1 Taarike Maxaafa 10

Kawa Saa7ola Hayquwa

(1 Same 31:1-13)

1 Filisxeemeti Isra7eele asaara oletidosona. Isra7eeleti Filisxeemeta sinthafe baqatidosona. He wode daro Isra7eele asay Gilbo7a deriya bolla hayqidosona. 2 Filisxeemeti Saa7olanne iya adde nayta gooddi efidi Saa7ola nayta Yoonataana, Abinadaabanne Malkisa wodhidosona. 3 Olay Saa7ola teqidi un7ethis; dongen dukeysati Saa7ola demmidi madunxisidosona.

4 Saa7oli ba ola miishiya tookeysako, “Ha qaxaretiboona Filisxeemeti tana kaa7onna mela ne mashshan tana wodha” yaagis.

Shin iya ola miishiya tookeysi daro yayyida gisho ixis; hessa gisho, Saa7oli ba mashsha sa7an essidi iya bolla kundidi hayqis. 5 Iya ola miishiya tookeysi Saa7oli hayqidaysa be7idi, ika ba mashsha sa7an essidi iya bolla kundidi hayqis. 6 Hessada hanidi Saa7oli, iya heedzu naytinne iya soo asa ubbay he gallas hayqidosona. 7 Zangaaran de7iya Isra7eeleti ubbay banta olanchoti baqatidaysa, Saa7olinne iya nayti hayqidaysa be7ida wode banta katamata aggidi baqatidosona. Filisxeemeti yidi he katamatan de7idosona.

8 Wontetha gallas Filisxeemeti ahata bollafe ola miisheta qaari ekanaw yidi, Saa7olinne iya nayti Gilbo7a deriyan hayqidi, zin7idaysata demmidosona. 9 Enti Saa7ola qoodhiya qanxidi iya ola miishiya qaari ekidosona. Yaatidi banta eeqata keethaninne banta asaa giddon xoonuwa awaajana mela Filisxeeme biitta ubbaas ase kiittidosona. 10 Enti Saa7ola ola miishiya banta xoossata keethatape issuwan wothidosona; iya huuphiya banta Xoossa Daagona eeqa keethan kaqidosona.

11 Filisxeemeti Saa7ola bolla oothidaba ubbaa Galadan de7iya Yaabesa katamaa asay si7ida wode, 12 mino asati ubbay bidi, Saa7ola ahaanne iya nayta aha ekidi Yaabesa katama ehidosona. Yaabesan de7iya wolaa garsan enta moogidosona; yaatidi laapun gallas xoomidosona.

13 Saa7oli Godaas ammanetibona gisho hayqis. Godaa qaala I naagibeenna; Godaa zore oycheysa aggidi, 14 moytille xeegiya asi zore oychis. Hessa gisho, Goday iya wodhidi iya kawotetha Isseye na7aa Dawitas aathidi immis.

<- 1 Taarike Maxaafa 9 1 Taarike Maxaafa 11 ->