1 ያትን፥ ኑኒ ዎይጋኔ? ፆሳ አꬎ ኬሀተꬃይ ዳራና መላ ናጋራን ምንድ ደእኖ? 2 አካይ፥ ኑኒ ናጋራስ ሀይቅዳባ ግድኮ፥ ያትን፥ ኑኒ ህዛፐ ዋንድ ናጋራን ዳኔ? 3 ኑ ኡባይ ክርስቶስ የሱሳራ እስፋናዉ ፃማቀትዳ ዎደ እያ ሀይቁዋን እያራ እስፋናዉ ፃማቀትዳይሳ ኤረከትዬ? 4 ኑ ፃማቀትዳ ዎደ ክርስቶሳራ ሀይቅዳነ ሞገትዳ። ክርስቶስ ፆሳ አዋ ቦንቾ ዎልቃን ሀይቆፐ ደንድዳይሳ መላ ኑካ ኦራꬃ ደኦን ዳና። [a]

5 ኑ እያ ሀይቁዋን እያራ እስኖ ግድኮ፥ ሄሳዳካ፥ እያ ደንዱዋን እያራ እስኖ ግዳና። 6 ኑ ህዛፐ ናጋራስ አይለ ግዶና መላነ ኑ ናጋራንቾ አሳተꬃ ዎልቃይ ꬋያና መላ ኑ ጭማ አሳተꬃይ ክርስቶሳራ ካቀትዳይሳ ኤሮስ። 7 እስ አስ ክርስቶሳን ሀይቅዳባ ግድኮ፥ እ ናጋራ ዎልቃፈ ላአ ከይስ። 8 ኑኒ ክርስቶሳራ ሀይቅኮ፥ እያራ ደኦን ዳናይሳ አማኖስ። 9 ክርስቶስ ሀይቆፐ ደንድዳ ግሾ፥ ዛር እ ሀይቆናይሳነ ሀይቆይ ስንꬃፈ እያ ሃሮናይሳ ኑ ኤሮስ። 10 እ ሀይቅዳ ዎደ ናጋራስ እስቶሆ ዉርሰꬅ ጋካናዉ ሀይቅስ፥ ሽን ሀእ ደኦን ፆሳስ ደኤስ። 11 ሄሳዳካ፥ ህንተ ናጋራስ ሀይቅድ፥ ጎዳ ክርስቶስ የሱሳ ባጋራ ፆሳስ ደኦን ደኤይሳ ቆፕተ።

12 ሄሳ ግሾ፥ ህንተ፥ ህንተ አሳተꬃ አሙዋስ ኪተቶና መላ ሀይቅያ ህንተ አሳተꬃ ናጋር ሃሮፖ። 13 ቃስ ህንተ አሳተꬃ ናጋራ ኦꬃናዉ ጌላተꬃ ሚሸ ኦꬅድ እሞፍተ። ሽን ህንተ ሀይቆፐ ደንድድ፥ ደኦን ደእያ አሳዳ ህንተ አሳተꬃ ፆሳስ እምተ። ቃስ ህንተ ኩመꬃ አሳተꬃ ፅሎ ኦሶ ኦꬃናዉ ፆሳስ አꬅድ እምተ። 14 ህንተ ፆሳ አꬎ ኬሀተꬃ ጋርሳን ደኤታፐ አትሽን፥ ህገፈ ጋርሳን ደኦና ግሾ ናጋር ህንተና ሃራናዉ በሰና።

15 ያትን፥ ኑ ዎይጋኔ? ህገፈ ጋርሳን ግዶናሽን፥ ፆሳ አꬎ ኬሀተꬃ ጋርሳን ደእያ ግሾ ናጋራ ኦꬃነዬ? አካይ፥! 16 ህንተ እስ አሳስ ኪተታናዉ ህንተና አይለ ኦꬅድ እምያ ዎደ ሄ ህንተ ኪተተይሳስ አይለ ግደይሳ ኤሬታ። ሄሳዳካ፥ ህንተ ናጋራስ ኪተትኮ፥ ህንተዉ ሀይቆ ኤህያ ናጋራስ አይለ ግዴታ። ዎይኮ ህንተ ፆሳስ ኪተትኮ ፅሎተꬅ ኤህያ ፆሳስ አይለ ግዴታ። 17 ካሰ ህንተ ናጋራስ አይለ፥ ሽን ሀእ ህንተ ኤክዳ ቱማ ትምርትያስ ኩመꬃ ዎዛናፐ ኪተትዳ ግሾ ፆሳስ ጋላት ግዶ። 18 ህንተ ናጋራ አይለተꬃ ቃሾፐ ብለትድ ፅሎተꬃ አይለ ግድደታ።

19 ህንተ ህንተ ቆፋን ዳቡራንቾ ግድያ ግሾ፥ ታኒ ኦደስካ ገልያ ኦገን ኦዳይስ። ካሰ ህንተ፥ ህንተ አሳተꬃ ቱናነ ኢታባ ኦꬃናዉ አይለ ኦꬅድ እምዳይሳ መላ ሀእ ህንተ አሳተꬃ ጌሽ ግዳና መላ ፅሎተꬃ አይለ ኦꬅድ እምተ።

20 ህንተ ናጋራስ አይለትድ ደእያ ዎደ ፅሎተꬃስ ሃረተከታ። 21 ህንተና ሀእ ዬላይያ በን ህንተ ኢታ ኦሱዋፐ አይ ማደ ደምደቲ? ሄ ኦሶታ ዉርሰꬃይ ሀይቆ። 22 ሽን ህንተ ናጋራ አይለተꬃ ቃሾፐ ብለትድ፥ ፆሳስ አይለ ግድደታ። ሄስ ህንተና ጌሽ ኦꬅድ መርና ደኡዋኮ ካለꬄስ። 23 ናጋራ ጋተይ ሀይቆ። ሽን ፆሳይ፥ ኑ ጎዳ ክርስቶስ የሱሳ ባጋራ እምያ እሞታይ መርና ደኦ።

<- ሮመ ኪታ 5ሮመ ኪታ 7 ->