1 Ta siiqo ishato, haysi ta hintew xaafida dabdaabey nam7antho. Taani ha nam7u dabdaabetaka hintew xaafiday, hinte suure qofaa qopanaada hintena denthethanaasa. 2 Qassi geeshsha nabeti beni odida qaalanne nuna ashshiya Goday, hawaareta baggara kiitida kiitta hinte hassayana mela koyayis. 3 Ubbaafe kasetidi, wode wursethan banta amuwa kaallidi ase toocheysati, toochishe yaanaysa erite.[a] 4 Enti, “Ta yaana gidaysi awun de7ii? Nu aawati hayqidosona, shin ubbabay sa7i medhetoosape doomidi de7eysada de7ees” yaagosona. 5 Daro wodepe kase saloy Xoossaa qaalan medhetidaysa; qassi sa7i haathafenne haathan medhetidaysa erishe kaddoosona.[b] 6 He wode de7iya sa7ay haathan mitetidi dhayis.[c] 7 Shin ha77i de7iya saloynne sa7i, geellati pirdetiya gallasaynne dhayiya gallasay gakanaw he qaalan tamas naagetidi de7oosona.

8 Shin ta siiqo ishato, ha issiba dogopite. Godaa matan issi gallasi mukulu laytha mela gideysanne mukulu laythi issi gallasa mela gideysa dogopite.[d] 9 Issoti issoti gam7is gidi qopeysada, Goday ba ufaysa qaala gisho gam7enna. Shin oonika dhayonna mela koyidi, ubbay banta nagaraape simmana mela hinte gisho gidi gencees.

10 Shin Godaa gallasay kaysoda yaana. He gallasan saloti wolqaama guunthan dhayana; salo medhetethati taman xuugetana; sa7inne iya bolla de7iya ubbay dhayana.[e] 11 Hiza, ubbabay hessada hanida dhayiyaba gidiko hinte ay mela asi gidanaw bessii? Hinte geeshshinne Xoossaa daaniya de7o daanaw bessees. 12 Hinte sinthara yaa Xoossaa gallasaa naagishe hintew danda7etiyaba ubbaa oothidi he gallasaa eesoyite. He gallas salotinne iyan de7iyabay taman xuugetana; wolqaama suulan til7ana. 13 Shin nuuni xillotethi haariya ooratha salonne ooratha sa7a Xoossaa ufaysa qaalada naagoos.[f]

14 Hessa gisho, ta siiqo ishato, nu he gallasaa naagiya gisho pokoynne borey baynayisata gididi, Godaara saron daanaw minnite. 15 Asi ubbay attana mela koyidi Goday danda7eysa dogopite. Qassi nu siiqo ishay, Phawuloosi, Xoossay iyaw immida cincatethan hessada hintew xaafis. 16 I ba dabdaabeta ubban hessataba xaafis. Iya dabdaabeta giddon akeekanaw waaysiya qofati de7oosona. Tamaariboonnanne minniboonna asati hara Xoossaa qaala mirqeysada ha kiitataka dhayanaw machidi mirqoosona.

17 Hessa gisho, ta siiqo ishato, hinte hessa eriya gisho makallata balan cimetidi, dhayonna melanne minnidi de7iya bessaafe kundonna mela naagetite. 18 Shin hinte nuna ashshiya nu Godaa, Yesuus Kiristoosa aadho keehatethaaninne eratethan diccite. Iyaw ha77ika merinawuka bonchoy gido. Amin7i.

<- 2 Phexroosa Kiita 2