1 ጎዳይ ሲና ዙማ ቦላ ሙሰራ ኦደትያ ዎደ ደእያ አሮናነ ሙሰ ሶ አሳይ ሀይሳፈ ካልድ ፃፈትዳይሳ። 2 አሮና አደ ናይታ ሱንꬃይ፥ ባይራይ ናዳባ፥ ካለይ አብዮዳ፥ አላዛራነ እታማራ። 3 ሄ አሮና አደ ናይት ኡባይ፥ ካህነ ግድድ ኦꬃናዉ ትየትድ ሹመትዶሶና። 4 ሽን ኤንታ ግዶፈ ናዳበይነ አብዮድ ሲና መላ ቢታን ጎዳ ስንꬃን ጌሽ ግዶና ታማን ያርሾ ያርሽድ ሀይቅዶሶና። ኤንታዉ ናእ ባዋ። ሄሳ ግሾ፥ ኤንታ አዋይ አሮን ፓፃ ደእዳ ላይꬃ ኡባን አላዛርነ እታማራ ፃላል ካህነ ግድድ ኦꬅዶሶና።

5 ጎዳይ ሙሰኮ፥ 6 “ሌወ ኮቻታ ኤሀዳ ካህንያ አሮና ማዳና መላ ኤንታ እያ ስን ሺሻ። 7 ኤንቲ አሮናነ እስራኤለ ማባራ ኡባ ጌሻ ዱንካንያ ስንꬃን ዱማ ዱማ ኦሶ ኦꬅድ ማዶ። 8 ኤንቲ ጌሻ ዱንካንያ ግዶን ደእያ ሚሸ ኡባ አዋተꬃን አይሶ። እስራኤለ አሳ ግሾ ጌሻ ዱንካንያ ግዶን ኦሶ ኡባ ኤንቲ ኦꬆና። 9 አሮናነ እያ አደ ናይታ ማዳና መላ ሌወታ ሹማ። ኤንቲ እስራኤለ አሳ ግዶፈ ሻከትድ አሮና ማዳና መላ እመትዶሶና። 10 አሮናነ እያ አደ ናይታ ካህነ ኦꬃዳ ሹማ። ኤንታፈ ሀራ አስ ኦንካ ጌሻ ዱንካንያኮ ሺቅኮ ሀይቆ” ያግስ።

11 ቃስ ጎዳይ ሙሰኮ፥ 12 “ታኒ እስራኤለን የለትያ ባይራ አደ ናይታ ግሾ ሌወታ ኤካስ። ሌወት ታባ። 13 አይስ ጊኮ፥ ባይራ የለትዳ ኡባይ ታባ። ታ ግብፀ ቢታን ባይራ የለትዳ ኡባ ዎꬍዳ ጋላሳን፥ እስራኤለን ባይራ የለትዳባ ኡባ አሰ ግድን፥ መሄ ግድን፥ ታዉ ዱማያስ። ኤንቲ ታባ ግዳና። ታኒ ጎዳ” ያግስ።

14 ቃስካ ጎዳይ ሙሰኮ ሲና መላ ቢታን፥ 15 “ሌወታ ኤንታ ኮቻን፥ ቃስ ኤንታ ሶ አሳን አሳን ታይባ። የለትን እስ አጌናነ እያፐ ቦላ ግድዳ አደ ናይታ ኡባ ታይባ” ያግስ። 16 ያትን ጎዳይ ኪትዳይሳዳ ሙሰይ ኤንታ ታይብስ።

17 ሌወ አደ ናይት ገድሶና፥ ቃሀታ ማራራ። 18 ገድሶና አደ ናይት ልብናነ ሳመአ ጌተቶሶና። 19 ቃሃታ አደ ናይት አምራማ፥ ይዝሃራ፥ ከብሮናነ ኡዝኤላ። 20 መራራ አደ ናይት ማህላነ ሙሳ ጌተቶሶና። ሌወታ ማይዛት ሀይሳታ።

21 ናምኡ ገድሶና ኮቻት ልብናነ ስምአ። 22 የለትን እስ አጌናነ እያፐ ቦላ ግድዳ አደ ናይታ ታይቦይ 7,500. 23 ገድሶና ኮቻት ጌሻ ዱንካንያፐ ጉየን ዉሎሀ ባጋን ዱንካንዶሶና። 24 ገድሶና ኮቻ ሶ አሳ ሀላቃይ ላኤላ ናኣ ኤልያሳፋ። 25 ገድሶና ኮቻስ ጌሻ ዱንካንያ ቦላ ደእያ አዋተꬃይ፥ ዱንካንያ፥ ጋꬃ ካማ፥ ካረ ካማ፥ ዉላ ማጋራጁዋ፥ 26 ዱንካንያ ዩሾን ደእያ ዳባባ ማጋራጁዋ፥ ያርሾ በሳ ማጋራጁዋ፥ ዳባባ ዉላ ማጋራጁዋ፥ ዎዶሮታነ እያን ጎኤትያ ሚሸታ ኡባ አዋተꬃን አይሶሶና።

