135
ፆሳ ሱንꬃይ መርናዉ ኤረቴስ
1 ጎዳ ጋላትተ!
ህንተኖ፥ ጎዳ አይለቶ፥
ጎዳ ሱንꬃ ጋላትተ!
2 ህንተኖ፥ ጎዳ ኬꬃን፥
ኑ ፆሳ ኬꬃ ዳባባን ኤቀይሳቶ፥
ጎዳ ጋላትተ!
3 እ ኬሀ ግድያ ግሾ ጎዳ ጋላትተ!
እ ሎኦ ግድያ ግሾ እያ ሱንꬃ ሳቢተ!
4 ጎዳይ ያይቆባ ባባ፥
እስራኤለ ባዉ ቡዞ ኦꬅድ ዶርስ።
5 ጎዳይ ግታ ግደይሳነ
ኑ ጎዳይ፥ ፆሳታ ኡባፈ አይሳ
ታኒ ኤራይስ።
6 ሳሎን ሳአን፥ አባንነ እያ ግዶን
ጎዳይ ባ ዶስዳባ ኡባ ኦꬄስ።
7 ሻራ ሳኣ ጋፃፐ ደንꬄስ፤
ዎልአንꬅ እራራ ኪቴስ፤
ጫርኮ ባ ምንጃ ኬꬃፈ ከሴስ።
8 ግብፀ ቢታን አሳፐ መሄ ጋካናዉ፥
ባይራ የለትዳ ኡባ ዎꬍስ።
9 ነኖ ግብፀ፥
ፓሮናነ እያ አይለታ ኡባ ሴራናዉ
ማላታታነ ማላልስያባታ ኪትስ።
10 እ ዳሮ ካዎተꬃታ ꬋይስስ፤
ዎልቃማ ካዎታ ዎꬍስ።
11 አሞረ ካዋ ስሆና
ባሳነ ካዋ ኦገነ
ካናነ ካዎታ ኡባ ዎꬍስ።
12 ኤንታ ቢታ ባ አሳ፥
እስራኤለ ላትስስ።
13 ጎዳዉ፥ ነ ሱንꬃይ መርናዉ ዳና፤
የለታፐ የለታ ጋካናዉ ነ ሀሳየታና።
14 ጎዳይ ባ አሳስ ፕርዳና፤
እ ባ አይለታስ ቃታና።
15 ካዎተꬃታ ኤቃት አሳ ኩሸ ኦሶታ፤
ብራፐነ ዎርቃፈ መትዳይሳታ።
16 ኤንታዉ ዶን ደኤስ፥ ሽን ሃሳዮኮና፤
አይፈይ ደኤስ፥ ሽን ፄሎኮና።
17 ሀይꬅ ደኤስ፥ ሽን ስኦኮና፤
ኤንታ ሲን ሸምፖይ ባዋ።
18 ኤንታ መꬍዳይሳትነ
ኤንታን አማነተይሳት
ኡባይ ኤንታዳ ሀኖ።
19 እስራኤለ አሳዉ ጎዳ ጋላትተ፤
አሮና ሶ አሳዉ ጎዳ ጋላትተ።
20 ሌወ ሶ አሳዉ ጎዳ ጋላትተ፤
ጎዳ ያየይሳቶ ኡባይ ጎዳ ጋላትተ።
21 የሩሳላመን ደእያ ጎዳይ
ፅዮነን ጋላተቶ!