1 ጎዳይ ሙሰኮ፥ 2 “እስራኤለ አሳይ ባሮ ሀርገን ኦይከትዳ አስ ዎይኮ አሳተꬃፈ ጎግያባይ ደእያ አስ ዎይኮ አሀ ቦችድ ቱንዳ አስ ኦናካ ባንታ ጉታፐ ከሳና መላ ኪታ። 3 ታ ኤንታ ግዶን ደእያ ጉታ ቱንሶና መላ ሀ ጌሽ ግዶና አሳት ማጫ ግድን አደ ኤንታ ግዶፈ ከሳዳ ጎዳ” ያግስ። 4 ጎዳይ ሙሰ ኪትዳይሳዳ እስራኤለ አሳይ ኤንታ ኡባ ጉታፐ ከስድ ጎድዶሶና።

5 ጎዳይ ሙሰኮ፥ 6 “ኔኒ እስራኤለ አሳስ ሀይሳ ኦዳ፤ አደ ግድን ዎይኮ ማጭ ግድን ኦንካ ጎዳስ አማነቶና እፅድ ሀራ አስ ናቅኮ ሄ ኡራይ ባላ ኦꬅስ። 7 እ ባ ናጋራ ፓፆ፤ ባ ናጋራ አጭያ ኩመꬃ አጫ ቦላ ፄታፐ ላታሙ ኩሸ ጉጅድ እ ናቅዳ ኡራስ ጭጎ። 8 ሽን ሄ ናቀትዳ ኡራይ ሀይቅዳባ ግድኮ፥ አጫ ኤካናዉ ማታ ዳቦይ እያዉ ꬋይኮ፥ ሄ አጫይ ጎዳስ ግድድ ካህንያስ እመቶ። ሄ አጫ ቦላ ጉጅድ እያ ናጋራ አቶተꬃስ ቆሆ ያርሾስ ግድያ ማራዘ ዶርስ እሞ። 9 ቃስ እስራኤለ አሳይ ጎዳስ እምያ ጌሻ እሞ ኡባይ ሄ ካህንያስ ግዶ። 10 እስ እስ አስ እምያ ጌሻ እሞታይ ሄ ኡራባ፥ ሽን ካህንያስ እምኮ ሄ እሞታይ ካህንያሳ” ያግስ።

11 ጎዳይ ሙሰኮ፥ 12 “እስራኤለ አሳስ ያጋዳ ኦዳ፤ እስ አድያ ማችያ ካረ ሄመታዳ እያዉ አማነቶና እፅኮ፥ 13 ሀራ አደራ አቅኮ፥ ቃስ ሄሳ እያ ባ አዝናፐ ቆስኮ፥ እያ ላይማትሽን በእዳ ማርክ ባይናባ ግድኮ፥ 14 እ አዝናይ እዮ ቱናሱ ግድ ስꬍኮ፥ ዎይኮ እያ ቱኖና ደእሽን እ ባ ማችዉ ስꬍኮ፥ 15 ሄ አደይ ባ ማችዉ ካህንያኮ ኤፎ። እ ግሾ ያርሻናዉ እስ ክሎ ግራመ ባንጋ ꬊለ ኤፎ። ሄ አደይ ባ ማችዉ ስꬍዳ ግሾ፥ እ ቆሁዋ ቆንጭስያ ካꬃ ያርሾ ግድያ ግሾ፥ ꬊልያ ቦላ ዛይተ ትጎፖ፤ እፃነ እያ ቦላ ዎꬆፎ።”

16 ካህነይ ሄ ማጫስዉ ጎዳ ስንꬃን ኤሶ። 17 ጌሻ ሃꬅ ከረን ኤኮ። ጌሻ ዱንካንያ ዉይግያፐ ቢታ ኤክድ ሄ ሃꬃን ጉጆ። 18 ሄ ማጫስዉ ጎዳ ስንꬃን ኤሶ፤ ሄ ማጫሰ ሁጵያ ብልድ ስꬍዳ ግሾ ያርሸትያ ቆሁዋ ቆንጭስያ ካꬃ ያርሾ እ ኩሸን ዎꬆ፤ ቃስ ካህነይ ባ ኩሸን ባደꬅ ኤህያ ጫሞ ሃꬃ ከረን ኦይኮ። 19 ሄሳፈ ጉየ ማጫስዉ ያግድ ጫቅሶ፤ “ኔኒ ሀራ አደራ አቃቦናባ ግድኮ፥ ነናተꬃ ቱንሳቦናባ ግድኮ፥ ባደꬅ ኤህያ ሃꬃይ ነዉ ጎመ ግዶፖ። 20 ሽን ኔኒ ነ አዝና አጋዳ ሀራ አደራ አቃዳ ቱንዳባ ግድኮ፥ 21 ጎዳይ ነ የሎ ኬꬃ ጉንድስድ፥ ነ ኡሉዋ ጋቢስድ ነ አሳ ስንꬃን ነና ባደትዳባ ኦꬆ። 22 ሀ ባደꬅ ኤህያ ሃꬃይ ነ ኡሉዋን ገልድ ነ ኡሉዋ ጋቢሶ፤ ነ የሎ ኬꬃ ጉንድሶ” ያግድ ጫቅሶ።

ማጫስያ፥ “አምንእ፥ ሄስ ታና ጋኮ” ያጎ።

23 “ሀይሳፈ ጉየ፥ ካህነይ ሄ ባደꬃ ፃፎ፤ ሄ ፃፍዳይሳ ከርያን ደእያ ሃꬃን ሜጮ። 24 ቃንገꬅ ኤህያ ሃꬃ ማጫስዉ ኡሻናፐ ስን፥ 25 ካህነይ ማጫሰ ኩሸፐ ያርሾ ꬊልያ ኤክድ፥ ደንꬆ ያርሾ ኦꬅድ ጎዳስ ያርሾ። 26 ካህነይ ያርሾ ካꬃፈ ዞለ ኤክድ ባላ ቆንጭስያ ያርሾ ኦꬅድ ያርሾ በሳን ፁጎ። ሄሳፈ ጉየ፥ ማጫስዉ ሄ ሃꬃ ኡሾ። 27 እያ ባ አዝናስ አማነቶና እፃዳ ቱንዳባ ግድኮ ባደꬃ ሃꬃይ እ ኡሉዋን ጫሞ ሳሆ መꬎ። እ ኡሎይ ጋባና፤ እ የሎ ኬꬃይካ ጉንዳና፤ እያ ባ አሳ ግዶን ባደትዳሮ ግዳና። 28 እያ ቱናቦናባነ ፅሎ ማጫስ ግድኮ፥ እያ ጌሽ ግዳና፤ ናአ የላናዉ ዳንዳአዉሱ።

29-30 “እስ አስ ባ ማችዉ ላይማታሱ ግድ ስꬍኮ ዎይኮ ቃናትኮ ያርሾ በሲ ኤህድ እዮ ኤሶ። ካህነይ ሄ ዎጋ ኡባ እ ቦላ ፖሎ። 31 አዝናይ፥ ቆሆይ ባይናባ ግዳና፥ ሽን ማችያ ባ ናጋራ ጋሶን ጋክያ ዋየ ኡባ ቶካና” ያግስ።

<- ታይቦ ማፃፋ 4ታይቦ ማፃፋ 6 ->