27 ቃሃታ ኮቻት አምራማ፥ ይዝሃራ፥ ከብሮናነ ኡዝኤላ። 28 የለትን እስ አጌናነ እያፐ ቦላ ግድዳ አደ ናይታ ታይቦይ 8,600. ቃሃታ ኮቻት ጌሻ ዱንካንያ አዋተꬃን ናጎሶና። 29 ቃሃታ ኮቻት ጌሻ ዱንካንያፐ ዱገሀ ባጋራ ዱንካንዶሶና። 30 ቃሃታ ኮቻ ካለይ ኡዝኤላ ናኣ ኤልዛፋና። 31 ኤንቲ ታቦትያ፥ ፃርጴዛ፥ ፆምፐ ዎꬅያ ኮጫ፥ ያርሽሶ በሳ፥ ካህነት ጎኤትያ ጌሻ ዱንካንያ ሚሸታ፥ ኡባፈ ጌሻ በሳ ገልያ ዉላ ቦላ ደእያ ማጋራጁዋ አዋተꬃን አይሶ። 32 ሌወታ ሀላቃይ ካህንያ አሮና ናኣ አላዛራ። እ ጌሻ በሳን ኦይሳታስ ሹማ።

33 መራራ ኮቻት ማህላነ ሙሳ። 34 የለትን እስ አጌናነ እያፐ ቦላ ግድዳ አደ ናይታ ታይቦይ 6,200. 35 መራራ ኮቻ ካለይ አብካላ ናኣ ዙርኤላ። መራራ ኮቻይ ጌሻ ዱንካንያፐ ፑደሀ ባጋራ ዱንካንዶሶና። 36 መራራ ኮቻይ ዱንካንያ ቱቀታ፥ ልዮታ፥ ቱሳታነ ቱሳት ኤቅያ ገዳታ፥ ሄሳዳካ ግዶን ኮሽያ ሚሸታ ኡባ ኤንቲ አዋተꬃን አይሶሶና። 37 ጉጅድካ፥ ዱንካንያ ዩሾን ደእያ ዳባባ ቱሳታነ ኤንታ ገዳታ፥ ꬍሸታነ ዎዶሮታ አዋተꬃን አይሶሶና።

38 ጌሻ ዱንካንያ ስንꬃን ዶሎሀ ባጋራ ሙሰይ፥ አሮንነ እያ አደ ናይት ዱንካንዶሶና። ጌሻ ዱንካንያ ግዶን እስራኤላ አሳ ግሾ ኦሰትያ ኦሶ ኡባ ኤንቲ አዋተꬃን አይሶሶና። ሀራ አስ ጌሻ ዱንካንያኮ ሺቅኮ ሀይቆ።

39 ጎዳይ፥ ሙሰነ አሮና ኪትዳይሳ መላ እስ አጌናነ እያፐ ቦላ ግድዳ ሌወታ አደ ናይታ ታይቦይ 22,000.

40 ጎዳይ ሙሰኮ፥ “የለትን እስ አጌናነ እያፐ ቦላ ግድዳ እስራኤለ ባይራ አደ ናይታ ታይባዳ ኤንታ ሱንꬃ ፃፋ። 41 እስራኤለ ባይራ አደ ናይታ በሳን ሌወታ፥ ቃስ እስራኤለ ባይራ መህያ በሳን ሌወታ ባይራ መህያ ታዉ ኤካ። ታኒ ጎዳ” ያግስ። 42 ጎዳይ ሙሰ ኪትዳይሳዳ እስራኤለን ባይራ የለትዳ ኡባ ታይብስ። 43 የለትን እስ አጌናነ እያፐ ቦላ ግድዳ ባይራ አደ ናይታ ታይቦይ 22,273.

44 ጎዳይ ሙሰኮ፥ 45 “እስራኤለ ባይራ አደ ናይታ በሳን ሌወታ ታዉ ዱማያ። ቃስ እስራኤለ ባይራ መሄታ በሳን ሌወታ ባይራ መህያ ታዉ ዱማያ፤ ታኒ ጎዳ። 46 እስራኤለ ባይራ አደ ናይታ ታይቦይ ሌወታ ባይራ አደ ናይታ ታይቡዋፐ 273 አꬍያ ግሾ ሄ አትዳይሳታ ታዉ ዎዛ። 47 እሱዋስ እሱዋስ ጌሻ ዱንካነን ኤረትዳ ምዛነን እቻሹ ብራ ሳንትመን ዎዛ። 48 ሄ ዎዞ ሚሽያ አሮናስነ እያ አደ ናይታስ እማ” ያግስ። 49 ፓላህዳይሳታ ዎዞ ሚሽያ ሙሰይ ሺሽስ። 50 ጌሻ ዱንካንያ ምዛንያ ልከን እስራኤለ ባይራ አደ ናይታ ዎዞ ሚሽያ 1,365 ብራ ሳንትመ ኤክስ። 51 ጎዳይ ኪትዳይሳዳ ሙሰይ ዎዞ ሚሽያ አሮናስነ እያ አደ ናይታስ እሚስ።

<- ታይቦ ማፃፋ 2ታይቦ ማፃፋ 4 ->