1 Musey Moo7abe dembaafe dendidi, Nabo zuma huuphiya, qassi Iyaarkofe doloha baggara de7iya Pisga zuma huuphiya gakis. Yan Goday Daane gakanaw de7iya Galada biitta, 2 Niftaaleme biitta ubbaa, Efreemenne Minaase biitta, wuloha baggara bidi Medetiraane Abbaa gakanaw de7iya Yihuda biittanne 3 dugeha baggara Zo7aarepe dendidi, zambi de7iya Iyaarko katamaa, zangaaran de7iya demba ubbaa bessis. 4 Goday Museko, “Taani hinte sheeshas immana gada Abrahaames, Yisaaqasinne Yayqoobas, caaqida biittay haysa. Ha77i neeni ne ayfen be7ana mela oothas, shin neeni yaa pinnaka” yaagis.

5 Godaa aylley, Musey, Goday gidaysada, yan Moo7abe biittan hayqis. 6 Goday Beet-Pa7oora katamaape sintha baggan Moo7abe zangaaran iya moogis. Shin hachi gakanaw I moogetida duufuwa eriya asi baawa. 7 Musey hayqiya wode iyaw laythi xeetanne laatama; shin iya ayfey ixibeenna; iya wolqay daaburibeenna. 8 Isra7eele asay Moo7abe denban hastamu gallas Muses yeekidosona. Hessafe guye, baley dendin, yeeho wodey wuris.

9 Musey, ba bessan oothana mela, iya bolla ba kushiya wothida gisho, Nawe na7ay Iyyasuy cincatetha ayyaanan kumis. Isra7eele asay Iyyasus kiitetidosona; Goday Muse baggara immida kiita naagidosona.

10 Godaa som7on odisida, Muse mela nabey, Isra7eele biittan dendibeenna. 11 Goday Muse Gibxe kawako, iyara oothiya moorinnatakonne kumetha asaako yeddidi, iya baggara malaatatanne malaalsiyabata ubbaa oothida, Muse mela hara nabey oonika baawa. 12 Isra7eele ubbaa sinthan gita wolqan malaalsiyaba oothida, Muse mela asi oonika baawa.

<- Zaaretho Maxaafa 33