Yohaanisi Xaafida
Nam7antho Kiita
Gaatha Qofa
Yohaanisi xaafida nam7antho kiita, Yesuusa hawaare gidida cimay, Yohaanisi xaafis. Ha kiitay xaafetiday dooretida godatesanne I naytasa. Ha qantha kiitay xaafetiday,
1. Enti issoy issuwara siiqetana mela akeekisanaasa;
2. Wordo astamaaretapenne enta timirtiyafe naagetana mela qofisanaasa.
Maxaafa Ayfe Qofata
Sarothonne woosa (1-3)
Siiqonne tumatethi (4-6)
Wordo timirtefe naagetethi (7-11)
Sarotho (12-13)

1 Ta cimay dooretida godatesinne I naytas kiitida kiita. Ta xalaala gidonashin, tumaa eriya ubbay hintena dosoosona. 2 Ha tumay nunan de7iya gishonne merinaw nuura daana gisho taani hintena tuma dosayis.

3 Xoossaa nu Aawanne iya Na7aa Yesuus Kiristoosa aadho keehatethay, maarotethaynne sarotethay tumanine siiqon issife nuura gido.

Tumanne Siiqo

4 Aaway nuna kiittidaysada, ne naytape baggati, tumaas kiiteteysa be7ada taani daro ufaytas. 5 Godate, ha77ika nuuni ubbay issoy issuwa siiqana mela taani nena woossayis. Ha kiitay koyrope nuura de7iya kiitaape attishin, taani new ooratha kiita xaafike.[a] 6 Tuma siiqoy nuuni Xoossaa kiitaa naagidi daanaysa. Qassi koyrope hinte si7idaysada iya kiitay, hinte ubbay siiqon daana melasa.

7 Yesuus Kiristoosi ase gididi yidaysa ammanonna, daro balethiya asati, alamen dendidosona. Hessa mela asi oonika baletheysanne Kiristoosa morke. 8 Hinte oothida kumetha woytuwa ekanaw minnite. Hinte oothidaysi dhayonna mela naagetite.

9 Kiristoosa timirtiyan doonnaysasinne iyape haakiya uraas Xoossay baawa. Kiristoosa timirtiyan de7iya uraas Aawaynne Na7ay de7oosona. 10 Oonika hinteko yishe ha timirtiya ehonna ixiko, hinte soo gelsofite; saroka goopite. 11 Iya saro giya oonika iya iita oosuwan iyara shaaketees.

Sarotho

12 Taani hintew xaafanaw koyida darobay de7ees, shin worqateninne qalamen xaafanaw koyke. Nu ufaysay poletana mela hintera som7on gahetada odetanaw hinteko baana gada qopayis.

13 Xoossay doorida ne miche nayti nena saro yaagosona.