1 ሳሎታ ምጭዳይ፥ ሳኣ መꬍዳይ፥ አሳስ ደኦ አያና እምዳ ጎዳይ እስራኤለባ ኦድዳ ጎዳ ቃላይ ሀይሳ፦ 2 “ሄኮ፥ ታኒ የሩሳላመ ካታማ፥ እያ ዩሹዋን ደእያ አሳ ኡባይ ኡይን ጋንድጋርስያ ዎይነ ኡሽ ትግያ ዋንጫ ኦꬃና። የሩሳላመይ ኦይከትያ ዎደ ይሁዳ ካታማት ኦይከታና። 3 ሄ ዎደ ታኒ የሩሳላመ ካታማ አሳ ኡባስ ዴፆ ሹቹ ኦꬃና፤ እያ ደንꬅያ ኡባይ ባዉ ደሸታና። ሳኣ ካዎተꬃት ኡባይ እያ ኦላናዉ እስፈ ሺቃና። 4 ሄ ዎደ ታኒ ፓራ ኡባ ዳጋንꬃና፤ ፓራ አሳታ ጎሻና።” ታኒ ጎዳይ ሀይሳ ኦዳይስ። ይሁዳ አሳ ታኒ ታ ኬሀ አይፈን ፄላና፤ ሽን ሞርከታ ፓራታ ኡባ ቆቅሳና። 5 ሄ ዎደ ይሁዳ ሀላቃት ባንታ ዎዛናን፥ “የሩሳላመ አሳይ ኡባፈ ዎልቃማ ጎዳን፥ ባንታ ፆሳን፥ ምኖተꬃ ደምዶሶና” ያጋና።

6 “ሄ ዎደ ታኒ ይሁዳ ኮቻታ ምꬃ ዶርያ ግዶን ደእያ ፂፋነ ምርቄታ ግዶን ላፅያ ፆምፐ ኦꬃና። ኤንቲ ባንታ ኡሻቻን፥ ባንታ ሀድርሳንነ ባንታ ዩሹዋን ደእያ አሳ ኡባ ማና፤ ሽን የሩሳላመ ካታማይ፥ አሳይ ሳሮ ደእያ በሲ ግዳና።

7 “ዳዊታ ኮቻታ ቦንቾይነ የሩሳላመን ደኤይሳታ ቦንቾይ ይሁዳ አሳ ቦንቹዋፈ አꬎና መላ ታኒ ጎዳይ ካሰታዳ ይሁዳ አሳስ ፆኖ እማና። 8 ሄ ዎደ ኤንታ ግዶን ዳሮ ላፋ ጌተትያ አስ ዳዊታ መላ ምኖ ግዳና። ታኒ ጎዳይ የሩሳላመን ደኤይሳታስ ጎንዳለ ግዳና። ዳዊታ ኮቻት ፆሳ መላ፥ ጎዳ ኪታንቾ መላ ግድድ ኤንታ ካለꬃና። 9 ሄ ዎደ ታኒ የሩሳላመ ኦላናዉ ደንድያ ካዎተꬃታ ኡባ ꬋይሳናዉ ደንዳና።

10 “ሄ ዎደ ታኒ ዳዊታ ኮቻታ ቦላነ የሩሳላመን ደእያ አሳ ቦላ ቃነ ዎሳ አያና ጉሳና። ሄሳ ግሾ፥ ኤንቲ ባንታ ጫድዳይሳ በእያ ዎደ አስ ባ እስ ናአስ ዬከይሳዳ ዬካና። ቃስ ባ ባይራ ናአስ ካዮተይሳዳ ካዮታና። 11 ሄ ዎደ የሩሳላመን ዬከትያ ዬሆይ ማግዶ ደንባን ሀዳድ-ርሞናስ ዬከትዳ ዬሁዋ መላ ዎልቃማ ግዳና። 12 ቢታን ደእያ እስ እስ ኮቻይ ባዉ ባዉ ዬካና፤ ዳዊታ ኮቻት ባንታ ማቸታራ፥ ናታና ኮቻት ባንታ ማቸታራ ባንታዉ፥ 13 ሌወ ኮቻት ባንታ ማቸታራ ባንታዉ፥ ሳመአ ኮቻት ባንታ ማቸታራ ባንታዉ፥ ዬካና። 14 አትዳ ኮቻ ኡባይ ባዉ ባዉ ዬካና፤ ኤንታ ማቸት ባንታዉ ባንታዉ ዬካና” ያጌስ።

<- ዛካርያሳ ማፃፋ 11ዛካርያሳ ማፃፋ 13 ->