Hawaareta Ooso 13

Barnabaasanne Saa7ola

1 Anxooken de7iya woosa keethan nabetinne astamaareti de7oosona. Enti Barnabaasa, Kareethi geetetiya Simoona, Qereenape yida Lukiyoosa, Kawa Herodiisara diccida Minaahenne Saa7ola. 2 Enti Godaa goyinnishininne xoomishin Geeshsha Ayyaanay, “Taani xeegida oosuwas Barnabaasanne Saa7ola taw dummayite” yaagis.

3 Hessa gisho, enti xoomidaapenne woossidaape guye banta kushiya enta bolla wothidi yeddidosona.

Barnabaasinne Saa7oli Qophiroosan

4 Hessa gisho, Geeshsha Ayyaanay enta kiittis. Selewuqe bidosona; yaape markaben gelidi Qophiroosa haathan teqetida biitta bidosona. 5 Enti Silmana gakidi ayhude woosa keethatan Xoossaa qaala odidosona. Yohaanisi[a] maaddishe entara de7ees.

6 Enti yuushoy abban teqetida biitta, Qophiroosa kanthidi Phaafu gakiya wode, issi wordancho nabiya, Bar-Yesuusa geetetiya Ayhude maruwa demmidosona. 7 He maroy deriya aysiya Sargiyoos Phawuloosa geetetiya akeekancho addiyara de7ees. Sargiyoos Phawuloosi Barnabaasanne Saa7ola baako xeegidi Xoossaa qaala si7anaw koyis. 8 Shin Girike doonan maruwa sunthay “Elmaasa” geetetees. I deriya haareysi ammanonna mela digganaw koyidi Barnabaasaranne Phawuloosara eqetis.

9 Shin Phawuloosa geetetiya Saa7oli Geeshsha Ayyaanan kumidi maruwa caddi xeellidi, 10 “La, Xalahe na7aw, iitatethi ubbay kumidayso, xillotetha ubbaas morkiyaw, suure Godaa ogiya mirqeysa aggikii? 11 Heko, ha77i Godaa kushey ne bolla de7ees. Neeni qooqe gidana; guutha wodes awa poo7o be7aka” yaagis.

Iira caaganne dhumi iya ayfiya goozin, ba kushiya oykidi kaalethiya asi koyishe yuuyis. 12 Deriya ayseysi hessa be7ida wode Godaaba tamaarsiya timirtiyan malaaletidi ammanis.

Barnabaasinne Phawuloosi Phisde Anxooken

13 Phawuloosinne iyara de7eysati Phaafupe dendidi, Phinfilen de7iya Pharge markabera bidosona. Yohaanisi entafe shaaketidi Yerusalaame simmis. 14 Shin enti Phargefe aadhidi Phisden de7iya Anxooke gakidosona. Sambaata gallas ayhude woosa keethi gelidi uttidosona. 15 Muse higgeynne nabeta maxaafay nabbabetidaape guye ayhude woosa keetha halaqati, “Nu ishato, asaa minthethiya qaali hintew de7iyako asaas oderketi” yaagidi entako kiittidosona.

16 Phawuloosi dendi eqidi ba kushe mallidi, “Isra7eele asatonne, Xoossaa goyinniya Ayhude gidonna asaw, si7ite. 17 Ha Isra7eele asaa Xoossay nu mayzata dooris. Gibxe biittan imathatethan enti de7ishin, enta darsidi ba gita wolqan Gibxe biittafe enta kessis.[b] 18 Mela biittan oytamu laytha mela enta danda7is.[c] 19 Kanaane biittan Ayhude gidonna laapun kawotethata diggidi enta biitta ba asaa laatisis.[d]

20 “Hessafe guye, nabiya Sameela wode gakanaw oyddu xeetanne ishatamu laytha mela aysiya daynnata entaw immis.[e] 21 Hessafe guye, enti bantaw kawo immana mela woossin, Xoossay Biniyaame sheeshape Qiisa na7aa, Saa7ola oytamu laythi kawotana mela entaw immis.[f] 22 Xoossay Saa7ola shaaridaape guye enta bolla Dawita kawothis. Xoossay Dawitaba markatishe, ‘Taani koyiya ubbaa ta wozanaa mela oothiya Isseye na7aa Dawita demmas’ yaagis.[g]

23 “Xoossay, ‘Taani Dawita sheeshape Isra7eele deriya ashsheysa ehana’ gidaysa mela Yesuusa ehis. 24 Yesuusi yaanape sinthe Isra7eele asa ubbay banta nagaraape simmidi xammaqetana mela Yohaanisi qaala odis.[h] 25 Qassi Yohaanisi ba oosuwa wursana hanishe asaako, ‘Tana oona gidi qopeetii? Taani hinte naagiya Kiristoosa gidike, shin taani iya caammaa birshanaw taw bessonnaysi taape guyera yees’ yaagis.[i]

