1 Ziifa asay Saa7olako Gib7a bidi, “Dawiti Yasmoona sinthan de7iya Hakila zuman qosetis?” yaagidosona. 2 Saa7oli, Isra7eeletape dooretida heedzu mukulu asi ekidi, Dawita koyanaw Ziifa mela biitta bis. 3 Saa7oli Yasmoona sinthan de7iya Hakila zumaa bolla de7iya ogiya matan dunkaanis; shin Dawiti he mela biittan uttis. Saa7oli iya kaallidi yidaysa Dawiti erida wode, 4 wochiya asi yeddidi, Saa7oli tuma he bessaa gakidaysa shaakidi eris. 5 Dawiti dendidi, Saa7oli dunkaanida bessaa bidi Saa7olinne toora moconay Neera na7ay Abeneeri zin7ida bessa be7is. Saa7oli dunkaanida gutan olanchoti iya yuushuwa teqin I dhiskis.

6 Dawiti Hite addiya Abimelekenne Xaruya na7aa Iyo7aaba ishaa Abisaya, “Saa7oli dunkaanida bessaa taara baanay oonee?” yaagidi oychis.

Abisayi, “Taani neera baana” yaagis.

7 Hessa gisho, Dawitinne Abisayi he qamma olanchotako yaa wode Saa7oli ba huuphe son toora essidi, dunkaaniya giddon zin7idaysa demmidosona. Abeneerinne olanchoti iya yuushuwan zin7idosona.

8 Abisayi, “Xoossay ne morkiya hachi ne kushen aathidi immis; taani tooran iya issi toho sa7ara oythada caddana; iya zaara caddanaw koshshenna” yaagis.

9 Shin Dawiti Abisayako, “Neeni iya wodhopa; Goday tiyida kawa bolla ba kushiya denthiya oonaka Goday seerana. 10 De7o Goday eriya mela, Xoossay iya wodhana; I ba gallasan woyko olan hayqana. 11 Goday tiyida kawa bolla ta kushiya denthonaada tana Goday teqo. Ane iya huuphe son de7iya tooranne haatha oykiya miishiya ekidi boos” yaagis.

12 Dawiti Saa7ola huuphe son de7iya tooranne haathe oykiya miishiya ekin, enti bidosona. Enta oonika be7ibeenna woyko oonika eribeenna woyko oonika barkibeenna. Goday enta bolla wolqaama dhisko yeddida gisho ubbay dhisko hayqi aggidosona.

13 Dawiti hefinthi pinnidi, entafe haakidi hara dere bolla keyidi eqis. 14 Dawiti Saa7ola olanchotanne Neera na7aa Abeneera xeegidi, “Abeneera, taani xeegiya wode si7ikii?” yaagidi waassis.

Abeneeri, “Qaala dhoqu oothi xeegidi kawa dhisko diggey oonee?” yaagis.

15 Dawiti, “Neeni wozanaama asi gidikii? Isra7eele giddon ne mela asi oonee? Yaatin, kawa, ne godaa ayis naagikii? Issi asi kawa, ne godaa wodhanaw bis. 16 Ne oothidabay lo77o gidenna. De7o Goday eriya mela, nenne ne olanchoti Xoossay tiyida hinte godaa naagiboonna gisho hinte hayqanaw bessees. Kawa tooraynne iya huuphe son de7iya haathe oykiya miishey awun de7iyako be7a” yaagis.

17 Dawita qaala gideysa Saa7oli eridi, “Ta na7aw Dawita, hessi ne qaalee?” yaagis.

Dawiti, “Ee, ta godaw, kawaw, hessi ta qaala. 18 Ta godaw, tana ne aylliya neeni ayis kaallay? Taani ay oothadina? Ta balay aybee? 19 Ta godaw, kawaw, neeni ne aylliya qaala si7ana mela ta nena woossayis. Goday nena ta bolla denthidaba gidiko, I yarsho eko. Shin asi nena denthidaba gidiko, ‘Bada hara xoossata goyinna’ yaagidosona. Godaa biittan taw de7iya laatape enti tana gooddida gisho enti Godaa sinthan baadetidaba gido! 20 Ha77i Godaa sinthafe haakidi, allaga biittan de7iya uraa suuthaa gussofa. Issi asi kuraacho shankatanaw dere bolla keyeysada, Isra7eele kawoy kastolle koyanaw keyis” yaagis.

21 Saa7oli, “Taani nena qohas. Ta na7aw, Dawita, haa simma! Hachi ne ta shempiw hayqope ashshida gisho taani nena zaarada genike. Tuma taani eeyaba hanas; gita bala balas” yaagis.

22 Dawiti zaaridi, “Kawaw, ne tooray haysish, ne asaape issi asi yidi eko. 23 Issi issi asas iya xillotethaa melanne iya ammanetetha mela Goday gate qanxees. Hachi Goday nena ta kushen aathidi immis; shin Goday tiyida kawa bolla taani ta kushiya wothanaw koyabike. 24 Hachi ne shempuwa ta ashshidaysada Goday tana meto ubbaafe ashshidi boncho” yaagis.

25 Saa7oli, “Ta na7aw, Dawita, neeni anjeta. Neeni gitaba oothana; new injetana” yaagis. Dawiti ba ogiya bis; Saa7olika ba soo simmis.

<- 1 Sameela Maxaafa 251 Sameela Maxaafa 27 ->