1 Aarona kochati banta ooso maaran haysafe kaallidi xaafetidaysata. Aarona adde nayti Nadaaba, Abyooda, Alaazaranne Itamaara. 2 Shin Naadabeynne Abyooda na7a yelonna banta aawape sinthe hayqidosona. Hessa gisho, Alaazarinne Itamaari kahine gididosona. 3 Dawiti Alaazara yaraape Saadoqa, Itamaara yaraape Abimeleke ekidi Aarona kochata enta oosuwa maaran cugan cugan shaakis. 4 Alaazara yarata halaqati Itamaara yarata halaqatape dari bentida gisho Alaazara yarati tammanne usupun cugan shaaketin Itamaara yarati hospun cugan shaaketidosona. 5 Alaazara yarata giddoninne Itamaara yarata giddon Xoossa keetha halaqatinne Xoossa oosuwas bessiya halaqati de7iya gisho oosoy entaw saaman shaaketees. 6 Alaazara yaratinne Itamaara yarati banta maaran maaran saama kessidosona. Leewe koche gidida Natina7eela na7ay xaafey Shamayey enta mazgabees. Kawoynne iya moorinnati, kahiney Saadoqinne Abyataara na7ay Abimelekey, kahinetanne Leeweta yarata halaqati ubbay hessas marka.

7 Koyro saamay Yo7aaribas keyis; nam7anthoy Yadayas keyis. 8 Heedzanthoy Harimas keyis. Oyddanthoy Sa7oorimas keyis. 9 Ichashanthoy Malkiyas keyis. Usupunthoy Miyaaminas keyis. 10 Laapunthoy Aqoosas keyis; Hospunthoy Abiyas keyis. 11 Uddufunthoy Iyyasus keyis. Tammanthoy Sakanas keyis. 12 Tammanne issinthoy Eliyaseebas keyis. Tammanne nam7anthoy Yaqinas keyis. 13 Tammanne heedzanthoy Hupas keyis. Tammanne oyddanthoy Yeshebas keyis. 14 Tammanne ichashanthoy Bilgas keyis. Tammanne usupunthoy Imeras keyis. 15 Tammanne laapunthoy Heziras keyis. Tammanne hospunthoy Hafixeexas keyis. 16 Tammanne uddufunthoy Patahas keyis. Laatamanthoy Yezekelas keyis. 17 Laatamanne issinthoy Yakinas keyis. Laatamanne nam7anthoy Gamulas keyis. 18 Laatamanne heedzanthoy Dalayas keyis. Laatamanne oyddanthoy Maazas keyis.

19 Goday Isra7eele Xoossay enta mayza Aarona kiittin, I entaw wothida wogaatho, banta Xoossa keetha geliya wode, enti oothana maaray haysa.

20 Hara Leewe kochata halaqati, haysafe kaallidi xaafetidaysata.

Yehidayi Sabu7eela baggara Amraama koche.

21 Yisheyi Rahaaba koche.

22 Yahaati Salomita baggara Yisihaara koche.

23 Yiriyey, Amaarey, Yahazi7eelinne Yiqam7aami Kebroona koche.

24 Shamiri Mikiyaasa baggara Uzi7eela koche.

25 Zakariyasi Mikiyaasa ishaa Yishiya baggara Uzi7eela koche.

26 Mahili, Musinne Ya7izi Maraara kochata. 27 Ya7iza heedzu adde nayti Shohaama, Zakuranne Ibara. 28 Mahila nam7u adde nayti Alaazaranne Qiisa. Alaazaras adde na7i baawa. 29 Qiisa Yirahima7eela geetetiya adde na7i de7ees. 30 Musa heedzu adde nayti Mahila, Ederanne Yiremoota.

Haysati Leewe kochata halaqata.

31 Kase enta dabboti Aarona koche gidida kahineti oothidaysada haysatika kawoy Dawiti, Saadoqi, Abimelekey, kahinetanne Leeweta halaqati de7iya bessan saama yeggidosona. Bayraa ishaa soo asaasinne kaalo ishaa soo asaas issi gina saami wodhis.

<- 1 Taarike Maxaafa 231 Taarike Maxaafa 25 ->