1 Kawoy Hizqiyaasi hessa si7ida wode, ba ma7uwa daakidi, kayo ma7o ma7di, Xoossa keethi gelis. 2 Kawo gadho aawatethan aysiya Eliyaqeemi, waanna xaafey Saminasinne cima kahineti kayo ma7o ma7idi, Amoxe na7aa nabiya Isayaasako baana mela kiittis. 3 Enti Isayaasako bidi, “Hizqiyaasi haysada yaagees; ‘Hachi gallasay meto gallas, seera gallasinne yeella gallas. Hessika na7i yeletanaw wodey gakin, bannakada yelanaw wolqi dhayda maccasa mela. 4 De7o Xoossaa cayana mela, iya goday, Asoore kawoy, kiitida toora mocona qaala ubbaa, Goday ne Xoossay si7onna aggenna. Qassi Goday, ne Xoossay he si7ida qaala gaason iya seeronna aggenna. Hessa gisho, nu asaa giddofe palahidi attidaysatas woossa’ ” yaagidosona.
5 Kawa Hizqiyaasa aylleti Isayaasako bida wode, 6 Isayaasi enta haysada yaagis; “Hinte godaas haysada yaagidi odite; ‘Asoore kawa aylleti tana cayishin, neeni si7ida cashsha qaalas yayyofa. 7 Heko, taani iya giddo issi ayyaana yeddana; I he woriya si7idi ba biitta simmana. I ba biitta bidi, yan mashshan hayqanaada oothana’ ” yaagis.
8 Asoore kawoy Laakiso katamaape dendidi bidaysa Asooreta toora moconay si7idi, guye simmidi kawoy Libina kataman oleteysa demmis.
9 Kawoy Sanakreemi, “Heko, Tophe kawoy Tirhaaqi nena olanaw yis” giya woriya si7idi, Hizqiyaasas haysada yaagidi kiittis. 10 “Yihuda kawaw Hizqiyaasa, neeni ammanetiya xoossay, ‘Yerusalaamey Asoore kawa kushen gelenna’ yaagidi cimmofo. 11 Asoore kawoti biitta ubbaa dhaysidi, oothidaba neeni si7adasa. Yaatin, neeni attana daanii? 12 Beni ta mayzati dhaysida biitta xoossati, hessatika, Gozaana, Kaaranenne Rafeesa biitta xoossatinne Talasaaran de7iya Edene xoossati he biitta dhayope ashshidonaa? 13 Hamaata kawoy, Arfada kawoy, Safarwayma kawoy, Heena kawoynne Iwa kawoy awun de7oona?” yaagidi kiittis.
14 Hizqiyaasi dabdaabiya kiitetida asaape ekidi nabbabis. Dabdaabiya Xoossa keethi efidi, Godaa sinthan miccis. 15 Yaatidi, Godaa haysada yaagidi woossis; “Abeeti Godaw, kiruubetape giddon uttiya Isra7eele Xoossaw, sa7aa kawotethata ubbaa bolla ne xalaali Xoosse; saluwanne sa7aa neeni medhadasa.[a] 16 Abeeti Godaw, ne haythaa haa zaarada si7a. Abeeti Godaw, ne ayfiya dooyada xeella. Nena, de7o Xoossaa cayanaw Sanakreemi yeddida qaala si7a. 17 Abeeti Godaw, Asoore biitta kawoti kawotethatanne enta biitta dhayseysi tuma. 18 Enta xoossata taman xuuggidi dhaysidosona; enta xoossati kaseka asaa kushey massidi kessida mithinne shuchu gidiya gisho, tuma xoossata gidokona; hessa gisho, enti enta dhaysidosona. 19 Abeeti Godaw, ne xalaali Xoosse gideysa sa7aa kawotethati ubbay erana mela, ha77i zaarada, Godaw, nu Xoossaw, neeni nuna iya kushepe ashsha” yaagidi woossis.
20 Hessafe guye, Amoxe na7ay Isayaasi Hizqiyaasako haysada yaagidi kiittis; “Goday Isra7eele Xoossay haysada yaagees. Neeni Asoore kawa Sanakreema gaason tana woossida woosa si7as.”
21 Goday Sanakreemaba haysada yaagees.
29 Isayaasi kawa Hizqiyaasako haysada yaagis; “Haysi poletanaysas malaatay haysa; ha laythi hinte aasebo kaxida kathi maana; laythi qassi ha laythi kaxida aasebo maana. Shin kaalliya laythi hinte, hintew zeritenne cakite; woyne tokitenne iya miite. 30 Yihuda asaape attidaysati xapho yeddidi, ayfe ayfiya mitha mela gidana. 31 Attidaysati Yerusalaamepe keyana, palahidaysati Xiyoonepe yaana. Ubbaafe Wolqaama Godaa mishay hessa oothana.
32 “Hessa gisho, Asoore kawuwaba Goday haysada yaagees; ‘Asoore kawoy ha katama gelenna; woyko haysan ba donge dukenna. I ba gondalliya oykidi, ha katama sinthe aadhenna; woyko katama yuushuwa biitta dooren teqetenna. 33 Asoore kawoy ba yida ogiyara guye simmana; I ha katama gelenna. Taani Goday haysa odas.’ 34 Taani ta bonchuwa gishonne ta aylliya Dawita gisho, ha katama teqada ashshana” yaagis.
35 He qamma Godaa kiitanchoy keyidi, Asoore asay dunkaanida bessan issi xeetanne hospun tammanne ichashu mukulu addeta wodhis. Yaatin asay wonta dendidi be7iya wode, Heko, ahi heeran kumis. 36 Asoore kawoy Sanakreemi dendidi, guye simmi bidi, Nanawe kataman uttis. 37 Issi gallas Sanakreemi ba xoossaa Nasaraaka Eeqa Keethan goyinnishin, iya nayti Adramelekinne Sarsari mashshan iya wodhidi, Araraate biitta baqatidosona. Iya na7ay Asradooni iya bessan kawotis.
<- 2 Kawota Maxaafa 182 Kawota Maxaafa 20 ->- a Kessa 25:2.