1 Dawiti baara de7iya asaa taybidi shaalaqatanne mato halaqata enta bolla shuumis. 2 Dawiti asa heedzu cugan shaakis; issi cugaa Iyo7aabi, nam7antho cugaa Iyo7aaba ishay, Xaruya na7ay Abisi, heedzantho cugaa Gaate addey Itayi kiittees. Kawoy asaako, “Tuma ta hintera issife baana” yaagis.

3 Shin asay, “Neeni baanaw bessenna! Nuuni baqatiyako enti nuna koyokona; hari attoshin nuupe baggay hayqiyakoka nubaa wuda gookona. Shin neeni ne xalaala tammu mukulupe daraasa. Hessa gisho, neeni kataman uttada nuus maado kiittiko lo77o” yaagis.

4 Kawoy, “Hintena lo77iyaba ta oothana” yaagis.

Dawiti dirsa pengiya matan eqidi, asa ubbay xeetaninne mukulan salpidi keyishin be7is. 5 Kawoy Iyo7aaba, Abisanne Itaya, “Ta gisho gidi, he na7atetha addiya Abeseloome qohopite” yaagidi kiittis. Kawoy hessa halaqatas odiya wode olanchoti ubbay si7idosona.

6 Dawita olanchoti Isra7eeletara oletanaw Efreema woran salpidosona. 7 He bessan Dawita olanchoti Isra7eele olanchota xoonidosona. He gallas daro asi wuris, laatamu mukulu asi hayqis. 8 Olay gaxare ubbaa gakis; he gallas wori wursida asay mashshi wursida asaape daro.

9 Abeseloomey qoponna de7ishe Dawita asaara gahetis. Abeseloomey ba baquluwa toggidashin daashsha wola garsi baquloy gelin, Abeseloome huuphey mithan oyketis. I toggida baquloy iya tohuwa garsafe bin, Abeseloomey carko bolla kaqatidi attis. 10 Asaape issoy hessa be7idi, “Abeseloomey issi wola bolla kaqetidaysa ta be7as” yaagidi Iyo7aabas odis.

11 Iyo7aabi baw odida addiya, “Yee, be7as gay? Yaatin ayis iya wodhabikii? Ne hessa oothidaba gidiyako, taani new tammu bira santimenne issi saqe immanashin” yaagis.

12 Addey zaaridi, “Neeni mukulu bira santime ta kushen wothiyakoka taani kawa na7aa bolla ta kushiya denthike! Nuuni ubbay si7ishin, kawoy nena, Abisanne Itaya, ‘Ta gisho gidi, na7atetha Abeseloome qohopite’ yaagidi kiittis. 13 Taani kawa kiitta ixada Abeseloome wodhidaba gidiyako, kawoy ubbaa si7eysada hessa si7anaysi attenna. He wode neeni haaki eqiya asaape issuwa gidana” yaagis.

14 Iyo7aabi, “Taani neera odetashe wode wursike” yaagidi heedzu toora ekidi, Abeseloomey wolaa bolla kaqetidi, paxa de7ishin wozana ayfen caddis. 15 Iyo7aaba ola miishiya tookiya tammu asati Abeseloome yuushuwa teqidi iya shocidi wodhidosona.

16 Hessafe guye, Iyo7aabi olaa essanaw moyze punnin asay Isra7eeleta yedetheysa aggis. 17 Enti Abeseloome efidi woran de7iya gita ollan yeggidi, gita shuchu iya bolla dooridosona. He wode Isra7eele asa ubbay ba soo soo baqatis.

18 Abeseloomey paxa de7ishe, “Ta sunthan xeegetiya adde na7i taw baawa” yaagidi, bana qofisiya shuchu massida hawulte kawo zangaaran essidi he hawultiya ba sunthan xeegis. Hachi gakanaw he hawultey “Abeseloome hawultiya” geetetees.

19 Hessafe guye, Saadoqa na7aa Akimaasi Iyo7aabako, “Iya morketa kushepe Goday iya ashshida mishiraachuwa sissanaw taani kawako woxa bada odana” yaagis.

20 Iyo7aabi, “Akay! Hachi neeni mishiraacho odiya gallas gidenna; hara gallas odanaw danda7aasa. Kawa na7ay hayqida gisho hachi odanaw koshshenna” yaagis.

21 Iyo7aabi Tophe asi gidida issi addiya xeegidi, “Bada, ne be7idaba kawas oda” yaagis. He addey Iyo7aabas gufanni ziggidi woxis.

22 Saadoqa na7ay Akimaasi nam7antho Iyo7aabako, “Aybika hano; taani ha Tophe addiya geedo woxana” yaagis.

Iyo7aabi, “Ta na7aw, new woytoy baynaban ayis woxanaw koyay?” yaagis.

23 Akimaasi, “Aybika hano; taani woxanaw koyayis” yaagis.

Iyo7aabi, “Yaako woxa” yaagis. Hessa gisho, Akimaasi demba ogiya oykidi woxishe bidi Tophe addiya yeggidi aadhis.

24 Dawiti soo pengiyafenne kare pengiyafe giddon uttidashin, naagiya uray keethaa bolla keyidi, issi addey barka woxishe yeysa be7is. 25 Naagiya uray kawa xeegidi odis.

Kawoy, “I barka de7iko, mishiraacho ekidi yees” yaagis. Woxiya addey entako matishe yis.

26 Naageysi hara woxiya asi be7idi pengiya naagiya addiyako, “Hara asika barka woxishe yees” yaagis.

Kawoy, “Ha addeyka qassi mishiraacho ekidi yees” yaagis.

27 Naageysi, “Koyro addiya wothay Saadoqa na7aa Akmaasa wotha taw daanees” yaagis.

Kawoy, “I lo77o asi; I lo77o odara yees” yaagis.

28 Akimaasi kawa xeegidi, “Ubbabay lo77o!” yaagis. Kawa sinthan gufanni ziggidi, “Ta godaa, kawa bolla banta kushiya denthida asata new aathidi immida Goday, ne Xoossay galatetto” yaagis.

29 Kawoy, “Na7atethay, Abeseloomey saro?” yaagidi oychis.

Akimaasi, “Iyo7aabi tana kiittana haniya wode wolqaama waaso si7as, shin I aybeko taani erabike” yaagis.

30 Kawoy, “Yaa shiiqa eqa” yaagin I haakidi eqis.

31 Hessafe guye, Tophe addey gakidi, “Ta godaw, kawaw, ta new mishiraacho odayis! Ne bolla dendiya ubbaa kushepe Goday hachi nena ashshis” yaagis.

32 Kawoy Tophe addiyako, “Na7atetha addey Abeseloomey saro?” yaagidi oychis.

Tophe addey, “Ta godaw, kawaw, ne morketinne ne bolla iitabaa oothanaw dendeysati ubbay he na7atetha addiyada hanona” yaagis.

33 Kawoy daro azzanis; pengiyafe qommo baggan de7iya keethaa gelidi yeekis. Kawoy, “Yii, ta na7aw Abeseloome taassa! Ta na7aw taassa! Ne gisho ta hayqarkina! Yii, ta na7aw Abeseloome taassa!” yaagidi yeekis.

<- 2 Sameela Maxaafa 172 Sameela Maxaafa 19 ->