2 Ximotiyoosa Kiita 2

Yesuus Kiristoosan Minna

1 Hiza, ta na7aw, Kiristoos Yesuusan de7iya maarotethan minna. 2 Daro markata sinthan taani nena tamaarsida timirtiya, harata tamaarsanaw danda7iya ammanetida asaas hadara imma.

3 Yesuus Kiristoosas ammanthiya wotaadare gidada taara meto eka. 4 Ola wotaadarey ba tora mocona ufaysanaw giigeteesipe attishin, hara ooson bana peeshshenna. 5 Hessadaka, gaadde woxiya oonika bessiya ogera gaaddetonna ixiko woyto ekenna. 6 Goshshan daaburiya goshshanchoy ba daabura ayfiyape miya koyro asi gidanaw bessees. 7 Ne akeekana mela Goday nena maaddana gisho, ta new odidaba ne wozanan naaga.

8 Taani markatiya Wongela mela hayqope dendida, Dawita koche gidida Yesuus Kiristoosa qopa. 9 Taani wongela odiya gisho, iitabaa oothida asada, qashetada meto ekayis. Shin Xoossaa qaalay qashetenna. 10 Hessa gisho, Xoossay doorida asati Kiristoos Yesuusan de7iya atotetha merinaa bonchuwara ekana mela enta gisho ubbaban waayetayis.

11 Haysada giya tuma qaali de7ees;

“Nuuni iyara hayqidaba gidiko,

Iyara issife de7ana.

12 Nuuni genciko,

iyara issife kawotana.

Nuuni iya kaddiko,

I nuna kaddana.[a]

13 Nuuni ammanetona ixiko,

I ammanetidaysa gididi daana.

Ayis giiko, I bana

kaddanaw danda7enna” yaagees.

Mino Oosancho

14 Neeni enta haysa akeekisa; enti qaalata gaason palamonna mela, Godaa sinthan enta zora. Hessi si7eyisata dhaysesipe attishin, aykoka maaddenna. 15 Neeni tuma qaala suuretethan tamaarseysanne yeellayonna oosancho gidada, Xoossay nashshiya asada, nenatethaa iyaw immanaw minna. 16 Shin ha alamiyas injetiya go77onna odape baqata. Hessa mela oday ase Xoossaafe haassees. 17 Hessa mela oday asatethi midigiya paxonna woyzazire maduntha mela. Hessa mela odaa odeteyisata giddofe Hemeneyoosinne Filixoosi de7oosona. 18 Ha asati tuma ogiya aggidi, “Hayqida asay hayqope beni dendidosona” yaagidi guutha asata ammanuwa dhaysidosona.

19 Gidoshin, Xoossay mino zaalla hiixida gisho qaaxanaw danda7enna. Iya bolla, “Goday ba asaa erees. Godaa sunthaa xeegiya oonika iita oosope haako” giya qaalay xaafetis.[b]

20 Issi gita keethan worqafe woyko birape oosetida miisheta xalaala gidonashin, mithafe woyko urqafe oosetida miishetika de7oosona. Hessatape baggati boncho oosos, qassi baggati tooshetiya oosos pee7osona. 21 Hessa gisho, oonika iita ubbaa aggikonne bana geeshshiko, boncho ooso oothiya miishe gidana. Enta de7oy geeshshinne Godaa ufaysiyabaa, qassi enti lo77o ooso ubbaa oothanaw danda7eyisata gidana.

22 Na7atetha iita amuwape baqata. Geeshsha wozanan Godaa xeegiya asatara issife, xillotethaa, ammanuwa, siiqonne sarotethaa kaalla.

23 Shin ooshshi medheysa erada eeyatethinne hada gidida palamape haaka. 24 Godaa oosanchoy asa ubbaas keeha, lo77o tamaarseysanne danda7ancho gidanaw besseesipe attishin, ooyetanaw bessenna. 25 I baara eqeteyisata ashketethan seereysa gidanaw bessees. Enti banta nagaraape simmidi tumaa eranaada Xoossay oothaneko ooni eri. 26 Enti banta wozanaako simmidi ba sheniya oothana mela enta oykida Xalahe xihiyape kessi ekana.

<- 2 Ximotiyoosa Kiita 1 2 Ximotiyoosa Kiita 3 ->