8 ኦይዳንꬆ ኪታንቾይ ባ ፁአን ደኤይሳ አዋ ቦላ ጉስን፥ አዋይ ባ ሴላን አሳ ፁጋና መላ አዋስ ዎልቅ እመትስ። 9 አሳይ ዎልቃማ ሴላን ፁገትድ፥ ሄ ቦሻታ ቦላ ማት ደእያ ፆሳ ሱንꬃ ባድዶሶና፤ ባንታ ናጋራፐ ስሚድ ፆሳ ቦንችቦኮና።

10 እቻሻንꬆ ኪታንቾይ ባ ፁአን ደኤይሳ ዶኣ አራታ ቦላ ጉስን፥ ሄ ዶኣ ካዎተꬃይ ꬉምስ። አሳይ ኡንኣ ግሾ፥ ባንታ እንፃርሳ ሳፆሶና። [d] 11 ቃስ አሳይ ኡንኣ ግሾነ ማዱንꬃ ግሾ፥ ሳሎ ፆሳ ባድዶሶና፤ ባንታ ኦꬅዳ ናጋራፐ ስምቦኮና።

12 ኡሱፑንꬆ ኪታንቾይ ባ ፁአን ደኤይሳ ግታ ኤፍራፂሳ ሻፋን ጉስን፥ ዶሎሀ ባጋፈ ያና ካዎታስ ኦገይ ጊጋና መላ ሃꬃይ መልስ። [e] 13 ሄሳፈ ጉየ፥ ሾ ዳንያ ሄꬑ ቱና አያናት ዳውያ ዶናፐ፥ ዶኣ ዶናፐነ ዎርዶ ናብያ ዶናፐ ከይሽን በአስ። 14 ኤንቲ ማላታታ ኦꬅያ ቱና አያናታ። ሄ ሄꬑ ቱና አያናት ኡባፈ ዎልቃማ ፆሳ ግታ ጋላሳን ሀናናዉ ደእያ ኦላስ ሺሻናዉ አላመ ካዎታ ኡባኮ ባና።

15 “ሄኮ፥ ታ ካይሶዳ ያና! አሳ ስንꬃን ካሎቶናዳነ ዬላቶናዳ ባርክድ፥ ባ ማኡዋ ናግያ ኡራይ አንጀትዳይሳ!” ያግስ። [f]

16 ሄ ቱና አያናት ካዎታ እብራወꬆ ዶናን አርማገዶነ ጌተትያ በሳን ሺሽዶሶና። [g]

17 ላፑንꬃ ኪታንቾይ ባ ፁአን ደኤይሳ ጫርኮ ቦላ ጉስን፥ ፆሳ ኬꬃን ደእያ አራታፐ፥ “ፖለትስ” ግያ ዎልቃማ ቃላይ ይስ። 18 ሄሳፈ ዎልአንꬅ ዎልአምስ፤ ዳዳይ ꬉቅስ፥ ቢታይ ቃፅስ። አስ ሳአን መቶሳፐ ቢት ሄሳ መላ ቃፆ ቃፅቤና። ሄስ ኡባፈ አꬍዳ ቃፆ። [h] 19 ግታ ካታማይ ሄꬓ ከይድ ሻከትስ፤ ቢታ ኡባን ደእያ ካታማት ꬋይዶሶና። ፆሳይ ግታ ካታማ ባብሎነ ቆፕድ፥ ባ ኢታ ሀንቆ ዎይነ ኡሻይ ኩምዳ ፁኣ እዉ እሚስ። [i] 20 ዩሾይ አባን ተቀትዳ ቢታት ꬋይዶሶና፤ ደረትካ በንትቦኮና። [j] 21 አሳ ቦላ ኦይታማነ እቻሹ ክሎ ግራመ መላ ዴፅያ ዎልቃማ ሻች ሳሎፐ ቡክስ። ቦሻይ ዳሮ ኢታ ግድያ ግሾ አሳይ ሻቻ ቦሻ ግሾ ፆሳ ባድዶሶና። [k]