ሮመ ኪታ 3

አይሁደታ አማኖ እፆ

1 ያትን፥ አይሁደ ግዶን አይ ዱማተꬅ ደኢ? ዎይኮ ቃፃረተꬃን አይ ማደይ ደኢ? 2 ቱማካ አይሁደ ግዶይ ዳሮ ኦገራ ማዴስ። ኡባፈ ስን ፆሳይ ባ ቃላ ሀዳራ አይሁደታስ እሚስ።

3 ያትን፥ ኤንታፈ እሶት እሶት ቃላ አማኖና እፅኮ፥ ኤንታ እፆይ ፆሳ አማነተꬃ ድግዬ? 4 ድገና! አሳ ኡባይ ዎርዳንቾ ግድኮካ ፆሳይ ቱማ ግዶ። ጌሻ ማፃፋን፥

“ነ ቃላን ነ ፅላሳ፤

ነና ሞተይሳ ፕርዳን ላꬃሳ”

ጌተትድ ፃፈትስ። [a]

5 ያትን፥ ኑ ናጋራይ ፆሳይ ፅሎ ግደይሳ በሲያባ ግድኮ፥ ኑ ዎይጋኔ? ፆሳይ ኑ ናጋራ ግሾ፥ ኑ ቦላ ፕርድኮ፥ ልከ ግደነዬ? ሀይሳ ታኒ አሳ ቆፋꬆ ጋይስ። 6 ሄስ ኡባራካ ሀነና። ሄሳዳ ሀንኮ፥ ፆሳይ ሀ አላምያ ቦላ ዋት ፕርዳኔ?

7 ሽን ታ ዎርዶተꬃይ ፆሳ ቱማ ቆንጭስድ፥ እያ ቦንቹዋ ዳርስ በሲያባ ግድኮ፥ ያትን፥ አይስ ታ ቦላ ናጋራንቾዳ ፕርዴቲ? 8 እስ እስ አሳይ፥ “ሎኦይ ያና መላ ኢታ ኦꬆስ” ያግድ ታማርስያዳ ኦꬅድ ታና ሞቶሶና። ሄሳ መላ አሳ ቦላ ያ ፆሳ ፕርዳይ ልከ።

አስ ኡባይ ናጋራንቾ

9 ያትን፥ ኑኒ ዎይጋኔ? ኑ አይሁደት፥ አይሁደ ግዶናይሳታፐ አꬎናዬ? ግደና! አይሁደ ግድን፥ አይሁደ ግዶና እፅን ኡባይ ናጋራንቾ ግደይሳ ታኒ ካሰታዳ ህንተዉ ኦዳስ።

10 ጌሻ ማፃፋን፥

“ፅሎ አስ እሶይካ ባዋ። [b]

11 አኬክያ አስ ባዋ፥

ፆሳ ኮይያ ኦንካ ባዋ።

12 አሳ ኡባይ ፆሳስ ዞኮ ዛርዶሶና፤

ኡባይ እስፈ ፓꬆናባ ግድዶሶና።

ሎኦ ኦꬅያ ኦንካ ባዋ፤

እስ አስካ ባዋ።

13 ኤንታ ዶናፐ ከይያ ቃላይ፥

ዶየትዳ ዱፎፐ ከይያ ፅንቆ መላ፤

ባንታ እንፃርሳን ጭሞሶና።

ኤንታ ዶናፐ አሰ ዎꬍያ፥

ሾሻ ማርዘይ ከዬስ። [c]

14 ኤንታ ዶናን ጫሞ ኦዳይነ ባደꬅ ኩምስ። [d]

15 ኤንቲ ሱꬅ ጉሳናዉ ኤለሶሶና። [e]

16 ኤንታ ኦግያን ꬋዮይነ ቆሆይ ደኤስ።

17 ኤንቲ ሳሮተꬃ ኦግያ ኤሮኮና።

18 ባንታ ደኡዋን ፆሳስ ያዮኮና”

ጌተትድ ፃፈትስ። [f]

19 አሰ ኡባ ዶና ኦይꬃናዉነ ኩመꬃ አላምያ ፆሳ ፕርዳፈ ጋርሳን ሺሻናዉ፥ ህገይ እመትዳይ ህገፈ ጋርሳን አቀይሳታስ ግደይሳ ኑ ኤሮስ። 20 ሄሳ ግሾ፥ ኦንካ ህገስ ኪተትድ ፆሳ ስንꬃን ፅላናዉ ዳንዳኤና። ህገይ አስ ኡባይ ናጋራንቾ ግደይሳ በሴስ። [g]

ፅሎተꬅ አማኖና

21 ሽን ሀእ ፆሳይ አስ ህገይ ባይናሽን ፅልያ ኦገ ቆንጭስስ። ሄ ኦግያ ሙሰ ህገይነ ናበት ማርካትዶሶና። 22 ሀ ፅሎተꬃ፥ ፆሳይ የሱስ ክርስቶሳ ባጋራ አሳ ኡባስ ሻኮይ ባይና እሜስ።

23 አሳ ኡባይ ናጋራ ኦꬅዶሶና፤ ፆሳይ ኤንታዉ እምዳ ቦንቹዋፈ ሃክድ አትዶሶና። 24 ሽን ኤንቲ ፆሳ አꬎ ኬሀተꬃን፥ ዎዝያ ክርስቶስ የሱሳ ባጋራ ጮ ፅልዶሶና። 25 ፆሳይ የሱስ ክርስቶሳ ያርሾ ኦꬅድ እምዳይ፥ እያ አማንያ ኡባይ እያ ሱꬃን ናጋራ አቶተꬅ ደማና መላሳ። ፆሳይ ሄሳ ኦꬅዳይ ባ ዳንዳአን ካሰ ናጋራ ታይቦና አግድ፥ ባ ፅሎተꬃ በሳናሳ። 26 ሀእ ዎድያን የሱሳ አማንያ ኡባ ፅልስድ፥ ፆሳይ ባ ሁጰን ፅሎ ግደይሳ በሴስ።

27 ያትን፥ ኑ ጬቀትያባይ አይብ ደኢ? አይብካ ባዋ። ኑኒ ጬቀተይ ህገስ ኪተትያ ግሾዬ? አካይ! አማኖ ግሾሳ። 28 ፆሳይ አሰ ፅልሰይ አማኖናፐ አትሽን፥ ህገስ ኪተተꬃን ግዶናይሳ ኑ አኬኮስ።

29 ዎይኮ ፆሳይ አይሁደታ ፃላላ ፆሰዬ? አይሁደ ግዶናይሳታስ ፆሰ ግደነዬ? ቱማ፥ አይሁደ ግዶናይሳታስካ እ ፆሰ። 30 ፆሳይ እሶ፤ አይሁደታነ አይሁደ ግዶናይሳታ አማኖን ፅልሰይ እያ። [h] 31 ያትን፥ ኑኒ ህግያ አማኖ ግሾ ሻሮስ ጉሰዬ? ግደና! ህግያ ምንꬆስፐ አትሽን።

<- ሮመ ኪታ 2 ሮመ ኪታ 4 ->