1 Leewe koche gidida kahinetasinne attida enta kochaas Isra7eele giddon laata biitti baawa. Asay Godaas shiishiya xuussa yarshoy enta gisho gidiya gisho iya mishe daana. 2 Entaw enta ishata giddon laati deenna; Goday entaw gidaysada I enta laata.

3 Korma woyko dorse asay yarshos shiishidaysafe kahineta gishoy haysa; missay, gacoynne ulo ashoy entaw imeto. 4 Ne kathaafe, woyniyapenne zaytiyape koyro gakida ayfiyanne ne dorsa ikisiyape bayraa kahinetas imma. 5 Leeweti Godaa sunthan merinaw kahine gididi oothana mela ne kochaa giddofe Goday, ne Xoossay enta dooris.

6 Issi Leewey Isra7eele biittan de7iya issi katamaape dendidi, Goday dooriya bessaa baanaw koyiko, 7 I biya bessan de7iya Leeweti Godaa sinthan eqidi ootheysada ika Godaa ba Xoossaa sinthan eqidi ootho. 8 Bana gakiya gishuwa ekidaba gidikoka, kahineti go7etiya ubbaa entara gina shaaketidi eko.

9 Goday ne Xoossay immida biitta ne geliya wode he biittan de7iya asay oothiya ixetida oosota oothofa. 10 Ba adde na7aa woyko macca na7iw yarshos taman xuuggiya oonika ne giddon bentofo. Biti, maraace be7ey, marotey, higishey, 11 moytille be7ey, hayqida asa ayyaana xeegey, woyko hayqida asa ayyaanara odetey ne giddon de7opo. 12 Hessa melaba oothiya oonika Godaa matan ixetida asi. Enti hessa mela tunaa oothiya gisho, Goday ne Xoossay he kawotethata ne sinthafe gooddana. 13 Shin neeni Godaa ne Xoossaa sinthan borey baynaysa gida. 14 Neeni laattanaw biya biittan de7iya kawotethati murunneysatanne biteyisata; shin ne hessa oothonna mela Goday ne Xoossay nena diggis.

15 Goday, ne Xoossay ne kochaa giddofe ta mela nabe new denthana. Ne I geysa si7a. 16 Koreeba zumaa bolla ne shiiqida wode Godaa ne Xoossaa haysada yaagada oychadasa; “Ta hayqonna mela Godaa, ta Xoossaa girsaa zaarada si7ike; ha wolqaama tama zaarada be7ike” yaagadasa.

17 Goday taako, “Enti tuma gidoosona. 18 Ta enta kochaa giddofe ne mela nabe entaw denthana; taani ta qaala iya doonan wothana; i, ta kiittiya ubbaa entaw odana. 19 I ta sunthan odiya ta qaala si7onna oonaka ta oychana. 20 Shin ta kiittonnaba ta sunthan odiya woyko hara xoossata sunthan odiya he nabey hayqo” yaagis.

21 Neeni, “Nabey odiya qaalay Xoossafe gidonnaysa ta aybin shaakada eranee?” yaagiko, 22 he nabey Godaa sunthan odida qaalay poletonna ixiko, hessi Goday odiboonna qaala gideysa eraasa. He nabey odiya qaalay wordo gidida gisho iya yayyofa.

<- Zaaretho Maxaafa 17Zaaretho Maxaafa 19 ->