Hawaareta Ooso 4

Phexroosinne Yohaanisi Shango Sinthan

1 Phexroosinne Yohaanisi asaas odishin kahine halaqati, Xoossa Keethe naageysata halaqaynne Saduqaaweti entako yidosona. 2 Enti Yesuusi hayqope dendoysanne iya gaason hayqope dendoy de7eysa asaa tamaarsida gisho yilotidosona. 3 Hessa gisho, enta oykidi sa7i omarsida gisho wontana gakanaw qasho keethi gelsidosona. 4 Shin qaala si7idaysatape daroti ammanidosona. Ammanida adde asaa tayboy ichashu mukuluko bis.

5 Wontetha gallas deriya haareysati, cimatinne, higge astamaareti Yerusalaamen shiiqidosona. 6 He asa giddon kahine halaqay Haanni, Qayyaafi, Yohaanisi, Iskindireynne kahine halaqaa soo asati ubbay de7oosona. 7 Hawaareta banta sinthan essidi, “Aybi wolqan woyko oodde sunthan haysa hinte oothidetii?” yaagidi oychidosona.

8 He wode Phexroosi Geeshsha Ayyaanan kumidi, “Deriya haareysato, cimato, 9 hachi ha wobbe addiyas oosetida lo77o oosuwasinne I waanidi paxidaako hinte nuna oychiko, 10 masqaliya bolla hinte kaqin, Xoossay hayqope denthida Naazirete Yesuus Kiristoosa sunthan ha addey paxidi hinte sinthan eqidaysi hintewunne Isra7eele asa ubbaas ereto.

11 “ ‘Gimbeysati boridi ixida shuchay,

godaa xaphuwa minthiya,

ubbaafe aadhiya shuchu gidis.

He shuchay Yesuusa.’[a]

12 Hessa gisho, atotethi iya baggarape attishin, hara oodde baggaraka baawa. Nuuni iya sunthan attana mela asa ubbaas Xoossay salope garsan immida hara sunthi baawa” yaagis.

13 Shiiqida asay Phexroosinne Yohaanisi minnida minotetha be7ida wode enti tamaariboonna coo asi gididaysa akeekidi, malaaletidosona; enti Yesuusara de7eysa eridosona. 14 Qassi paxida addey Phexroosaranne Yohaanisara eqidaysa asay be7idi giyaba dhayidosona. 15 Shin Phexroosanne Yohaanisa kare keyana mela oothidi banta giddon, 16 “Ha asata nu ay oothino? Enta kushen oosetida gita malaatay Yerusalaamen de7iya ubbaas bentees. Nuuni hessa eroko gaanaw danda7oko. 17 Shin ha oday asaa giddon laaletonna mela hizape guye, ha asati Yesuusa sunthan oodeska odonna mela minthidi naagisana” yaagidi zoretidosona.

18 Enta xeegidi, Yesuusa sunthan hizape odonna mela woyko tamaarsonna mela kiittidosona. 19 Shin Phexroosinne Yohaanisi entako zaaridi, “Xoossas kiitetanaysafenne hintew kiitetanaysafe Xoossaa sinthan awusi lo77oko? Ane hinte pirdite. 20 Nuuni be7idabaanne si7idaba odonna agganaw danda7oko” yaagidosona.

21 Biitta cimatinne deriya haareysati kasepe minthi naagisidi enta yeddi aggidosona. Asay hanidabaas Xoossaa galatiya gisho enta seeranaw danda7ibookona. 22 He malaatan hargefe paxida addiyas laythi oytamape aadhis.

Ammaniya Asaa Woosa

23 Phexroosinne Yohaanisi birshetidi banta dabbotako bidi, kahine halaqatinne cimati bantako gidaba ubbaa entaw odidosona. 24 Enti hessa si7ida wode issi wozanan gididi Xoossaa haysada yaagidi woossidosona: “Ubbaa Haariya Godaw, saluwa, sa7aa, abbanne enta giddon de7iya ubbaba medhidayso,[b] 25 Neeni ne aylliya, nu aawa Dawita doonan Geeshsha Ayyaanan,

“ ‘Derey ayis yilotidonaa?

Asay ayis coo maqetidona?[c]

26 Sa7aa kawotinne

deriya haareysati issife Godaa bollanne

Kiristoosa bolla dendidosona’ yaagadasa.

27 “Tumaka, Herodiisinne Phenxe Philaxoosi Ayhude gidonna asaaranne Isra7eele asaara ne doorida ne geeshsha Na7aa Yesuusa bolla dendanaw ha kataman shiiqidosona.[d] 28 Qassi neeni ne wolqaaninne ne sheniyan oothana gada qopa uttidaba ubbaa polidosona. 29 Ha77ika Godaw, enta mandetha be7a; nuuni ne aylleti ne qaala kumetha wozanan odana mela nuna danda7isa. 30 Ne geeshsha na7aa Yesuusa sunthan harganchota pathanaw, oorathabaynne malaatati oosetana mela ne kushiya micca” gidi woossidosona.

31 Enti Xoossa woossidaape guye, he enti shiiqida bessay qaaxis. Enta ubban Geeshsha Ayyaani kumin Xoossaa qaala minotethan odidosona.

Koyro Ammanida Asa Issifetetha

32 Ammaneysati ubbay qofaninne wozanan issino gididosona. Enti bantaw de7iyaba tabaa goonnashin issife shaaketoosona.[e] 33 Hawaareti, Godaa Yesuusi hayqope dendidaysa gita wolqan markatoosona. Xoossay enta ubbaas aadho keehatetha darsidi immis. 34 Biitti woyko keethi de7eysati ubbay bayzi ekida miishiya ehiya gisho, ammaneyisata giddon metootanchoy issoyka baawa. 35 Miishe ehidi hawaaretas immoosona; he miishiya asaas koshshidaysada issuwas issuwas shaaki shaaki immees.

36 Qophiroosa geetetiya bessan yeletida Yoosefa geetetiya Leewe sheeshape gidida issoy de7ees. Iya sunthaa hawaareti Barnabaasa (Minthetho na7a) gidoosona. 37 Barnabaasi baw de7iya biitta bayzidi miishiya ehidi hawaaretas immis.

<- Hawaareta Ooso 3 Hawaareta Ooso 5 ->