Link to home pageLanguagesLink to all Bible versions on this site

1 Nuuni Xoossara issife oothiya asi gideysada, hinte ekida aadho keehatetha hada oothonna mela nu hintena woossoos. 2 Xoossay,

“Ta nena si7ana woden si7as;
atotetha gallasan nena maaddas” yaagees. Heko, ta si7iya wodey ha77i; atotetha gallasay hachi.[a]

3 Oonika nu oosuwa borana melanne nunan dhubetana mela koyoko. 4 Gidoshin, nu tuma Xoossaa oosanchota gideysa nu oothiya ubbaban bessida. Daro gencan, waayen, meton, un7an, 5 garaafetethan, qashon, ixon kumida wocaman, daaburan, dhisko dhayon, xooman,[b] 6 geeshshatethan, eratethan, danda7an, keehatethan, Geeshsha Ayyaanan, tuma siiqon, 7 tumaa odaninne Xoossaa wolqan nuuni iya oosanchota gideysa bessida. Qassi xillotethay nuus tooranne gondalle. 8 Nuuni bonchetidanne tooshetida; cayetidanne galatetida. Tumaa haasayoos, shin asay nuna wordancho gidoosona. 9 Nu asan eretida asi, shin eretonna asa mela gidida. Hayqidosona yaagetida, shin paxa de7oos; shocetida, shin hayqibooko. 10 Nuuni azzanikoka ubba wode ufaytoos. Nu manqo daanos, shin daro asaa dureyoos. Qassi aykoyka bayna asi daanos, shin ubbay nubaa.

11 Qorontoosa asato, nu hintew qoncen odida; nu uluwa hintena bessida. 12 Hinte nuna hinte siiquwa bessonna diggidetape attishin, nuuni nu siiquwa hintena diggibooko. 13 Aawu ba naytas odeysada ta hintew odayis; nu hintena nu uluwa bessidaysada, hinteka hinte uluwa nuna bessite.

Ammanonna Asara De7iya Gahetethi
14 Ammanonna asaara bessonna ogen waaxettofite. Xillotethasinne nagaras aybi gahetethi de7ii? Poo7osinne dhumas aybi issifetethi de7ii? 15 Kiristoosanne Xalahe issife gathiyabay aybee? Qassi ammaneysinne ammanonaysi issife koxiyabay aybee? 16 Xoossaa Keethas eeqatara aybi issifetethi de7ii? Xoossay,
“Taani enta giddon de7ana,
enta giddon hemetana.
Taani enta Xoossaa gidana;
entika ta ase gidana”
gidaysada, nuuni de7o Xoossaa keethi.[c] 17 Hessadaka, Goday,
“Enta giddofe shaaketidi keyite;
tuna gididaba bochofite;
ta hintena ekana.[d]
18 Ta hintew aawa gidana;
hinte taw adde naytanne macca nayta gidana;
yaagees Ubbaafe Wolqaama Goday” yaagis.[e]