1 Dawiti ba kataman baw keethe keexis; Xoossa Taabotiyas besse giigisidi, dunkaane essis. 2 Dawiti, “Xoossa Taabotiya tookanaadanne merinaw Xoossas oothanaada Goday dooriday Leeweta gidiya gisho hari oonika Xoossa Taabotiya tookanaw bessenna” yaagis. 3 Dawiti Godaa Taabotiyas giigisida bessaa Taabotiya ehana mela Isra7eele asa ubbaa Yerusalaame shiishis. 4 Kaallidi Dawiti Aarona kochatanne Leeweta xeegidi shiishis. 5 Qahaata yaraape halaqay Uri7eelinne issi xeetanne laatamu iya dabboti yidosona. 6 Maraara yaraape halaqay Asayinne nam7u xeetanne laatamu iya dabboti yidosona. 7 Gedisoona yaraape halaqay Iyyu7eelinne xeetanne hastamu iya dabboti yidosona. 8 Elzafaana yaraape halaqay Shama7inne nam7u xeetu iya dabboti yidosona. 9 Kebroona yaraape halaqay Eli7eelinne hospun tammu iya dabboti yidosona. 10 Uzi7eela yaraape halaqay Amnadaabeynne xeetanne tammanne nam7u iya daboti yidosona.

11 Dawiti kahineta Saadoqanne Abyataara, Leeweta Uri7eela, Asaya, Iyyu7eela, Shama7a, Eli7eelanne Amnadaabe xeegis. 12 Entako, “Hinte Leewe kochaas halaqata. Godaa Isra7eele Xoossaa Taabotiya taani giigisida bessaa ehanaw hintenne hinte dabboti geeyite. 13 Hinte Leeweti koyro Xoossa Taabotiya tookiboonna gishonne nuuni iya woga mela waati efaneko Xoossaa oychiboona gisho, Goday nu Xoossay nuna seeris” yaagis.

14 Godaa Isra7eele Xoossa Taabotiya ehanaw kahinetinne Leeweti bantana geeshshidosona. 15 Goday Muse baggara kase kiitidaysada Leeweti Xoossaa Taabotiya banta hashiyan kasora tookidosona.

16 Diithi, maasinqonne daala kaa7ishe ufaysa yethi yexana mela banta dabbo gidida Leewetape zammaareta shuumana mela Dawiti kiittis. 17 Leeweti Iyyu7eela na7aa Hemaana, iya dabbotape Baraka na7aa Asaafanne enta dabbotape Maraara yaraa Qusaya na7aa Etaana shuumidosona. 18 Qassi nam7antho dethan Zakariyasa, Yazi7eela, Shamramoota, Yi7eela, Una, Eli7aaba, Banaya, Ma7iseya, Matita, Elfala, Miqineyanne penge naagiya Abdiyunne Yi7eela shuumidosona.

19 Naase daala qaathana mela Hemaani Asaafinne Etaani shuumetidosona. 20 Qassi Zakariyasi, Ya7izi7eeli, Shamramooti, Yi7eeli, Uni, Eli7aabi, Ma7iseynne Banayi maasinqo kaa7oosona. 21 Matita, Elfali, Miqineyi, Abdiyuy Yi7eelinne Azaazey diithi diixoosona.

22 Leeweta halaqay Kanaaney mazmure eriya gisho enta kaalethanaw shuumetis. 23 Barakinne Elqaani Taabotiya dunkaaniya pengiya naaganaw dooretidosona. 24 Kahineti Sabaani, Iyosaafexi, Natina7eeli, Amasayi, Zakariyasi, Banayinne Alaazari Xoossa Taabotiya sinthan moyze punnanaw dooretidosona. Obeed-Edoomeynne Yihey Taabotiya naaganaw dooretidosona.

25 Dawiti, Isra7eele cimatinne shaalaqati Godaa caaqo Taabotiya Abdaara soope ehanaw ufaytishe bidosona. 26 Godaa caaqo Taabotiya tookida Leeweta Xoossay maaddida gisho enti laapun kormanne laapun maraze yarshidosona. 27 Dawiti, Taabotiya tookida Leeweti, mazmure yexeysatinne enta halaqay Kanaaney liinope oosetida ma7o ma7idosona. Dawitika liinope oosetida efuude ma7is. 28 Hessada oothidi, Isra7eele ubbay ufaytidi moyzenne zaye punnishe, daala qaathishe, diithinne maasinqo kaa7ishe Godaa caaqo Taabotiya ehidosona.

29 Godaa caaqo Taabotey Dawita katamaa gelida wode Saa7ola na7iya Melkoola kawoy Dawiti ufaytidi durishininne kaa7ishin maskootera be7ada ba wozanan kadhasu.

<- 1 Taarike Maxaafa 141 Taarike Maxaafa 16 ->