1 Nuuni Efesoona cimatape shaaketida mela Qoosa bida. Wontetha gallas Rooda gakidi yaape Phaxara bida. 2 Sirofinqe pinniya markabe demmidi iyan gelidi baanaw dendida. 3 Nuuni Qophiroosa be7anaw danda7iya soo yidi, Qophiroosa haddirsa bagga aggidi Soore bida. Markabey ba caana yan wothanaw koyida gisho Xiroosa bida. 4 Yan ammaniya asata demmidi entara laapun gallas uttida. Phawuloosi Yerusalaame boonna mela enti iyaw Ayyaanan odidosona. 5 Nuuni entara uttiya wodey wurin keyidi bida. Enti ubbay banta maccasataranne banta naytara issife katamaape kare kessidi nuna moyzidosona. Nuuni abba doonan gulbatidi Xoossaa woossida. 6 Hessafe guye, woli sarothidi nu markabiyan gelida; enti banta soo simmidosona.

7 Nuuni abba ogiya ongidi, Xiroosape Phaxelemaasa gakida. Yan ammaniya asata sarothidi, enta matan issi gallas pee7ida. 8 Wontetha gallas keyidi, Qisaare bida. Sabaakiya Filphoosa soo gakidi iya matan uttida. I Yerusalaamen kase dooretida laapunatape issuwa.[a] 9 Filphoosas nabe gidida oyddu geela7o nayti de7oosona.

10 Nuuni undenna gallas yan uttidi de7ishin tinbite odiya issi Agaboosa geetetiya addey Yihudape Qisaare yis.[b] 11 Nuuko yidi Phawuloosa saqiya ekidi ba kushiyanne ba tohuwa qachidi, “Geeshsha Ayyaanay ha saqiya godaa, Yerusalaamen Ayhudeti haysada qachidi, Ayhude gidonna asaas aathidi immana yaagees” yaagis.

12 Nuuni hessa si7ida wode nunne yan de7iya asati Phawuloosi Yerusalaame boonna mela woossida. 13 Shin Phawuloosi zaaridi, “Hinte haysada yeekishe ayis ta wozanaa shugiseetii? Taani, Godaa Yesuusa sunthaa gisho qashetetha xalaala gidonashin Yerusalaamen hayqanawuka giigetas” yaagis.

14 Nu zoriya I ekonna ixin, “Godaa sheney hano” yaagidi si77i gida.

15 Yan guutha wode gam7idaape guye giigetidi Yerusalaame baanaw keyida. 16 Qisaaren de7iya ammaniya asatape guuthati nuura bidosona. Enti nuuni shempana bessi Minaasona geetetiya Qophiroosa addiya soo efidosona. Minaasoni koyro ammanida asaape issuwa.

17 Nuuni Yerusalaame gakida wode ammaniya asati nuna ufaysan mokidosona. 18 Wontetha gallas Phawuloosinne nuuni Yayqoobara gahetanaw bida. Woosa keethaa cimati ubbatika yan de7oosona. 19 Phawuloosi enta sarothidaape guye Ayhude gidonna asaa giddon ba baggara Xoossay oothidaba ubbaa entaw odis.

20 Enti hessa si7ida wode Xoossaa galatidi Phawuloosako haysada yaagidosona: “Nu ishaw, Ayhudeta giddon aapun mukulati Xoossaa ammanidako ne be7aasa; enti ubbayka higgiya minthi naagoosona. 21 Neeni Ayhude gidonnayisata biittan de7iya Ayhude ubbay banta nayta qaxaronna mela, Ayhudeta wogaa kaallonna melanne Muse higgiya ixana mela neeni tamaarseysa Yerusalaamen de7iya Ayhudeti si7idosona. 22 Yaatin aybi lo77o? Neeni yidaysa daroti si7ana.

23 “Hessa gisho, nuuni new odeysa si7a; gasoy de7iya oyddu asati nu matan de7oosona.[c] 24 Enta ekada entara geeya; qassi enti banta huuphiya meedettana mela entaw miishe imma. Enti kase nebaa si7idaysi tuma gidonaysanne neeni ne huuphenka higge naagiya asi gideysa ubbay erana.

25 “Shin ammanida Ayhude gidonna asata gidiko, enti eeqas yarshetidaba moonna mela, suuthu uyonna mela, bawuta moonna melanne laymatonna mela, nuuni oda qachidi, entaw dabdaabe xaafida” yaagidosona.[d]

26 Hessafe guye, Phawuloosi wontetha gallas asata ekidi, entara geeyis. I banta geeyiya gallasay awude poletiyako erisanawunne banta yarshuwa awude yarshaneko erisanaw Xoossa Keethi gelis.

27 Laapun gallasay wurana hanishin, Iisepe yida Ayhudeti xoossa keethan Phawuloosa be7idi, asa ubbaa denthethidi Phawuloosa oykidosona. 28 “Isra7eele asaw, nuna maaddite; ha uray, nu deriya, nu higgiyanne ha Xoossa Keetha ixana mela asa ubbaa tamaarsees. Hessika gidonna ixin Ayhude gidonnayisata Xoossa Keethi gelsidi, ha geeshsha bessaa tunisis” yaagidi waassidosona. 29 Enti hessa giday kase Efesoona Xirofmoosa Phawuloosara kataman be7ida gisho ha77i Phawuloosi Xoossa keethi iya eki gelidaba entaw daanis.[e]

30 Katama ubbay buqetis; asa ubbay shiiqidi Phawuloosa oykidi Xoossa Keethafe kare goochidosona. Xoossa Keethaa pengeti ellesidi gordetidosona. 31 Asay Phawuloosa wodhana hanishin, “Yerusalaame katamay kumethi buqetis” giya oday Roome shaalaqaako gakis. 32 Shaalaqay wotaadaretanne mato halaqata ekidi woxishe yis. Asay shaalaqaanne wotaadareta be7ida wode Phawuloosa wadheysa aggaagidosona.

33 He wode shaalaqay shiiqidi, Phawuloosa oykidi, nam7u santhalaatan qashetana mela kiittis. Yaatidi, I oonekonne ay oothidaako asaa oychis. 34 Asaape baggay issiba gidi waassiya wode, harati haraba gidi waassees. Waasoy darida gisho, shaalaqay tumaa shaakanaw danda7etonna ixin, wotaadareti Phawuloosa banta de7iyaso efana mela kiittis. 35 Phawuloosi yedhi keyiya dethaa gakiya wode asaa sugethaa gisho wotaadareti iya tookidosona. 36 Daro asay, “I hayqo!” yaagidi waassishe kaalloosona.

37 Wotaaddareti Phawuloosa banta de7iyasuwa gelsana hanishin, Phawuloosi shaalaqaako, “Taani new issiba odo?” yaagis.

I Phawuloosako, “Neeni Girike doona eray? 38 Neeni haysafe sinthe buqethi medhidi shempo wodhida oyddu mukulu asata ekidi bazzo gelida Gibxe uraa gidikii?” yaagis.

39 Shin Phawuloosi, “Taani, Kilqiyan de7iya eretida Tersesee kataman yeletida Ayhude asi. Hayyana tana odisarkii?” yaagis.

40 Shaalaqay iyako, “Oda” yaagin Phawuloosi dethaa bolla eqidi, asay si77i gaana mela ba kushiyan mallis. Asay si77i gin Ibraawetho doonan haysada yaagis: