2 Sameela Maxaafa
Gaatha Qofa
Nam7antho Sameela Maxaafay, koyro Sameela Maxaafa kaallees. Ha maxaafay, Dawiti koyro dugeha baggan de7iya Yihuda kawo gididi (shem 1-4), qassi guuthu gam7idi, pudeha baggan de7iya Isra7eele gujidi kumetha biitta kawo gididi haarida taariketa odees (shem 5-24). Dawiti ba kawotetha dalgisanawunne ba maata minthanaw sooranne karera de7iya morketara oletida olaa loythidi qoncisees.
Dawiti xoossa keethi keexanaw koyis, shin hessa oothana mela Xoossi dosibeenna woyko koybeenna (7:1-3).
Xoossi Dawitara caaqidaba gidikoka, I, Ooriyo mache Bersaabira laymatida wode iya kawotethaynne iya soo asay meto bolla wodhidosona (shem 13-18; 20-21). Hessa gaason, iya soo asa giddon iitabay medhetis; iya naytape daroti hayqidosona.
Dawiti oothida gita oosotape guuthati, Isra7eele kawotetha hara kawotethati qohonna mela naagis (1 Same 31); tammanne nam7u Isra7eele kochati issife daana mela oothis; kawotetha aqo woga wothis (2 Same 8:15-18). Dawiti ba duussan nagari woyko borey bayna asi gidenna, shin issi tuma Xoossafe attishin hara xoossi goyinnibeenna. Yihuda kawotethay eqidi de7ida wode ubban, Xoossay Dawitas caaqida caaquwa naagis.
Maxaafa Ayfe Qofata
Dawiti Saa7olas yeehuwa (1:1-27)
Dawiti Yihuda bolla kawotuwa (2:1—4:12)
Dawiti Isra7eele ubbaa bolla kawotuwa (5:1—6:23)
Xoossay Dawitas caaqida caaquwa (7:1-29)
Dawiti oletida ola (8:1—10:19)
Dawitanne Bersaabo (11:1—12:31)
Dawita son medhetida geellatetha (13:1—14:33)
Abeseloome geellatethanne hara hanotata (15:1—21:22)
Nam7u Dawita mazmureta (22:1—23:7)
Dawita toora moconata (23:8-39)
Dawiti Isra7eele asaa taybuwa (24:1-25)

Dawiti Saa7ola Hayquwa Si7is

1 Saa7oli hayqidaape guye, Dawiti Amaaleqata xooni simmidi Xiqilaagan nam7u gallas gam7is. 2 Heedzantho gallas issi addey ba ma7uwa daakidi, ba huuphen baana qolidi, Saa7oli dunkaanida gutaape yis. I Dawitako yidi sa7an gufannidi ziggis. 3 Dawiti, “Neeni awape yadii?” yaagidi oychis.

I zaaridi, “Taani Isra7eeleti dunkaanida gutaape kessa ekada yas” yaagis.

4 Dawiti, “Ane hanidaba taw oda” yaagis.

I zaaridi, “Nu olanchoti olape baqatidosona; nu asaape daroti hayqidosona; Saa7olinne iya na7ay Yoonataani hayqidosona” yaagis.

5 Dawiti iyaw odida panthaa, “Saa7olinne iya na7aa Yoonataani hayqidaysa neeni aybin eray?” yaagidi oychis.

6 Panthay, “Taani Gilbo7a deriya bolla de7ishin, Saa7oli ba toora guufetidi eqidaysa be7as; para gaaretinne para asati Saa7olako matatidosona. 7 He wode Saa7oli guye simmidi tana demmidi xeegis. Taani, ‘Yee’ yaagada koyas. 8 Saa7oli, ‘Neeni oonee?’ yaagidi oychin, ‘Taani Amaaleqa asi’ yaagada zaaras. 9 Hessafe guye, Saa7oli, ‘Taani madunxada, hayqos gakas; neeni ta bolla keyiya eqada tana wodha’ yaagis. 10 I kundidaape guye hayqope attonnaysa erida gisho taani iya bolla keya eqada iya wodhas. Iya huuphen de7iya kallachanne iya qesen de7iya ambaariya ekada neeko ta godaako yas” yaagis.

11 Dawitinne Dawita asay kayotidi, banta ma7uwa daakidosona. 12 Enti Saa7oli, Yoonataani, Godaa olanchotinne Isra7eele asay olan wurida gisho omarsi gakanaw kayotidosona; yeekidosona; xoomidosona.

13 Dawiti hessa entaw ehida panthaa, “Ne awupe yadii?” yaagidi oychis.

I zaaridi, “Taani bete asi gididi de7iya Amaaleqa addiya na7a” yaagis.

14 Dawiti, “Goday tiyida kawa wodhanaw ne kushiya denthashe waanada yayyabikii?” yaagis. 15 Dawiti ba asatape issuwa xeegidi, “Iya wodha” yaagin, I Amaaleqa panthaa caddidi wodhis. 16 Dawiti Amaaleqa addiyako, “Goday tiyida kawa taani wodhas” yaagada “Neeni ne doonan markatida gisho ne suuthaa gomey nena oyko” yaagis.

Dawiti Saa7olasinne Yoonatanas Yeekis

17 Dawiti Saa7olasinne iya na7aa Yoonatanas haysada yaagidi zeleelis. 18 Yihuda asay, “Donge yeeho” geetetiya ha zelelsa tamaarana mela kiittis; ha zelelsay Yaashara[a] maxaafan xaafetis.

19 “Neno Isra7eele, ne halaqati,

dhoqa bessan hayqidosona.

Wolqaamati waanidi kundidona!

20 Filisxeeme macca nayti hessa si7idi ufaytonna mela,

qaxaretiboona asaa macca nayti hashshu goonna mela,

haysa Gaate kataman odopite

Asqaloona ogetan awaajofite.

21 Hinteno Gilbo7a dereto,

hinte bolla iri bukofo; aki wodhofo.

He bessan wolqaamata gondalley tunida gisho,

Saa7ola gondalley zayten qushetiboona gisho,

he gadiyan kathi dolopo.

22 Goyretidaysata suuthaafe,

wolqaamata modhuwafe,

Yoonataana dongey guye gibeenna;

Saa7ola mashshay kallonna simmibeenna.

23 Saa7olinne Yoonataani doseteyisata;

hayqoninne paxan shaaketibookona.

Enti arganthafe aadhidi eeso;

gaammofe aadhidi mino.

24 Hinteno Isra7eele maccasaw,

zo7onne alleeqo ma7o mayzidaysas,

hinte ma7uwa worqan alleeqisida Saa7olas yeekite.

25 Wolqaamati olan waanidi kundidona?

Yoonataani dhoqa bessan hayqis.

26 Ta ishaa Yoonataana, ta new azzanayis;

ne taw daro al7o.

Neeni tana dosiya dosoy malaalsees;

macca siiqopeka aadhees.

27 Wolqaamati waanidi kundidona?

Ola miisheyka waanidi dhayidee?”

yaagidi Dawiti zeleelis.

2 Sameela Maxaafa 2 ->