1 Odeeda na7aa Azaariyasa bolla Xoossaa Ayyaanay wodhis. 2 Kawa Asara gahetanaw Azaariyasi bidi, “Asa, Yihuda asawnne Biniyaame asaw si7ite! Hinte Godaara gidiko ika hintera gidana. Hinte iya koyiko I hintew bentana; shin hinte iya aggiko I hintena aggana. 3 Isra7eele asay tuma Xoossi bayna, tamaarsiya kahineynne higgey bayna daro wode de7idosona. 4 Shin bantana metoy gakida wode enti Godaako, Isra7eele Xoossaako simmidi iya koyin I entaw bentis. 5 He wode biittan de7iya asa ubbay dagaman de7iya gisho sarotethan keyidi geliya oonika baawa. 6 Xoossay enta dumma dumma meton yeggida gisho derey deriya, katamay katamaa un7ethees. 7 Gidoshin, hinte, hinte oosuwas woytoy de7iya gisho minnite; guye goopite!” yaagis.

8 Kawoy Asi ha qaalanne Odeeda na7ay nabey Azaariyasi odida qaala si7ida wode minnis. Asi Yihudanne Biniyaame biitta ubbaafenne I oykida derey dariya Efreema biittan de7iya ixetida eeqa misileta dhaysis. Xoossa keethaa sinthan de7iya Godaa yarsho bessa oorathis.

9 Iya Goday Xoossay iyara de7eysa be7ida gisho daro asay Isra7eelepe iyako yidosona. Yihuda asaanne Biniyaame asa ubbaa, entara de7iya Efreema kochata, Minaase kochatanne Simoona kochata Asi shiishis. 10 Asi kawotida tammanne ichashantho laythan, heedzantho ageenan asay Yerusalaamen shiiqidosona. 11 He gallas enti di77idi ehidabaape laapun xeetu kormatanne laapun mukulu dorsata Godaas yarshidosona. 12 Godaa banta aawata Xoossaa banta kumetha wozanaaninne banta kumetha shempuwan koyanaw caaqidosona. 13 Godaa Isra7eele Xoossaa koyonna asi, na7a gidin cimi, adde gidin macci hayqo. 14 Hessa gita waason, ililsan, moyzeninne zayen banta Godaas caaqidosona. 15 Yihuda asa ubbay banta kumetha wozanan ha caaquwa caaqida gisho ufaytidosona. Godaa enti minthidi koyin I entaw bentis. Goday entaw ubba baggara wopa immis.

16 Qassi, kawoy Asi ba aawa aayiya Ma7ika Asheera geetetiya macca Xoossee eeqa misile oothida gisho kawa aayiw geetetiya bonchuwafe iyo diggis. Asi he eeqa misiliya qanxerethidi Qediroona Zangaaran xuuggis. 17 Dhoqa goyinno bessata Isra7eele biittafe dhaysona ixikoka Asi ba de7ida laytha ubban Godaas ammanetida asi gididi de7is. 18 Inne iya aaway Godaas dummayida bira, worqanne hara miisheta ehidi Xoossa keethan wothis. 19 Asi kawotida hastamanne ichashantho laythi gakanaw oli baawa.

<- 2 Taarike Maxaafa 142 Taarike Maxaafa 16 ->