1 ሰሎጳድ ሄፌራ ናአ፤ ሄፌር ጋላዳ ናአ፤ ጋላድ ማክራ ናአ፤ ማክር ምናሰ ናአ፤ ምናሰይ ዮሰፋ ናአ። ሰሎጳዳ ማጫ ናይት ማህሎ፥ ኖኦ፥ ሆግሎ፥ ምልኮነ ትርፆ። 2 ሀ ማጫ ናይት ጌሻ ዱንካንያ ፐንገን ሙሰ ስንꬃን፥ ካህንያ አላዛራ ስንꬃን፥ ሀላቃታ ስንꬃንነ ማባራ ኡባ ስንꬃን ኤቅድ፥ 3 “ኑ አዋይ መላ ቢታን ሀይቅስ፤ እ ባ ናጋራ ጋሶን ሀይቅስፐ አትሽን፥ ጎዳ ቦላ ደንድዳ ቆረ ካለይሳታ ግዶን ዴና። እያዉ አደ ናእ ባዋ። 4 ያትን፥ ኑ አዋይ አደ ናአ የልቦና ግሾ እያ ሱንꬃይ እያ ኮቻ ግዶፈ ዋንድ ꬋዪ? ኑ አዋ ዳቦታ ግዶን ኑስ ላታ ቢታ እማ” ግዶሶና።

5 ያትን፥ ሙሰይ ኤንታ ኦይሻ ጎዳ ስን ሺሽስ። 6 ጎዳይ ሙሰኮ፥ 7 “ሰሎጳዳ ማጫ ናይታ ኦይሻይ ልከ፤ ኤንታ አዋ ዳቦታ ግዶን ኔኒ ኤንታዉ ላታ ቢታ እማ፤ እያ ግሾይ ኤንታ ላታ ግዶ። 8 ቃስ እስራኤለ አሳኮ፥ ‘እስ አስ አደ ናአ የሎና ሀይቅኮ እያ ማጫ ናይት ላቶ። 9 እያዉ ማጫ ናእ ባይናባ ግድኮ እያ እሻት ላቶ። 10 እያዉ እሽ ባይናባ ግድኮ እያ አዋ እሻት ላቶ። 11 እያዉ አዋ እሽ ባይናባ ግድኮ እያ ማታ ዳቦይ ላቶ። ታኒ ጎዳይ ነና ኪትዳይሳዳ ሀይስ እስራኤለ አሳስ ዎጋ ግዶ’ ” ያግስ።

12 ጎዳይ ሙሰኮ፥ “አባሪማ ዙማ ቦላ ከያዳ ታ እስራኤለ አሳስ እምዳ ቢታ በአ። 13 ነ በእዳፐ ጉየ፥ ነ እሻ አሮናዳ ነካ ሀይቃዳ ነ ማይዛታን ጋሄታና። 14 ፂና መላ ቢታን፥ ማርባ ሃꬃ ማታን አሳይ ታ ቦላ ዙዙምዳ ዎደ ህንተ ናምአይ ኤንታ ስንꬃን ታና ጌሽ ኦꬅድ ቦንችቤከታ” ያግስ። (ማርባ ሃꬃይ ፂና መላ ቢታን፥ ቃደሳ ጌተትያ በሳን ደእያ ፑልቶ።)

15 ሙሰይ ጎዳኮ፥ 16 “አሳ ኡባስ ደኦ እምያ ጎዳ ፆሳዉ፥ ነ አሳይ ሄንꬃንቾይ ባይና ዉደ መላ ግዶናዳ፥ 17 ሀ አሳ ስንꬃን ከያነ ገልያ ቃስ ኤንታ ካለꬅድ ከስያነ ገልስያ እስ አስ ሀ ማባራ ቦላ ሹማ” ያግስ።

18 ጎዳይ ሙሰኮ፥ “አያናይ እያን ደእያ ናወ ናኣ እያሱ ኤካዳ ነ ኩሽያ እያ ቦላ ዎꬃ። 19 እያ ካህንያ አላዛራ ስንꬃንነ ማባራ ኡባ ስንꬃን ኤሳዳ ኤንቲ በእሽን ሹማ። 20 እስራኤለ ኡባይ እያዉ ኪተታና መላ ነ ማታፐ እያዉ ሻካዳ እማ። 21 እካ ኡሪመን ጎዳ ሸንያ ኦይችድ ሻክያ ካህንያ አላዛራ ስንꬃን ኤቆ። እያሱይነ እስራኤለ ማባራይ ኡባይ አላዛራ ኪታን ከዮነ ገሎ” ያግስ።

22 ሙሰይ ጎዳይ ኪትዳይሳዳ ኦꬅስ፤ እያሱ ኤፍድ፥ ካህንያ አላዛራ ስንꬃንነ ማባራ ኡባ ስንꬃን ኤስስ። 23 ጎዳይ ኪትዳይሳዳ ሙሰይ ባ ኩሽያ እያ ቦላ ዎꬅድ ሹምስ።

<- ታይቦ ማፃፋ 26ታይቦ ማፃፋ 28 ->