan hemetishe, ‘Kawoy bonchanaw dosiya uraas haysada oothees’ yaagidi awaajo” yaagis.

10 Kawoy zaaridi, Haama haysada yaagidi kiittis; “Hiza ellesa dendada kawotetha ma7uwanne ta para ekada, ne gidaysada Ayhude gidida Mardikiyoosas ootha. I kawo keethi geliya pengen de7ees. Ne gidaysafe issibaaka ashshofa” yaagis.

11 Hessa gisho, Haami Mardikiyoosa kawotetha ma7o mayzidi, kawa para bolla utisis. Qassi katamaa dabaaban iyape sinthara hemetishe, “Kawoy bonchanaw dosiya uraas haysada oothees” yaagidi awaajis.

12 Hessafe guye, Mardikiyoosi kawo keethi penge guye simmidi bis. Shin Haami daro azzanida gisho, guuluntidi, ellesishe ba soo bis. 13 Bana gakidaba ubbaa ba mache Zosaarisinne ba laggetas odis. Enti iyako, “Iya sinthan neeni kawuyanaw doomida ha addey, Mardikiyoosi, Ayhude asi gidiko, ne iyara eqetada, iya xoonanaw danda7aka; tuma I nena dhaysana” yaagidosona.

14 Enti buroo hessa odetishin, kawa shuufati gakidi, Haama Astira giigisida gibiras ellesidi efidosona.

<- Astiri Maxaafa 5Astiri Maxaafa 7 ->