Phawuloosi Ximotiyoosas

Xaafida Koyro Kiita

Gaatha Qofa

Ximotiyoosa geetetiya, ammaniya na7atethay, Guutha Iisen yeletis (Hawa 16:1-3). Iya aayiya Ayhude; iya aaway qassi Girike asi. I Phawuloosara issife oothees; qassi wongela ooson Phawuloosa matan maaddiya asi. Phawuloosi, Ximotiyoosas xaafida koyro kiitay, heedzu ayfe odata minthidi xeellees.

Ha kiita koyro qofay, woosa keethan dendida wordo timirtiyaba minthidi odees. Ha imatha timirtey Ayhude timirtiyafe bagga, qassi Ayhude gidonna asa timirtiyafe bagga ekees. Hessika, “Ha bentiya alamey nagaran iitida gisho, asi atotethi demmanaw dumma gidida xuura eranaw, issi issi kathata moonna agganawnne macho ekona woyko azina gelonna daanaw koshshees” giya qofaa baaso oothidi dendis.

Nam7antho qofay, woosa keetha aysobanne goyinno wogaaba tamaarsiya timirte, hessadaka woosa keethi kaaletheysatinne enta maaddeysati ay mela maara duussu daanaw bessiyako odees.

Heedzantho qofay, Ximotiyoosi Yesuus Kiristoosas oothiya lo77o asi waanidi gidanaw bessiyako, qassi ammaniya asaa matan iyaw de7iya aawatethay aybeko, Phawuloosi iya zorida zoriya bessees.

Maxaafa Ayfe Qofata

Gelo qofa (1:1-2)

Woosa keethi aysiya asaa (1:3—3:13)

Nu ammanuwa xuura (3:14—4:5)

Ximotiyoosas imetida zore (4:6—6:21)

Xoossaa nu Aawa, nu Godaa Kiristoosa aadho keehatethay, maarotethaynne sarotethay new gido.

3 Taani Maqedoone bashe nena hadaridaysada, issi issi asati wordo timirtiya tamaarseysa digganaw ne Efesoonan gam7ana mela koyayis. 4 Enti go77i bayna hayse odanne banta kocha taybuwa agganaada oda. Hessa melabay palama kaaletheesipe attishin, ammanon oosetiya Xoossaa oosuwas maaddenna. 5 Ha kiitaa huuphe qofay geeshsha wozanape, lo77o kahapenne tuma ammanuwape bentiya siiquwa denthethanaasa. 6 Issi issi asati haysa aggidi, pathonna odako simmidosona. 7 Enti Xoossaa higgiya astamaare gidanaw koyoosona. Shin enti ay odiyako woyko tuma oothidi odeysi I aybeko erokona.

8 Asi besseysada higgiyan go7etiko higgey lo77o gideysa eroos. 9 Issiba akeekanaw koshshees. Higgey lo77o asaas medhetibeenna. Shin higgey, higge mentheyisata, worandzota, Xoosse yayyonnayisata, shempo wodheyisata, nagaranchota, geeshshatethi baynayisata, tunata, hari attoshin banta aayiw woyko aawa wodheyisata, 10 laammeyisata, addey addera laymateyisata, ase bayzeyisata, wordanchota, wordon caaqeyisata, woyko tuma timirtiyara gahetonna ay ooso ootheyisata seeranaw keyis. 11 He timirtey bonchonne anjetida Xoossay taani awaajana mela taw hadara immida Wongela giddon de7ees.

12 Taani oothiya oosuwan taw wolqaa immida nu Godaa Kiristoos Yesuusa galatayis. Tana ba oosuwas shuumidi he oosuwas besseysa gidi taybida gisho iya galatayis. 13 Taani haysafe kase iya cayeysa, iya yedetheysanne metootheysa gidikoka taani hessa eronnanne ammanonna oothida gisho Xoossay tana maaris.[b] 14 Nu Goday ba aadho keehatetha ta bolla gussidi, he aadho keehatethaara ammanonne siiqo Kiristoos Yesuusa baggara taw immis.

15 “Kiristoos Yesuusi nagaranchota ashshanaw ha alamiya yis” giya qaalay ammantheysanne asa ubbay ekanaw besseysa. Ubbaafe aadhida nagaranchoy tana. 16 Shin merinaa de7uwa ekanaw iya ammaniya asaas taani leemiso gidana mela Yesuus Kiristoosi daro danda7is. Taw ubbaafe aadhida nagaranchuwas Xoossay ba maarota darsis. 17 Ayfen bentonnaysas, issi Xoossaas, hayqonaysas, merinaa Kawas, merinaape merinaa gakanaw galataynne bonchoy gido. Amin7i.

18 Ximotiyoosa, ta na7aw, kase nebaa nabeti odida qaala bolla eqada ha kiitaa hadara new immayis. Ne he qaala kaalliko lo77o olaa oletana. 19 Ammanoynne lo77o kahi new de7o. Issoti issoti kaha dhayidi markabey hobben dhayeysada banta ammanuwa dhaysidosona. 20 Hessa hanidaysata giddon Hemeneyoosinne Iskindirey de7oosona. Enti tamaaridi Xoossaa cayeysa aggana mela taani Xalahes entana aatha immas.

1 Ximotiyoosa Kiita 2 ->