1 ያትድ፥ ኪታንቾይ ታና ፆሳ ካዎተꬃ አራታፐነ ዶርሳ ካዎተꬃ አራታፐ ጎግያ ማስቶተዳ ጶልያ ደኦ ሃꬃ ሻፋ በስስ። [a] 2 ሄ ሻፋይ ካታማ ኦግያ ግዶራ ዱገ ጎጌስ። ሻፋፐ ሄፍንꬃ ባጋራነ ሀፍንꬃ ባጋራ አጌናን እስ ቶሆ፤ ላይꬃን ታማነ ናምኡ ቶሆ አይፍያ ደኦ ምꬅ ደኤስ። ሄ ምꬃ ቦንጮይ ካዎተꬃታ ኡባ ሀርገፈ ፓꬄስ።[b]
3 ሄ ካታማን አይብ ባደꬅካ ዴና። ፆሳ ካዎተꬃ አራታይነ ዶርሳ ካዎተꬃ አራታይ ሄ ካታማን ዳና። ፆሳ አይለት ፆሳስ ኦꬃና።[c] 4 ኤንቲ እያ ሶምኡዋ በአና፤ እያ ሱንꬃይ ኤንታ ሶምኦን ፃፈታና። 5 ህዛፐ ቃም ዴና፤ ጎዳ ፆሳይ ኤንታዉ ፆምፐ ግድያ ግሾ ኤንታዉ ፆምፐ ዎይኮ አዋ ፖኦ ኮሸና። ኤንቲ መር መርናዉ ካዎታና። [d]
8 ታኒ፥ ዮሃንስ፥ ሄ ኡባባ ስአስ፤ በአስ። ታኒ ሄሳ ስእዳ ዎደነ በእዳ ዎደ ሄሳ ታና በስዳ ኪታንቹዋ ጎይናናዉ እያ ቶሁዋ ቦላ ኩንዳስ። 9 ሽን ኪታንቾይ ታኮ፥ “ሄሳ ኦꬆፋ! ታኒ ኔዳ፥ ናበታዳ ነ እሻታዳነ ሀ ማፃፋን ደእያ ኡባ ኪተትያ አይለታ መላ፤ ፆሳ ጎይና” ያግስ።
10 ኪታንቾይ ዛሪድ፥ “ሀ ኡባይ ፖለትያ ዎደይ ማታትዳ ግሾ ሀ ማፃፋን ፃፈትዳ ትንብተ ቃላ ማታመን ጎርዶፋ። 11 ኢታ ኦይ ጉጅድ ኢታ ኦꬆ፤ ቱነይ ጉጅድ ቱኖ። ሎኦ ኦይ ጉጅድ ሎኦ ኦꬆ፤ ጌየይ ጉጅድ ጌዮ” ያግስ። [e]
12 የሱሲ፥ “ሄኮ፥ ታኒ ኤለሳዳ ያና። እሱዋስ እሱዋስ እያ ኦሱዋዳ እማናዉ ታ ዎይቶይ ታራ ደኤስ። [f] 13 ታኒ አልፋነ ኦመጋ፤ ኮይሮነ ዉርሰꬅ፤ ዶመꬅነ ፖሎ። [g]
14 “ባንታ ማኡዋ ሜጭድ ጌሸይሳት አንጀትዳይሳታ። ደኦ ምꬄ አይፍያ ማናዉነ ካታማ ፐንግያራ ገላናዉ ኤንታዉ ማት እመትስ። [h] 15 ሽን ካናት፥ ብተይሳት፥ ላይማተይሳት፥ ሸምፖ ዎይሳት፥ ኤቃ ጎይነይሳት፥ ዎርዶ ዶሰይሳትነ ኦይሳት ካረን ደኦሶና።
16 “ታኒ፥ የሱሲ፥ ሀ ማርካተꬃ ህንተዉ፥ ዎሳ ኬꬃታስ ኦዳና መላ ታ ኪታንቹዋ ኪታስ። ታኒ ዳዊታ ሼሽነ ኮቸ። ታኒ ፖእያ ጉራ ባካላ” ያግስ። [i]
17 ጌሻ አያናይነ ገላናዉ ጊግዳ ማጫስያ፥ “ሃያ” ያጎሶና። ቃስ ሀይሳ ስእያ ኦንካ፥ “ሃያ” ያጎ። ሳሞትዳ ኦንካ ሃዮ፤ ደኦ ሃꬃ ኮይያ ኦንካ ጮ ኤኮ። [j]
18 ታኒ ሀ ማፃፋን ፃፈትዳ ትንብተ ቃላ ስእያ ኦናካ ዞራይስ። ኦንካ ሀ ቃላ ቦላ እስባ ጉጅኮ፥ ፆሳይ ሀ ማፃፋን ፃፈትዳ ቦሻ እያ ቦላ ጉጃና። [k] 19 ኦንካ ማፃፋን ደእያ ትንብተ ቃላፐ እስባ ፓጭስኮ፥ ፆሳይ ሀ ማፃፋን ፃፈትዳ ደኦ ምꬃ አይፍያፐነ ጌሻ ካታማፐ እያ ቃዳ ፓጭሳና።
20 ሀ ኡባ ማርካተይስ፥ “ቱማ፥ ታኒ ኤለሳዳ ያና” ያጌስ።