Hawaareta Ooso 2

Geeshsha Ayyaana Wodhetha

1 Phenxeqosxe gallasay gakida wode ammaniya asa ubbay issife issi bessan shiiqidi de7oosona.[a] 2 Qoponna wolqaama goteda guummiya guunthay akeekona salope yidi enti de7iya keetha kumis. 3 Qassi tama laco daaniya inxarsati entaw bentishe, shaaketi shaaketi enta ubbaa bolla wodhidosona. 4 Enti ubbay Geeshsha Ayyaanan kumidi dumma dumma doonan odetana mela Geeshsha Ayyaanay enta danda7isin haasaya doomidosona.

5 He wode biitta ubbaafe yida Xoossas babbiya Ayhudeti Yerusalaamen de7oosona. 6 He guuntha si7ida wode daro asay shiiqidosona. Ammaniya asay enta qaalan odetishin si7ida gisho, 7 malaaletidi, “Ha odetiya asa ubbay Galila ase gidokonaayee? 8 Yaatin, nuuni, nu yeletida biitta doonan enti odetishin waanidi si7anaw danda7ido? 9 Nuuni Pharxen, Meedonan, Elaaman, Masephexoomen de7eysati, Yihudan, Qaphadooqan, Phanxoosan, Iisen, 10 Pirgen, Phinfilen, Gibxen, Qaarena matan de7iya Liiben de7eyisata. Nuupe baggatika Roomepe yida asata. 11 Ayhudetinne Ayhudetetha ammano gelida asati, Qarxeesanne Arabe asati, Xoossay oothida gita oosuwa nu qaalan odetishin si7oos” yaagidosona. 12 Ubbay malaaletidi, gaanaba dhayidi, “La haysi ay guussee?” yaagidosona. 13 Shin harati, “Haysati woyne uyidi mathotidosona” yaagidi qelqisidosona.

Phexroosa Haasaya

14 Shin Phexroosi, tammanne issi hawaaretara dendi eqidi, ba qaala dhoqu oothidi, entaw haysada yaagidi odis: “Ayhudeto, Yerusalaamen de7iya ubbato, taani odeysa si7ite. 15 Wontafe heedzu saate gidiya gisho hinte qopeysada ha asati mathotibookona; hessi hintew ereto. 16 Shin haysi haniday nabey Iyyu7eeli odidaysi poletana melasa.

17 “ ‘Xoossay, wodiya wursethan haysada hanana yaagees:

taani asa ubbaa bolla ta Ayyaana gussana.

Hinte adde naytinne macca nayti,

tinbite odana.

Hinte yalagati qoncethi be7ana;

hinte cimati amuho amuhana.[b]

18 He gallasatan tana ammaniya adde aylleta bollanne macca aylleta bolla

taani ta Ayyaana gussana;

enti tinbite odana.

19 Qassi taani bolla salon oorathaba,

garsa sa7anka malla bessaana.

Suuthay, tamaynne wolqaama caaganay bentana.

20 Gitanne boncho gidida Godaa gallasay

gakanaape sinthe awi dhumana;

ageeni suuthi daanana.

21 He wode hessada hanana;

Godaa sunthaa xeegiya oonika attana’ yaagis.

22 “Isra7eele asato, ha qaala si7ite. Naazirete Yesuusa oonatethay, Xoossay hinte giddon oothida wolqaama oosuwaninne malaatatan hintew qoncoysa hinte, hinte huuphen ereeta. 23 Xoossa kase eraninne iya shenen, Yesuusi hintew aadhidi imetis. Hinte, nagaranchoti iya masqale bolla kaqidi wodhana mela aathidi immideta.[c] 24 Shin Xoossay hayqo wolqa diggidi iya denthis. Hessa gisho, hayqoy iya oykanaw danda7ibeenna.[d] 25 Dawiti iyabaa odishe,

“ ‘Taani yarkonna mela,

Goday ta ushachan de7ees.

Godaa ubba wode ta matan be7ayis.

26 Hessa gisho, ta wozanay ufaytis;

ta inxarsan ufaysi kumis;

hayqiya ta asatethay ufaysan daana.

27 Ayis giiko, ta shempuwa Si7oolen aggaka.

Qassi ne Geeshsha Na7a aha wooqisaka.

28 Neeni tana de7o oge erisadasa.

Neeni taara de7eysan ta ufaysay kumethi gidees’[e] yaagis.

29 “Asaw, nu aawa Dawitaba ta hintew geeshshada odana. Dawiti hayqidi moogetis; iya duufoy hachi gakanaw nu matan de7ees. 30 Dawiti nabe gidida gisho, Xoossay iya sheeshape issuwa iya kawotetha araata bolla utisanaw iyaw caaqida caaquwa erees.[f] 31 Hessa gisho, Kiristoosa denduwa sinthe xeellidi, ‘Iya shempoy Si7oolen attibeenna; iya asatethayka wooqibeenna’ gidi odis.

32 “Xoossay, ha Yesuusa hayqope denthidaysas nuuni ubbay marka. 33 Hessa gisho, Xoossay baara haarana mela baape ushacha baggara iya dhoqu dhoqu oothidi, iyaw immana geetetida Geeshsha Ayyaana ekidi, haysa hinte ha77i be7eysanne si7eysa nu bolla gussis. 34-35 Gaasoyka, Dawiti ba huuphen salo bibeenna shin yaagis.

“Goday, ta Godaa, ‘Taani ne morketa

ne tohoy yedhiyaso oothana gakanaw

haysan, taape ushacha baggara utta’ ” gis.

yaagis.[g]

36 “Hessa gisho, ha hinte masqale bolla kaqida Yesuusa, Xoossay Godanne Kiristoosa oothidaysa Isra7eele asa ubbay tuma ero” yaagis.

37 Asay Phexroosi gidaysa si7ida wode banta wozanan boshetidi Phexroosanne hanko hawaaretako, “Ishato, yaatin nuuni ay oothino?” yaagidosona.

38 Phexroosi entako, “Hinte nagaray atto geetetana mela nagaraape simmidi, hinte issoy issoy Yesuus Kiristoosa sunthan xammaqetite. Xoossay immiya Geeshsha Ayyaana hinte ekana. 39 Gaasoyka Xoossay immana gida ufaysa qaalay hintew, hinte naytasinne Goday nu Xoossay baako xeegiya haahon de7iya ubbaasa” yaagis.

40 Phexroosi entaw hara qaalaka guji markatidi, “Ha wodiya geella asaa bolla yaanaw de7iya pirdafe hinte huuphiya ashshite” yaagidi zoris. 41 Phexroosi odidaysa ekidaysati xammaqetidosona. He gallas heedzu mukulu gidiya asay ammanidosona. 42 Enti hawaareta timirtiyan, issifetethan, uytha muusaninne woosan minnoosona.

43 Hawaareta kushen daro oorathabaynne malaati oosetiya gisho asa ubbay yayidosona. 44 Ammanida ubbay issife de7oosona; bantaw de7iyaba ubbaa issife shaaketoosona.[h] 45 Enti bantaw de7iyaba bayzidi miishiya issuwas issuwas koshshida mela shaakosona. 46 Ubba gallas issi wozanan gididi xoossa keethan shiiqoosona. Banta keethan issoy issuwa xeegidi ufaysaninne ashke wozanan kathi moosona. 47 Xoossa galatishe asa ubban sabetidosona. Goday atteyisata gallas gallas enta bolla gujees.

<- Hawaareta Ooso 1 Hawaareta Ooso 3 ->