2 Kawota Maxaafa 15

Yihuda Kawa Azaariyasa

(2 Taari 26:1-23)

1 Isra7eele kawoy Iyorbaami kawotida laatamanne laapuntha laythan, Yihuda kawa Amasiyaasa na7ay Azaariyasi kawotis. 2 I kawotida wode, iyaw laythi tammanne usupuna; I Yerusalaamen ishatammanne nam7u laythi kawotis. Iya aaye sunthay Yikoolo; iya Yerusalaame maccas. 3 Iya aaway Amasiyaasi oothidaysada, ika Godaa sinthan suureba oothis. 4 Gidoshin, he bessan yarsho yarsheysanne ixaane cuyiseysa asay aggiboonna gisho, dhoqa goyinno bessata dhaysibeenna; 5 Goday Azaariyasa guutha goga hargen oythis; hayqana gakanaw he hargey iya yeddiboonna gisho, dumma keethan barka de7is. He wode kawa na7ay Iyo7atami kawo gadhon de7idi, biitta haaris.

6 Azaariyasi hanida harabaynne I oothidaba ubbay Yihuda Kawota Taarike Maxaafan xaafetis. 7 Azaariyasi hayqidi, ba mayzata gakis; Dawita Kataman ba mayzatara moogetis. Iya bessan iya na7ay Iyo7atami kawotis.[a]

Isra7eele Kawa Zakaryaasa

8 Yihuda kawoy Azaariyasi kawotida hastamanne hospuntho laythan, Iyorbaama na7ay Zakaryaasi Isra7eele bolla Samaaren kawotis; I usupun ageena kawotis. 9 Iya mayzati oothidaysada, ika Godaa sinthan iitabaa oothis; Nabaaxa na7ay Iyorbaami Isra7eele asa oosisida nagaraa ooso aggibeenna. 10 Iyabeesa na7ay Saloomi Zakaryaasa bolla maqetidi, Yiblaama geetetiya bessan wodhidi iya bessan baw kawotis.

11 Zakaryaasi hanida harabaynne I oothidaba ubbay Isra7eele Kawota Taarike Maxaafan xaafetis. 12 Hessada hanidi, Goday Iyyus, “Ne kochay oyddantho yeleta gakanaw, Isra7eele kawotetha araatan uttana” yaagidi odida qaalay poletis.[b]

Isra7eele Kawa Salooma

13 Yihuda kawoy Ooziyani kawotida hastamanne uddufuntho laythan, Yaabesa na7ay Salumi kawotis; I Samaaren issi ageena kawotis. 14 Gaade na7ay Minaheemi Tirsa katamaape Samaare bis. Samaaren de7iya Yaabesa na7aa Saluma wodhidi iya bessan baw kawotis.

15 Salumi hanida harabaynne I maqetida maqoy Isra7eele Kawota Taarike Maxaafan xaafetis. 16 He wode Minaheemi Tirsafe dendidi, Tifisanne, yan de7iya asaanne katamaa heeran de7iya biittata ubbaa olis. Enti banta katamaa dirsa pengiya iyaw dooyonna ixida gisho, Tifisa olidi dhaysis; qassi yan de7iya qantha maccasa ubbaa uluwa daakis.

Isra7eele Kawa Minaheema

17 Yihuda kawoy Azaariyasi kawotida hastamanne uddufuntho laythan, Gaade na7ay Minaheemi Isra7eele bolla kawotis; I Samaaren tammu laythi kawotis. 18 I Godaa sinthan iitabaa oothis; Nabaaxa na7ay Iyorbaami Isra7eele asaa oosisida nagaraape haakibeenna.

19 Hessafe guye, Asoore kawoy Telgeltelfelisoori Isra7eele bolla dendis. Kawotethan bana minthana melanne maaddana mela, Minaheemi Telgeltelfelisooras 34,000 kilo giraame bira santime immis. 20 Minaheemi he miishiya Isra7eele asaa wolqan kessis; Asoore kawas immanaw dure asi ubbay issoy issoy ishatamu bira santime kessidosona. Hessada oothin, Asoore kawoy Isra7eele biitta aggidi, ba biitta simmis.

