2 Taarike Maxaafa 11

1 Robi7aami Yerusalaame katama gakida wode Isra7eele biitta asaara oletidi kawotethaa baw zaarana mela Yihudapenne Biniyaame kochaafe dooretida 180,000 olanchota shiishis. 2 Shin Godaa qaalay Xoossaa asi gidida Shamayako yis. 3 “Solomone na7aa, Yihuda Kawa Orobi7aama, Yihudaninne Biniyaamen de7iya Isra7eele asa ubbaa haysada yaaga; 4 ‘Hinte isha gidida Isra7eeletara oletanaw boopite. Hessa taani oothida gisho hinte ubbay hinte soo soo simmite’ yaagees” yaaga. Enti Godaa qaala si7idi Iyorbaama olanaw beysa aggidi simmidosona.

Orobi7aama Miixata

5 Robi7aami Yerusalaamen uttidi haysafe kaallidi xaafetida Yihudanne Biniyaame katamatan miixata keexis. 6 He katamati Beeteleme, Exaama, Tequhe, 7 Beet-Xura, Sooko, Adulaama, 8 Geete, Mareesa, Ziifa, 9 Adorayma, Laakiso, Azeeqa, 10 Xor7a, Eloonanne Kebroona. 11 Robi7aami katamata minthidi entaw halaqata shuumis; kathi, zaytenne woyne ushsha yan wothis. 12 He keexetida katamata ubban gondallenne toora wothis; yaatidi enta daro minthis. Hessada oothidi Yihudanne Biniyaame haaris.

13 Isra7eele ubban de7iya kahinetinne Leeweti ubbay banta de7iya bessaafe Orobi7aamako yidosona. 14 Leeweti banta hentha biittanne banta shaluwa aggidi Yihudanne Yerusalaame yidosona. Enti kahine gididi Godaas oothonna mela Iyorbaaminne iya nayti diggidosona. 15 Iyorbaami dhoqa goyinno bessaaninne I essida deeshenne mara misiletas oothiya hara kahineta shuumis. 16 Isra7eele Xoossaa banta wozanape goyinnanaw koydaysati Godaas banta aawata Xoossaas yarsho yarshanaw kumetha Isra7eelepe Leeweta kaallidi Yerusalaame yidosona. 17 Enta yuussay Yihuda kawotethaa minthis; enti heedzu laythi kumethi Solomone na7aa Orobi7aama maaddidosona. Enti kawa Dawita ogiyanne kawa Solomone ogiya kaallidi, heedzu laythi saro de7idosona.

Orobi7aama Soo Asaa

18 Robi7aami Mahlaato geetetiya macho ekis. Mahilaati aaway Dawita na7aa Yarmoota; I aayiya Isseye na7aa Eliyaaba na7iw Abikaalo. 19 Mahilaata Orobi7aames Ye7usa, Samaarenne Zahaama geetetiya adde nayta yelasu. 20 Hessafe guye, Abeseloome na7iw Ma7iko ekis; Ma7ika Abiya, Ataya, Ziizanne Salomita geetetiya adde nayta yelasu. 21 Robi7aami ba machetape ba laggethotape aathidi Abeseloome na7iw Ma7iko dosis. Iyaw tammanne hospun machetinne usupun tammu laggethoti de7oosona. I laatamanne hospun adde naytanne usupun tammu macca nayta yelis. 22 Robi7aami Ma7iki na7aa Abiya ba bessan kawoyanaw qopida gisho iya ishata bolla iya halaqa oothidi shuumis. 23 Robi7aami cincidi ba adde nayta Yihudan, Biniyaame biittaninne gimbetida katamatan shaaki shaaki shuumis; entaw daro kathinne daro macho demmis.

<- 2 Taarike Maxaafa 10 2 Taarike Maxaafa 12 ->