1 Goday Sameelako, “Isra7eele bolla I kawo gidonna mela taani ixida Saa7olas neeni awude gakanaw yeekay? Ane kacen zayte kunthada Beetelem addiya Isseyeko ba; kawo gidana mela taani iya nayta giddofe issuwa doora wothas” yaagis.

2 Sameeli, “Taani waanada boo? Saa7oli si7idi tana wodhana” yaagis.

Goday, “Issi ussi eka bada, ‘Taani Godaas yarshanaw yas’ yaaga. 3 Isseyeka yarshos xeega. Ne oothanaba ta nena bessaana; ta nena besseysa tiya” yaagis.

4 Sameeli Goday odidaysa oothis; Beeteleme bidi katamaa cimatara gahetida wode enti kokorishe iyako yidi, “Ne saro yadii?” yaagidi oychidosona.

5 Sameeli, “Ee, saro yas; ta Godaas yarshanaw yas; hinteka geeyidi taara yarshos yedhite” yaagis. Qassi Isseyenne iya nayta geeshshidi enta yarshos xeegis.

6 Enti yaa gakiya wode Sameeli Isseye na7aa Eliyaaba be7idi, “Tuma iya sinthan eqida, Goday tiya uray haysa” yaagidi qopis.

7 Shin Goday Sameela, “Iya malaa woyko iya adussatethaa xeellofa; taani iya kadhas. Taani Goday asi be7eysada be7ike; asi som7o be7ees, shin Goday wozanaa be7ees” yaagis.

8 Isseyey Abinadaabe xeegidi, Sameela sinthe aathin, Sameeli, “Goday haysaka dooribeenna” yaagis. 9 Isseyey Saama aathin, Sameeli, “Goday haysaka dooribeenna” yaagis. 10 Hessada oothidi, Isseyey ba nayta laapunata Sameela sinthe aathis; shin Sameeli Isseyeko, “Goday haysata dooribeenna” yaagis. 11 Sameeli, “New de7iya adde nayti haysata xalaalee?” yaagidi Isseye oychis.

Isseyey, “Ubbaafe kaalo na7ay attis; shin I dorse heemmanaw bis” yaagis.

Sameeli, “Kiittada iya ehisa; I yaana gakanaw nu maanaw uttoko” yaagis. 12 Isseyey kiittidi na7aa ehisis; he na7ay aarise; ayfey lo77onne mala lo77o na7a.

Goday Sameela, “Ta dooriday haysa gidiya gisho denda eqada tiya” yaagis. 13 Sameeli kacen kumida zayte ekidi, iya ishata sinthan Dawita tiyis. He gallasape doomidi, Godaa Ayyaanay Dawita bolla wolqan wodhis. Hessafe guye, Sameeli dendidi, Rama bis.

14 Godaa Ayyaanay Saa7olape shaaketin Godaape kiitetida iita ayyaanay Saa7ola waaysees. 15 Saa7ola aylleti, “Xoossaafe kiitetida iita ayyaanay nena waaysees. 16 Nuuni diithi diixiya asi koyidi ehana mela nu goday ba aylleta kiitto. Xoossaafe kiitetida iita ayyaanay nena oykiya wode he uray diithi diixiko new lo77o gidana” yaagidosona.

17 Saa7oli ba aylleta, “Diithi diixiya asi koyidi taw ehite” yaagis.

18 Aylletape issoy, “Beetelemen Isseyes diithi diixiya issi na7i de7ees. He na7ay xaalanne toorancho. I mala lo77onne cinca; Goday iyara de7ees” yaagis.

19 Saa7oli Isseyeko kiittidi, “Dorse heemmiya ne na7aa Dawita taw yedda” yaagis. 20 Isseyey uythunne ogoro woyne ushshu haren caanidi, issi kole gooshisidi ba na7aa Dawitara Saa7olas yeddis.

21 Dawiti Saa7olako yidi ooso doomis. Saa7oli Dawita daro dosis; Dawiti Saa7olas ola miishe tookeysa gidis. 22 Saa7oli, “Dawiti taw oothishe ta matan gam7o; taani iya dosas” yaagidi Isseyeko kiittis.

23 Hessafe simmin, Xoossafe kiitetida iita ayyaanay Saa7ola oykiya wode ubban Dawiti diithi ekidi diixees. I diixiya wode iita ayyaanay Saa7ola yeddeesinne iyaw lo77ees.

<- 1 Sameela Maxaafa 151 Sameela Maxaafa 17 ->