Phawuloosi Qorontoosa Asaas
Xaafida Koyro Kiita
Gaatha Qofa
Phawuloosi Qorontoosa asaas xaafida koyro kiitay xaafetiday, Phawuloosi Qorontoosan essida woosa keethan ammaniya asaa de7oninne ammano bolla dendida metuwas zaaro immanaasa. He wode Qorontoosa katamay, dumma dumma asay de7iya Girike katamanne Akaya biittas waanna katama. Qorontoosa katamay zal7en eretida, wogan minnida, dumma dumma iita de7on dalgidanne haymaanote darotethan eretida biitta.
Ha kiitan, hawaarey minthidi odey, Qorontoosa woosa keethan medhetida shaahetethaba, dumma dumma iita de7oba, laymatethaba, eko geloba, Geeshsha Ayyaana imotatabanne hayqope dendoba. Yesuus Kiristoosa wongeli ha oyshata waatidi zaariyako hawaarey minthidi odees.
Phawuloosi, shempo tammanne heedzan, siiqoy ammanope, ufaysafenne dumma dumma Geeshsha Ayyaana imotatape odees. Ammaniya asay issoy issuwa siiqiyaba gidiko, woosa keethan medhetiya metoti qanthan simmees. Siiqoy dhayko, palami, shaaketethi, ixoynne hessa hessa melabati darees.
Maxaafa Ayfe Qofata
Gelo qofa (1:1-9)
Ammaniya asaa giddon medhetida shaaketethi (1:9—4:21)
Laymatethinne issoy issuwara siga de7o (5:1—7:40)
Eeqa aggidi Xoosse boncho (8:1—11:1)
Woosa keethinne goyinno woga (11:2—14:40)
Kiristoosi hayqo xoonidi dendis (15:1-58)
Metootetida asaas imetiya imota (16:1-4)
Oge buussaa halchonne sarotho (16:5-24)

1 Xoossaa sheniyan Yesuus Kiristoosa hawaare gidanaw xeegetida Phawuloosinne, nu isha Sosteneesi, 2 Qorontoosan de7iya Xoossa woosa keethaas, Yesuus Kiristoosan geeydaysatasinne geeshshi gidana mela xeegetidaysatas; qassi entawunne nuus Godaa gidiya nu Godaa Yesuus Kiristoosa suntha ubba bessan xeegiya ubbaas.[a]

3 Xoossay, nu Aawaynne Goday Yesuus Kiristoosi hintew aadho keehatethaanne sarotethaa immo.

Phawuloosi Xoosse Galatees

4 Xoossay Kiristoos Yesuusa baggara hintew immida aadho keehatetha gisho, taani ubba wode Xoossaa galatayis. 5 Iyan odaninne eratetha ubban hinte duretideta. 6 Taani Kiristoosaba markatidaysi tuma gideysa hessi qoncisees. 7 Hessa gisho, hinte nu Godaa Yesuus Kiristoosa yuussaa naagishe de7ishin, ay ayyaana imoyka hintew pacenna. 8 Nu Godaa Yesuus Kiristoosi simmiya wode hinte boretonayisata gidana mela wursethi gakanaw I hintena minthana. 9 Ba Na7a, nu Godaa, Yesuus Kiristoosara issifetethi daana mela hintena xeegida Xoossay ammanetidaysa.

Woosa Keethan De7iya Shaaketethi

10 Ta ishato, hinte giddon shaaketethi doonna melanne hinte issi wozananinne issi qofan isso gididi daana mela, nu Godaa Yesuus Kiristoosa sunthan hintena woossayis. 11 Ta ishato, Qelo7e soo asay hinte giddon ooshshi de7eysa taw odidosona. 12 Ta hintew odeysi haysa: hintefe issoti issoti, “Taani Phawuloosasa; taani Aphiloosasa; taani Phexroosassa; taani Kiristoosassa” yaageeta.[b] 13 Kiristoosi shaaketideyee? Hinte gisho, masqaliya bolla kaqetiday Phawulooseyee? Woyko hinte Phawuloosa sunthan xammaqetidetiyee?

14 Taani Qarisphoosinne Gaayoosi attishin, hintefe oonaka xammaqaboonna gisho, Xoosse galatayis.[c] 15 Hessa gisho, oonika hintena ta sunthan xammaqetideta gaanaw danda7enna. 16 [Qassi Isxifaanose soo asaaka ta xammaqidaysa akeekayis, shin hara oona xammaqidaako hassayike.] 17 Kiristoosi tana kiittiday wongela odana melasafe attishin, xammaqana mela gidenna. Kiristoosi masqaley hada gidonna mela taani asa cincatetha qaalan odike.

Kiristoosi Xoossa Wolqanne Cincatethi

18 Kiristoosa masqala qaalay dhayeysatas eeyatethi, shin nuus atteysatas Xoossa wolqa. 19 Geeshsha Maxaafan,

“Taani cincata cincatethaa dhaysana;

akeekanchota akeeka balethana”

yaagees.[d]

20 Yaatin, cinci awun de7ii? Higge astamaarey awunee? Woyko ha sa7a eranchoy awun de7ii? Xoossay ha sa7aa cincatetha eeyatethi oothibeennee?[e]

21 Ha sa7aa asay banta cincatethan Xoossa eronna mela ba cincatethan diggidi, eeyatethan taybetiya, nuuni odiya qaalan ammaneyisata ashshanaw Xoossa shene gidis. 22 Ayhudeti malaata be7anaw koyoosona; qassi Giriketi cincatethi koyoosona. 23 Shin nuuni masqale bolla kaqetida Kiristoosa sabbakoos. Hessi Ayhudetas dhube; qassi Giriketas eeyatethi gidis. 24 Shin Xoossay xeegidaysatas, Ayhude gidin, Girike gidin Kiristoosi Xoossa wolqaanne iya cincatethaa. 25 Xoossa eeyatethi asa cincatethafe aadhees; qassi Xoossa daaburay asa minotethafe minnees.

26 Hiza, ta ishato, Xoossay hintena xeegiya wode hinte ay mela aseeko qopite. Asa qofan, hinte giddofe daroti cinca, wolqaamanne dhoqa koche gideketa. 27 Shin Xoossay cincata yeellayanaw alamen de7iya eeyata dooris; qassi minota yeellayanaw alamen de7iya daaburanchota dooris. 28 Ha alamiyan gita geetetidaba dhaysanaw, Xoossi, ha sa7aa kawushaba, kadhetidabanne pathonaba dooris. 29 Xoossa sinthan oonika ceeqetonna mela hessa oothis. 30 Shin, hintew Kiristoos Yesuusara issifetethi daana mela Xoossay hessa oothis. I, nuus Xoossafe cincatethi, xillotethi, geeshshatethinne atotethi gidis. 31 Hessa gisho, Geeshsha Maxaafan, “Ceeqetiya oonika Godan ceeqo” yaagees.[f]

1 Qorontoosa Kiita 2 ->