21 Minaheemi hanida harabaynne I oothidaba ubbay Isra7eele Kawota Taarike Maxaafan xaafetis. 22 Minaheemi hayqidi, ba mayzatan gahetis; iya bessan iya na7ay Paqsiyaasi kawotis.

Isra7eele Kawa Faqsiyaasa

23 Yihuda kawoy Azaariyasi kawotida ishatamantho laythan, Minaheema na7ay Paqsiyaasi Isra7eele bolla Samaaren kawotis; I nam7u laythi kawotis. 24 Paqsiyaasi Godaa sinthan iitabaa oothis; Nabaaxa na7ay Iyorbaami Isra7eele asa oosisida nagaraa ooso aggibeenna. 25 Iya toora moconatape issoy, Ramala na7ay Paaquhey iya bolla maqetidi dendis. Galada asaape ishatamu addeta baara ekidi, Samaaren kawo gadhon de7iya miixaa gelis. Paaquhey, Paqsiyaasa, Argobanne Ariya issife wodhidi iya bessan baw kawotis.

26 Paqsiyaasi hanida harabaynne oothidaba ubbay Isra7eele Kawota Taarike Maxaafan xaafetis.

Isra7eele Kawa Faaquhe

27 Yihuda Kawoy Azaariyasi kawotida ishatammanne nam7antho laythan, Ramala na7ay Paaquhey Isra7eele bolla Samaaren kawotis; I laatamu laythi kawotis. 28 Paaquhey Godaa sinthan iitabaa oothis; Nabaaxa na7ay Iyorbaami Isra7eele asaa oosisida nagaraape haakibeenna.

29 Isra7eele kawa Paaquhe wodiyan Asoore Kawoy Telgeltelfelisoori yidi, Iyoona, Abeel-Beet-Ma7ika, Yanoha, Qaadesanne Haxoora olidi oykis; qassi Galada, Galilanne Niftaaleme biitta ubbaa olidi, asaa di77idi Asoore biitta efis.

30 Azaariyasa na7ay Iyo7atami kawotida laatamantho laythan, Ela na7ay Hosey Ramala na7aa Paaquhe bolla maqetidi wodhidi, iya bessan baw kawotis.

31 Paaquhey hanida harabaynne oothidaba ubbay Isra7eele Kawota Taarike Maxaafan xaafetis.

Yihuda Kawa Iyo7atama

(2 Taari 27:1-9)

32 Ramala na7ay, Isra7eele kawoy Paaquhey kawotida nam7antho laythan, Yihuda kawa Azaariyasi na7ay Iyo7atami kawotis. 33 Iyo7atami kawotiya wode iyaw laythi laatamanne ichasha; I Yerusalaamen tammanne usupun laythi kawotis. Iya aaye sunthay Yarusho; Yarusha Saadoqa na7iw. 34 Ba aaway Azaariyasi oothidaysada, Iyo7atami Godaa sinthan suureba oothis. 35 Gidoshin, he bessan yarshonne ixaane cuyisethi aggiboonna gisho, asay dhoqa goyinno bessata dhaysibeenna. Iyo7atami Xoossa keetha geliya qommo bagga pengiya zaaridi keexis.

36 Iyo7atami hanida harabaynne oothidaba ubbay Yihuda Kawota Taarike Maxaafan xaafetis. 37 He wode Goday Araame kawa Ra7asoonanne Ramala na7aa, Isra7eele kawa Paaquhe Yihuda biitta olana mela denthethis. 38 Iyo7atami hayqidi, ba aawa Dawita Kataman ba mayzatara moogetis; iya bessan iya na7ay Akaazi kawotis.

<- 2 Kawota Maxaafa 14 2 Kawota Maxaafa 16 ->