26 “Ta Ishato, Abrahaame sheeshato, qassi haysan Ayhude gidonashin Xoossas yayyeysato, ha atotetha qaalay nuus kiitetis. 27 Ayis giiko, Yerusalaamen de7iya asaynne enta halaqati Yesuusa eribookona. Sambaata ubban nabbabetiya nabeta qaala akeekibona gisho iya bolla pirdidi nabeti odida qaala polidosona. 28 Yesuusa wodhisanaw issi gaasoyka entaw dhayin Philaxoosi iya wodhana mela woossidosona.[j] 29 Enti Yesuusabay Geeshsha Maxaafan xaafetidaba ubba polida wode masqaliyape iya wodhisidi moogidosona.[k] 30 Shin Xoossay hayqope Yesuusa denthis. 31 Hessafe guye, I baara Galilape Yerusalaame yidaysatas daro toho bentis. Enti ha77i iyabaa asaas markatoosona.[l]

32 “Xoossay nu aawatas immana gida Wongela nuuni hintew odoos. 33 Dawiti ba Mazmure Maxaafan nam7antho shempuwan,

“Neeni, ta Na7a,

taani hachi nena yelas”

geetetidi xaafetida Yesuusa, Xoossay hayqope denthidi nu mayzatas immana gidaysa nuus enta naytas polis.[m] 34 I wooqonna mela Xoossay hayqope iya denthon erisanaw,

“ ‘Taani Dawitas immana gida

ammanetida geeshsha anjuwa hintew immana’ ” yaagidi odis.[n]

35 Hessa gisho, Mazmure Maxaafan hara bessan,

“ ‘Ne Geeshsha Na7aa aha wooqisaka’ yaagees.[o]

36 “Dawiti ba wode Xoossaa qofaa polidaape guye hayqidi ba aawatara moogetidi wooqis. 37 Shin Xoossay hayqope denthidaysi wooqibeenna.

38 “Hessa gisho, ta ishato, nagara atotethay Yesuusa baggara kasetidi hintew odetidaysa erite. Muse higgey nagaraape xillisanaw danda7enna. 39 Shin Yesuusa ammaniya ubbay nagaraape xillees. 40 Hessa gisho, nabeti gidaysi hinte bolla gakonna mela naagetite.

41 “ ‘Xoossay gidaba leqiseysato!

Be7ite! Malaaletite! Dhayite!

oonika odin, hinte ammanonna oosuwa

taani hinte wodiyan oothana’ ” yaagis.[p]

42 Phawuloosinne Barnabaasi Ayhude Woosa keethafe keyishin, kaalliya Sambaatan hessa gujidi odana mela asay entana woossidosona. 43 Shiiqoy laaletidaape guye, daro Ayhudetinne Ayhudeta ammanuwan gelidi Xoossaa goyinniya daroti Phawuloosanne Barnabaasa kaallidosona. Ammanidaysati Xoossaa aadho keehatethan minnidi daana mela enta zoridosona. 44 Kaalliya Sambaatan kataman de7iya asaape daroti Xoossaa qaala si7anaw shiiqidosona. 45 Shin Ayhudeti daro asaa be7ida wode Phawuloosa qanaatidi iya haasaya ixidi iya cayidosona.

46 Phawuloosinne Barnabaasi yayyonna, “Xoossaa qaalay koyrottidi hintew odetanaw koshshees. Shin hinte qaala ixidi merinaa de7uwa ekanaw nuus bessenna gidi hinte, hinte huuphen pirdida gisho hiza nuuni Ayhude gidonaysatako simmoos. 47 Gaasoyka Goday,

“ ‘Alame kumethay ne baggara attana mela,

taani nena Ayhude gidonna deriyas poo7o oothas’ yaagidi nuna kiittis” yaagidosona.[q]

48 Ayhude gidonnaysati hessa si7ida wode ufaytidi Xoossaa qaala bonchidosona. Qassi merinaa de7uwas dooretida ubbay ammanidosona. 49 Godaa qaalay he biitta ubbaa gakis. 50 Shin Ayhudeti, Ayhude gidonna Xoosse goyinniya dure maccasatanne kataman de7iya gita asata Phawuloosa bollanne Barnabaasa bolla denthethidosona. He asati enta goodda doomidi banta biittafe kessidosona. 51 Shin Phawuloosaranne Barnabaasara ixeysatas malla gidana mela banta tohuwape baana pitidi Iqoniyoone katama bidosona.[r] 52 Qassi Anxooken de7iya ammaneysati Geeshsha Ayyaananinne ufaysan kumidosona.

<- Hawaareta Ooso 12 Hawaareta Ooso 14 ->