2 ሄሳፈ ጉየ፥ ታኒ ላፑን ሞይዘት እመትዳ ላፑን ኪታንቾታ ፆሳ ስንꬃን ኤቅዳይሳታ በአስ።
3 እፃነ ጩይስያ ዎርቃ ሻተ ኦይክዳ ሀራ ኪታንቾይ ይድ፥ ያርሾ በሳ ማታን ኤቅስ። እ አራታ ስንꬃን ደእያ ዎርቃ ያርሾ በሳ ቦላ ጌሻታ ኡባ ዎሳራ ጉጅድ ያርሻና መላ እያዉ ዳሮ እፃነይ እመትስ። 4 እፃንያ ጩያይ ጌሻታ ዎሳራ እስፈ ኪታንቹዋ ኩሸፐ ፑደ ፆሳኮ ከይስ። 5 ሄሳፈ ጉየ፥ ኪታንቾይ እፃነ ጩይስያ ሻትያ ኤክድ፥ እያን ያርሾ በሳፈ ቦንቆ ታማ ኩንꬅድ ሳአ ዱገ ሆልስ። ያትን ደሾይ፥ ዎልአንꬅ፥ ግርስነ ቢታ ቃፆይ ሀንስ። [a]
7 ኮይሮ ኪታንቾይ ባ ሞይዝያ ፑንያ ዎደ ሻችነ ሱꬃራ ዋላከትዳ ታም ሳሎፐ ቡክስ። ሳኣፐ ስኮይ ፁገትስ፤ ምꬃፈ ስኮይ ፁገትስ፤ ጭልኦ ማታ ኡባይ ፁገትስ። [b]
8 ናምአንꬆ ኪታንቾይ ባ ሞይዝያ ፑንዳ ዎደ ዎልቃማ ዙማ ዳንያባይ ታማን ኤፅሸ አባን የገትስ። ያትን፥ አባፈ ስኮይ ሱꬁ ግድስ። 9 አባን ደኦን ደእያ መተꬃፈ ስኮይ ሀይቅስ፤ ማርካበታፐ ስኮይ ꬋይስ።
10 ሄꬓንꬆ ኪታንቾይ ባ ሞይዝያ ፑንዳ ዎደ ፆምፐዳ ኤፅያ ዎልቃማ ፆልንቶይ ሻፋፐ ስኩዋ ቦላነ ፑልቶታ ቦላ ሳሎፐ ዎꬍስ።[c] 11 ሄ ፆልንቱዋ ሱንꬃይ ጫሞ ጌተቴስ። ሃꬃፈ ስኩዋ ጫምስስ፤ ሃꬃይ ጫምዳ ግሾ፥ ዳሮ አሳይ ሄ ሃꬃ ኡይድ ሀይቅዶሶና። [d]
12 ኦይዳንꬆ ኪታንቾይ ባ ሞይዝያ ፑንስ። አዋፐ፥ አጌናፐነ ፆልንቶታፐ ስኩዋ ደችስ፤ ኤንታ ፖኡዋፐ ስኮይ ꬉምስ። ጋላሳፐ ስኮይ፥ ቃማፈካ ስኮይ ꬉምስ።[e]
13 እስ አርጋንꬅ ሳሎ ꬎቁ ግድ፥ ፕራꬍሽን በአስ። ሄ አርጋንꬃይ ባ ቃላ ꬎቁ ኦꬅድ፥ “አትዳ ሄꬑ ኪታንቾት ባንታ ሞይዝያ ፑናናዉ ደእያ ግሾ፥ ሳአን ደእያ አሳ አየ! አየ! አየ!” ያግሽን ስአስ።