3 ሄሳ ግሾ፥ ኡሩታ ባዳ ካꬃ ጫክያ አሳ ጌዱዋፐ ቡ ቆሮ ዶማሱ። ፕኮ መላ ቡꬍያ ቆርያ ጋደይ አበመለከ ዳቡዋ ቦኤዛ ጋደ ግድስ። 4 ሄኮ፥ ጉꬃ ዎደፐ ቦኤዝ ቤተለመፐ ጋደ ብድ፥ ካꬅ ጫክያ አሳ፥ “ጎድ ዎልቃ እሞ” ግድ ሳሮꬅስ።
5 ያትን፥ ቦኤዝ ካꬅ ጫከይሳታ ካፑዋ፥ “ሀና ናአተꬃ ማጫስያ ኦኔ?” ያግድ ኦይችስ።
6 ካꬃ ጫከይሳታ ካፖይ ዛሪድ፥ “ሀና የገልስያ ኑሃምራ ሞአበ ቢታፈ ይዳ ሞአበ ማጫስ። 7 እያ ታና፥ ‘ካꬃ ጫከይሳታ ጌዱዋ ካላዳ ምርቅያ ግዶፈ ቡ ቆሮ?’ ጋዳ ኦይቻሱ። ሀእ ቡሮ ሸምፓናዉ ኡታውስ፤ ዎንታ ጉራ ዮደፐ ሀኖ ጋካናዉ ሀይሳን ቆራሸ ጋምአሱ” ያግስ።
8 ቦኤዝ ኡሩቶ፥ “ታ ናተ ስአ፤ ህዛፐ ቡ ቆራናዉ ሀራ ጋደ ቦፓ። ቃስ ሀይሳፈ አዉካ ቃፆፋ። ታ ማጫ አይለታራ ሀይሳን ፔአ። 9 አሳይ ካꬅ ጫክያ በሳ ፄላ ፄላዳ ማጫ አይለታራ ግዳዳ ኤንታ ጌዶ ካላዳ ቆራ። አደ አይለት ነና ቦቾናዳ ታኒ ኤንታዉ ኦዳስ። ቃስ ነና ሳምኮ፥ አደ አይለት ትክድ ዎꬅዳ ሃꬃፈ ፓቃዳ ኡያ” ያግስ።
10 ኡሩታ ሾጫ ዝጋዳ፥ “ታኒ አላጋ ግድክና? ኔኒ ሀይሳ መላ ታዉ ቃትዳይ አይባሰ?” ያጋሱ።
11 ቦኤዝ ዛሪድ፥ “ነ አዝናይ ሀይቆሳፐ ዶምን፥ ኔኒ ነ አዝና አየስ ኦꬅዳባ ኡባ፥ ኔኒ ነ አይዉ፥ ነ አዋነ ነ የለትዳ ቢታ አጋዳ፥ ነ ኤሮና ደርያራ ዳናዉ ይዳይሳ ታኒ ጌሻዳ ስአስ። 12 ኔኒ ኦꬅዳባስ ጎድ ነዉ ኩሸ ዛሮ። ኔኒ እያ ቀፍያ ጋርሳን አታና ጋዳ ይዳ፥ እስራኤለ ጎዳይ ፆሳይ ነዉ ኩመꬃባ እሞ” ያግስ።
13 ኡሩታ፥ “ታ ጎዳዉ፥ ኔኒ ታዉ ዳሮ ቃታዳሳ፤ ታኒ ነ አይለታፐ እስንዉካ ጋክከ፥ ሽን ታዉ ኬሀባ ሀሳያዳ፥ ታና ምንꬃዳሳ” ያጋሱ።
14 ቁማ ምያ ዎደ ቦኤዝ፥ “ሃ ሺቃ፤ ኡይꬁ ኤካዳ ዎይንያን ቱሻዳ ማ” ያግስ። እያካ ካꬃ ጫክያ አሳ ማታን ኡታሱ። ቦኤዝ እዉ ባንጋ ሻሽ እሚስ፤ እያ ማዳ ካልን ካꬃይ ግድድ ፓላህስ።
15 እያ ቡ ቆራናዉ ደንድያ ዎደ፥ ቦኤዝ ባ አይለታ፥ “ምርቅያ ግዶፈካ እያ ቆርኮ እዮ ዬላዮፕተ። 16 ኡባካ ምርቅያፈ ሾድድ እዉ የግተ እያ ኤኮ፤ እዮ ካጮፍተ” ያግስ።
17 ሄሳን ኡሩታ ኦማርስ ጋካናዉ ቆራሱ። እያ ቆራ ፐእዳይሳ ቆፅን፥ ታሙ ክሎ ግራመ ባንጋ ግደይሳ ኤካሱ። 18 እያ ሄ ካꬃ ባአ ኤካዳ ካታማ ስማሱ፤ እያ አይ መላ ቆርዳኮ ኤሀዳ ባ አዝና አይዉ በሳሱ። ቃስ እያ ምሽን አትዳ ካꬅ ኤህዳይሳ ከሳዳ እዉ እማሱ።
19 እ አዝና አይያ፥ “ሀች ሀይሳ አዉፐ ቆራዲ? አዉን ኦꬃ ፔአዲ? ነዉ ሀይሳዳ ኬህዳ ኡራይ አንጀቶ” ያጋሱ።
20 ኑሃማ ዛራዳ፥ “ሀይቅዳይሳታስነ ደኦን ደኤይሳታስ ባ ኬሀተꬃ አግቦና ጎዳይ እያ አንጆ” ያጋሱ። ጉጃዳካ፥ “ሀ አደይ ኑስ ማታ ዳቦ፤ ኑና ኡባ ዎዛናዉ ጋꬅያ አሳታፐ እሶይ እያ” ያጋሱ።
21 ሞአበ ኡሩታ፥ “እ ታና፥ ‘ታ ካꬃይ ጫከትድ ዉራና ጋካናዉ፥ ታ ኦሳንቾታፐ ሻከቶናሽን ያዳ ቡ ቆራ’ ያግስ” ያጋሱ።
22 ኑሃማ ባ ናአ ማቸ ኡሩትኮ፥ “ታ ናተ፥ ቱማካ ቦኤዛ ጋድያን ኦꬅያ ማጫሳታራ ቢኮ ነዉ ሎኦ። ሀራ አሳ ጋደ ቢኮ ነና መቶꬃና” ያጋሱ።
23 ሄሳ ግሾ፥ ባንጋይነ ግስትያ ጫካይ ዉራና ጋካናዉ ኡሩታ ቦኤዛ ማጫ አይለታኮ ሺቃዳ፥ ቡꬍያ ቆራሸ ጋምአሱ። ቃስ ባ አዝና አየራ እስፈ ደአሱ።
<- ኡሩት ማፃፋ 1ኡሩት ማፃፋ 3 ->